ᐃᓚᒋᐊᕈᑦ ᐃᓴᕈᐃᑦ ᐱᒋᐊᓯᓂᕕᓂᖓᓐᓄᑦ ᐅᓂᒃᑳᒧᑦ ᐃᓕᖃᓯᐅᑎᔪᑦᓴᖅ ᖃᕆᑕᐅᔭᒃᑯᑦ ᑕᑯᒋᐊᕋᑦᓴᓄᑦ ᐃᓴᕈᐃᑦ ᐱᒋᐊᖅᐸᓪᓕᐊᓯᓚᐅᖅᓯᒪᔪᑦ ᐃᓱᒪᒋᔭᐅᖃᑦᑕᖅᓯᒪᒻᒪᑦ ᐅᑯᓄᖓ: ᐊᐃᒐ ᐊᑕᒍᑦᓯᐊᖅ, ᒫᑕ ᕙᓛᕈᑎ, ᒪᓚᑲᐃ ᑭᒍᑦᑕᖅ, ᐊᒻᒪᓗ ᓯᒨᓇ ᐊᕐᓇᑦᓯᐊᖅ. 2017-ᖑᓕᖅᑎᓪᓗᒍ ᑖᒃᑯᐊ ᐊᕐᓇᐃᑦ ᑲᓲᑎᑎᑦᓯᖃᑦᑕᓯᓚᐅᖅᓯᒪᔪᑦ ᐋᑐᕚᒥ ᐊᕐᓇᓂᒃ ᑭᒃᑯᑐᐃᓐᓇᕐᓂᒃ ᐃᓚᐅᒍᒪᔪᓂᒃ ᖃᐅᔨᒪᒐᒥᒃ ᐃᓕᖅᑯᓯᒃᑯᑦ ᐆᑦᑑᑎᓕᐅᖃᑦᑕᕐᓂᖅ ᒥᖅᓱᖃᑦᑕᓂᒃᑯᓪᓗ ᐃᓕᑕᐅᒍᓐᓇᕐᓂᖏᓐᓂᒃ, ᐊᒻᒪᓗ ᕿᓯᓕᕆᓂᖅ ᐊᒥᓕᕆᓂᕐᓗ ᓱᓇᑐᐃᓐᓇᓂᓪᓗ ᓴᓇᖃᑦᑕᕐᓂᖅ ᐃᓅᓯᕐᒧᑦ ᐊᑑᑎᖃᑦᓯᐊᕈᓐᓇᕐᓂᖏᓐᓂᒃ. 2018-ᖑᓕᖅᑎᓪᓗᒍ, ᐃᓴᕈᐃᑦ ᐃᓄᐃᑦ ᐊᕐᓇᐃᑦ ᒥᖅᓱᖅᑏᑦ ᐊᑦᓯᕋᐅᑎᑖᕈᒻᒥᒃ ᐃᓕᑕᕆᔭᐅᒍᑎᑖᓚᐅᖅᓯᒪᔪᑦ ᑮᓇᐅᔭᓕᐅᕋᓱᐊᕐᓇᑎᒃ ᑲᑎᒪᔨᐅᕕᖃᕐᓂᖏᑦ ᓴᓇᔨᓕᕆᔨᓄᑦ ᑲᓇᑕᒥ ᐆᒻᒪᖅᑎᓕᖅᓱᒍ ᐃᓱᒪᒋᓯᒪᔭᖓᑦ ᐃᓄᓕᖅᑕᓂᒃ ᓴᓇᖃᑦᑕᕕᑦᓴᖅ. ᑐᖕᖓᓱᑦᑎᑕᐅᑦᓱᑎᒃ ᐃᓂᑦᓴᖃᖅᑎᑕᐅᓚᐅᖅᓯᒪᔪᑦ ᐅᑖᕙᒃᑯᑦ ᓄᓇᖃᖅᑳᖅᓯᒪᔪᓂᒃ ᒥᐊᓂᖅᓯᕕᖓᓐᓂ ᕇᑐ ᐃᓕᓐᓂᐊᕐᕕᐊᓗᕕᓂᕐᒥ.
ᑖᒃᑯᐊ ᑲᑐᔾᔨᑦᓱᑎᒃ 2019-ᒥ ᐱᒍᓐᓇᖅᓯᑎᑕᐅᓚᐅᖅᓯᒪᔪᑦ ᑲᓇᑕᒥ ᑲᑎᒪᔨᕐᔪᐊᓄᑦ ᓴᓇᐅᒐᓕᕆᓂᕐᒧᑦ, ᖃᐅᔨᒪᓂᕐᒧᑦ, ᐊᒻᒪᓗ ᐊᒥᖅᑳᖃᕐᓂᕐᒧᑦ ᑮᓇᐅᔭᓂᒃ ᒥᖅᓱᕕᑦᓴᖃᕈᑎᑦᓴᓂᒃ. ᐱᖓᓱᐊᖅᑎᑐᐃᓐᓇᖅᓱᑎᒃ ᐃᓄᓐᓂᒃ ᐋᑐᕚᒥ ᐃᓕᓴᐃᓚᐅᖅᑎᓪᓗᒋᑦ ᐊᑎᒋᓕᐅᕐᓂᕐᒥᒃ, ᖃᓂᒪᕐᔪᐊᕐᓇᖅ ᑰᕕᑦ ᑎᑭᓚᐅᖅᑎᓪᓗᒍ ᒪᑐᐊᒍᑕᐅᑎᓪᓗᒍᓗ, ᐃᓴᕈᒃᑯᑦ ᐊᓯᔾᔩᒋᐊᖃᓕᓚᐅᖅᓯᒪᔪᑦ ᐃᑲᔪᖅᑐᐃᒍᑎᒥᓐᓂᒃ ᐃᓄᓐᓂᒃ ᒥᖅᓱᖅᑎᓂᒃ ᓴᓇᐅᒐᓕᐅᖅᑎᓂᓪᓗ ᐋᑐᕚᒥ. ᑲᓇᑕᒥ ᑲᑎᒪᔨᕐᔪᐊᑦ ᓴᓇᐅᒐᓕᕆᓂᕐᒧᑦ ᐃᑲᔪᕈᑎᖏᓐᓂᒃ ᑮᓇᐅᔭᓂᒃ ᐱᑦᓱᑎᒃ, ᐃᓴᕈᐃᑦ ᑲᔪᓯᑎᑦᓯᒍᓐᓇᖅᓯᑎᑕᐅᒪᔪᑦ ᐃᑲᔪᕈᑎᑦᓴᖃᖅᑎᑕᐅᑦᓱᑎᒃ ᒥᖅᓱᕋᑦᓴᓂᒃ ᐱᔭᑦᓴᖃᖅᑎᑦᓯᑦᓱᑎᒃ ᐊᒥᓱᓂᒃ ᐊᕐᓇᓂᒃ ᐊᖑᑎᓂᓪᓗ ᑭᖕᖒᒪᑦᓯᕙᑦᑐᓂᒃ ᓴᓇᒐᑦᓴᓂᒃ ᐊᖏᕐᕋᒥᓐᓂ. ᑕᐃᒪᐃᓕᖅᑎᓪᓗᒍ ᐱᒋᐊᖅᑎᑦᓯᓯᒪᔪᑦ ᐃᓴᕈᒃᑯᓐᓂᒃ ᖃᐅᔨᓕᓚᐅᖅᓯᒪᔪᑦ ᐊᑑᑎᖃᑦᓯᐊᕈᓐᓇᕐᓂᖓᓂᒃ ᖃᕆᑕᐅᔭᒃᑯᑦ ᑕᑯᑦᓴᒥᒃ ᐃᓕᓴᐃᒍᑕᐅᒍᓐᓇᕐᓂᖓᓂ ᐃᑲᔪᕈᑕᐅᒍᓐᓇᕐᓂᖓᓂᓪᓗ ᐃᓄᓐᓂᒃ ᓴᓇᐅᒐᓕᐅᖅᑎᓂᒃ, ᐱᖃᕋᐃᒻᒪᑕ ᐊᑐᐃᓐᓇᖃᕋᐃᒻᒪᑕᓗ ᖃᕆᑕᐅᔭᓂᒃ ᐃᓐᑕᓂᑦᑯᑦ ᐃᓚᐅᖃᑦᑕᕈᑎᑦᓴᓂᒃ.
ᐊᕐᕌᒍᑕᒫᖅᓯᐅᒻᒥᒃ ᑲᑎᒪᓂᖃᖅᑎᓪᓗᒋᑦ ᔭᓐᓄᐊᕆ 2021-ᒥ, ᐃᓴᕈᐃᑦᒥᒃ ᐱᒋᐊᖅᑎᑦᓯᓯᒪᔪᑦ ᓴᒃᑯᐃᑦᓱᑎᒃ ᑲᑎᒪᔨᐅᓂᕐᒥᓐᓂᒃ ᐃᓇᖏᖅᑕᐅᓚᐅᖅᓯᒪᔪᑦ ᐊᓯᖏᓐᓄᑦ ᑲᑎᒪᔨᐅᓂᐊᓕᖅᑐᓄᑦ ᓯᕗᓕᖅᑎᖃᖅᓱᑎᒃ ᓇᑖᓴ ᓚᑐᕋᐃᒥᒃ.
ᑕᐃᒃᑯᐊ ᓄᑖᑦ ᑲᑎᒪᔩᑦ ᑐᑭᑖᓚᐅᖅᓯᒪᔪᑦ ᐃᓴᕈᐃᑦ ᐊᕐᓇᐃᓇᕐᓄᑦ ᑐᕌᖓᑎᒍᓐᓃᖅᓱᒍ ᐊᖑᑎᓂᒃ ᐃᑲᔪᖃᑦᑕᕈᒪᑦᓱᑎᒃ, ᑲᑐᔾᔨᖄᑎᖃᕆᐊᖃᕐᓂᖅ ᑕᑯᓐᓇᖅᓱᒍ ᑲᓲᑎᒍᓐᓇᖅᓯᖁᓪᓗᒋᓪᓗ ᖃᕆᑕᐅᔭᒃᑯᑦ ᐊᒻᒪᓗ ᐃᑲᔪᕈᓐᓇᐅᑎᒋᓗᒍ ᐃᓄᓐᓂ ᓴᓇᐅᒐᓕᐅᖅᑎᓂᒃ ᓇᒥᑐᐃᓐᓇᖅ ᓄᓇᖅᑲᑎᒌᓂᒃ, ᐃᓚᒋᔭᐅᑎᑦᓱᒋᑦ ᒥᖅᓱᖅᑏᑦ ᐊᕐᓇᐃᑦ ᐋᑐᕚᒥᐅᑕᐃᑦ.
ᓄᑖᖑᓂᖅᓴᒥᒃ ᐊᑦᓯᖅᓯᒪᓕᖅᑐᑦ ᐃᒫᒃ: ᐃᓴᕈᐃᑦ ᐃᓄᐃᑦ ᓴᓇᐅᒐᓕᐅᖅᑏᑦ: ᐱᔪᓐᓇᕐᓂᕗᑦ ᐃᓱᒪᒋᔭᐅᓯᓚᐅᖅᓯᒪᔪᖅ ᑲᑎᒪᔩᑦ ᖃᓄᖅᑑᕈᑎᖃᖅᑎᓪᓗᒋᑦ ᐃᖏᕐᕋᓂᒃᓴᖓᓂᒃ ᐃᓴᕈᐃᑦ. 2021 ᐅᐱᕐᖓᑦᓵᖓᓂ, ᐃᓴᕈᐃᑦ ᐃᓄᐃᑦ ᓴᓇᐅᒐᓕᐅᖅᑏᑦ: ᐱᔪᓐᓇᕐᓂᕗᑦ ᑲᓇᑕᒥ ᑮᓇᐅᔭᓂᒃ ᑐᑦᓯᕋᐅᑎᖓᑦ ᐊᖏᖅᑕᐅᓚᐅᖅᓯᒪᔪᖅ ᑲᓇᑕᒥ ᑲᑎᒪᔨᕐᔪᐊᓄᑦ ᐆᒻᒪᖅᑯᑎᑐᖅᑐᓄᑦ ᐃᑲᔪᕈᑎᑦᓴᓂᒃ ᖃᕆᑕᐅᔭᒃᑯᑦ ᑐᑯᑦᓴᑦᓴᐃᑦ ᐃᓕᐅᖅᑲᕈᓐᓇᖅᓯᑦᓱᑎᒃ, ᐆᒻᒪᖅᑎᑦᓱᒍ ᐃᓄᓐᓂᒃ ᓴᓇᐅᒐᓕᐅᖅᑎᓂᒃ ᑕᑯᑦᓴᐅᑎᑦᓯᒍᑎᑦᓴᖅ ᖃᕆᑕᐅᔭᒃᑯᑦ.
