ᕙᓇᔅᓴ ᐳᕉᓱ: ᐃᓅᒐᒥ ᐃᓄᑦᑎᑐᑦ ᐱᖅᑯᓯᕐᒥᒍᑦ ᒪᑭᑕᔪᖅ
ᓴᓇᐅᒐᓕᐅᖅᑎᐅᑉ ᐊᑎᖓ ᐊᒻᒪᓗ ᓴᓇᕙᑦᑕᖏᑦ
ᓴᓇᐅᒐᓕᐅᖅᑎᐅᑉ ᐊᑎᖓ: ᕙᓇᔅᓴ ᐳᕉᓱ
ᐊᑎᓕᐅᕈᓯᖓ: ᐃᓅᒐᒥ ᐃᓄᑦᑎᑐᑦ ᐱᖅᑯᓯᕐᒥᒍᑦ ᒪᑭᑕᔪᖅ
ᓄᓇᓕᒃ: ᓄᐊᔅ ᐸᐃ, ᐋᓐᑖᕆᐅ
ᓇᒥᒥᐅᑦᓴᔭᐅᓂᖓ ᓴᓇᐅᒐᓕᐅᖅᑎᐅᑉ: ᕙᓇᔅᓴ ᐊᑖᑕᑦᓯᐊᓕᒃ ᓴᓂᑭᓗᐊᕐᒥᐅᒥᒃ ᓄᓇᕗᒥ
ᓴᓇᕙᑦᑕᖏᑦ: ᐅᑉᐱᕆᔭᒥᓂᒃ ᒪᒥᓴᐅᑎᓕᐅᖅᑎ, ᐱᓕᒻᒪᑦᓴᐃᔨ, ᐅᖃᓕᒫᒐᓕᐅᖅᑎ, ᐃᓗᓕᑦᓴᓂᒃ ᓴᓇᔨ, ᐅᖃᓕᒪᔨ, ᒥᖅᓱᖅᑎᐅᑦᓱᓂ ᐊᓐᓄᕌᓕᐅᖅᑎ: ᓄᓇᖃᖅᑳᖅᓯᒪᔪᑦ ᐊᓐᓄᕌᓕᐅᕈᓯᖏᒍᑦ ᐊᓐᓄᕌᓕᐅᓲᖅ, ᓇᒡᒍᐊᕐᒥᒐᓚᓂᒃ ᔫᓗᕆᓂᓪᓗ ᓴᓇᔨ, ᑐᕌᒐᓗᐊᖅᑐᓂᒃ ᓄᓇᖃᖅᑳᖅᓯᒪᔪᓄᑦ ᐊᓯᐅᓯᒪᔪᓄᑦ ᑐᖁᑕᐅᓂᑯᓄᓪᓗ ᐊᕐᓇᓄᑦ ᓂᕕᐊᖅᓯᐊᓄᓪᓗ.
ᐱᐅᒋᓂᖅᐹᖏᑦ ᓴᓇᕙᑦᓱᒋᑦ
ᓇᑦᓯᕋᔭᐃᑦ, ᑎᕆᒐᓐᓂᐊᔭᐃᑦ, ᓇᕝᕚᖅᑕᒐᐃᑦ, ᓴᐸᖓᐃᑦ, ᐊᓐᓄᕌᑦ.
ᐊᕐᕌᒍ ᐃᓅᓕᕐᕕᕕᓂᖓ: 1979
ᓴᓇᐅᒐᓕᐅᖅᑎᐅᑉ ᐱᐅᓯᖓ:
ᓂᕕᐊᖅᓯᐊᖑᑦᓱᓂ, ᓴᓇᐅᒐᓕᐅᖅᑎ ᐃᒻᒥᓂᒃ ᑕᑯᓐᓇᖑᐊᖃᑦᑕᖅᓯᒪᔪᖅ ᐱᖕᖑᐊᖃᑎᖃᖅᓱᓂ ᐊᖓᔪᒥᓂᒃ/ᓄᑲᒥᓂᒃ. ᑲᑎᓯᖃᑦᑕᓕᕋᒥ ᐃᓄᓐᓂᒃ ᐃᓐᓇᒪᕆᓐᓂᒃ ᐋᑐᕚᒥᐅᖑᓕᖅᑐᓂᒃ 2020-ᒥ ᑲᑦᓱᖓᐃᓕᖅᓯᒪᔪᖅ ᓴᓇᖃᑦᑕᕆᐊᖅ ᑐᓂᔭᐅᖃᑦᑕᖅᓱᓂ ᓇᑦᓯᕋᔭᓂᒃ ᐃᓕᕐᓂᑯᓂᒃ ᓴᓇᒐᑦᓴᖏᓐᓂᒃ. ᐱᓕᐅᓯᐊᒥᓂᕐᒥᓂᒃ ᓇᑦᓯᕋᔭᓂᒃ ᐃᓕᕐᓂᑯᓂᒃ ᐊᑐᖅᓱᓂ ᐊᑕᔪᓕᓕᐅᕐᓂᑯ ᐊᐅᐸᖅᑐᒥᒃ. ᕙᓇᔅᓴᐅᑉ ᐊᓈᓇᖓ ᓴᓇᔨᐅᓂᑰᒥᒻᒪᑦ ᓴᓇᖃᑦᑕᖅᓯᒪᔪᖅ ᓴᐸᖓᓕᓐᓂᒃ ᐊᒻᒪᓗ ᓴᓇᕐᕈᑎᒥᓂᖏᑦ ᓴᓇᐅᒐᖏᓪᓗ ᑐᓂᔭᐅᓂᑰᑦᓱᑎᒃ ᕙᓇᔅᓴᒧᑦ.
ᐊᓚᒃᑲᐅᒪᕙᑦᑐᑦ ᓴᓇᐅᒐᖏᑦ ᐊᒻᒪᓗ ᓴᓇᐅᒐᓕᐅᖅᑎᐅᑉ ᐅᖃᐅᓯᑦᓴᖏᑦ:
ᕙᓇᔅᓴ ᓴᓇᐅᒐᒥᓂᒃ ᓂᐅᕐᕈᑎᑦᓴᖃᖃᑕᐅᕙᑦᑐᖅ ᓴᓇᔭᒥᓂᕐᓂᒃ ᓂᐅᕕᐊᑦᓴᓂᒃ ᐊᓚᒃᑲᐅᒪᔪᖃᖅᑎᓪᓗᒍ, ᐊᓪᓚᐃᓪᓗ ᖃᒡᒋᑎᓪᓗᒋᑦ, ᐊᒻᒪᓗ ᖃᕆᑕᐅᔭᒃᑯᑦ ᓴᖅᑭᔮᖅᕕᖁᑎᒥᒍᑦ. ᑖᓐᓇ ᐃᖅᑲᓇᐃᔭᖅᑎᓂᒃ ᐱᓕᒻᒪᑦᓴᐃᕙᒻᒥᔪᖅ ᓇᒥᑐᐃᓐᓇᖅ ᑲᓇᑕᓕᒫᒥ, ᑐᖕᖑᓱᑦᑎᑦᓯᖃᑦᑕᖅᓯᒪᓕᖅᑐᖅ 23-ᖏᕋᖅᓱᓂ ᐱᓕᒻᒪᑦᓴᐃᔨᐅᑦᓱᓂ 2025-ᖑᑎᓪᓗᒍ. ᒫᓂ ᑕᑯᕙᑦᑐᖅ ᓴᓇᐅᒐᓕᐅᖅᑎᓂᒃ ᐃᓕᓴᖅᑎᓪᓗᒋᑦ ᓄᑖᓂᒃ ᓴᓇᐅᓯᕐᓂᒃ ᖃᐅᔨᑎᑦᓯᕙᑦᑐᓂᓪᓗ ᖃᓄᒃᑲᓐᓂᖅ ᓴᓇᒍᓐᓇᕐᒪᖔᖅ ᐊᐅᐸᖅᑐᓂᒃ ᐊᑕᔪᓕᓂᒃ ᐊᒻᒪᓗ ᐃᓄᓐᓄᑦ ᓴᓇᔭᐅᓲᓂᒃ.
ᕙᓇᔅᓴᐅᑉ ᐅᖃᐅᓯᑦᓴᖏᑦ ᐃᓚᐅᖃᑦᑕᓂᕐᒥᓄᑦ ᐃᓄᓐᓄᑦ ᐃᓕᖅᑯᓯᒃᑯᑦ ᐱᖅᑯᓯᖅᓱᑎᓪᓗᒋᑦ:
‘ᐃᓪᓗᒐᓴᒥᐅᖑᑦᓱᖓ ᑕᐃᒪᖕᖓᑦ ᐋᓐᑖᕆᐅᒥ, ᐊᓯᐅᔨᓯᒪᔪᖓ ᐃᓄᑦᑎᑐᑦ ᐅᖃᐅᓯᕐᓂᒃ ᐱᖅᑯᓯᕐᓂᓪᓗ ᑎᒍᐊᖑᓐᓂᕋᒪ ᐋᓪᓚᓅᖅᑕᑦᓱᖓ ᐃᓱᒪᖅᓱᖅᓯᒪᖕᖏᑦᑐᖓ. ᐅᕙᑦᓯᐊᕈ ᐊᑖᑕᑦᓯᐊᕋ ᐳᕙᓪᓗᓇᖅᑐᖃᕐᓂᕐᒪᑦ ᒐᕙᒪᒃᑯᑦ ᑲᓇᑕᒥ ᐊᑖᑕᑦᓯᐊᓐᓂᒃ ᓅᑦᑎᑦᓯᔪᒥᓃᑦ ᓴᓂᑭᓗᐊᕐᒥᒃ ᐋᓐᑖᕆᐅᒧᑦ. ᑕᐃᒪᐃᑦᑐᕕᓂᐅᓂᑯᖓᓄᑦ ᓱᓕ ᐃᓂᓪᓚᓪᓚᕆᑦᓯᒪᖏᑦᑐᖓ ᐃᓅᓯᕐᓂ ᐊᒻᒪᓗ ᐃᑲᔪᖅᑕᐅᔾᔪᑎᒋᒋᐊᖃᖅᓱᒍ ᓱᓕ ᐱᔾᔪᑎᒋᓪᓗᒍ ᓴᓇᔨᐅᓂᕋ ᓂᐱᒐᓗ.
ᓴᓇᐅᒐᓕᐅᖅᑎᐅᑉ ᐱᖅᑯᓯᖅᓲᑎᒋᕙᑦᑕᖏᑦ:
ᒥᖅᓱᕐᓂᖅ, ᓴᓇᒪᓂᑦᓴᓄᑦ ᐆᑦᑑᑎᓕᐅᕐᓂᖅ, ᓇᑦᓯᕋᔭᐃᑦ.
ᑎᑎᖅᑲᖏᑦ/ᐅᖃᐅᓯᑦᓴᖏᑦ ᓴᓇᐅᒐᓕᐅᖅᑎᐅᖃᑎᒥᓄᑦ:
ᒥᖅᓱᕋᑦᓴᖃᐃᓐᓇᕈᒪ ᒥᖅᓱᖃᑦᑕᕋᔭᖅᑐᖓ ᖃᐅᑕᒫᑦ.
ᓴᓇᔭᕕᓂᖓᓂᒃ ᓂᐅᕕᕈᒪᒍᕕᑦ ᐅᕗᖓ ᖃᐅᔨᒋᐊᕈᓐᓇᖅᑐᑎᑦ:
ᓇᐅᔮᑦ ᑯᐊᐸᖓᓐᓄᑦ ᐊᒻᒪᓗ ᕙᐅᔅᐳᒃᖓᓄᑦ, ᐊᒻᒪᓗ ᓂᐅᕐᕈᑎᑦᓴᓂᒃ/ᑕᐅᖅᓯᐅᑎᑦᓴᓂᒃ ᐊᓚᒃᑲᐅᒪᕕᒻᒧᑦ ᓇᐅᔮᓂ, ᐃᖃᓗᓐᓂ, ᐊᒻᒪᓗ ᐊᓯᖏᓐᓂ ᓄᓇᓕᒋᔭᓂ ᐃᓄᓐᓄᑦ. ᔪᓕᐊ ᓴᓐᓇᔾᔨᒍᓐᓇᖅᑐᖅ ᓴᓇᖁᔨᔪᓂᒃ.
ᓴᓇᖃᑦᑕᕐᓂᒃᑯᑦ ᐊᒫᖅᑖᖅᓯᒪᕗᖓ ᐊᐃᑉᐸᖃᖅᓱᖓ, ᐱᓯᑕᐅᔪᕆᕙᓐᓇᖓ, ᐊᒻᒪᓗ ᐃᑉᐱᒋᑦᓯᐊᖅᓱᖓ. ᐋᑐᕚᒥᐅᖑᑦᓱᖓ 2020-ᒥ, ᐃᓐᓇᒪᕆᓐᓂᒃ ᐱᓕᐅᓯᐊᓚᐅᖅᓯᒪᔪᖓ ᓇᑦᓯᕋᔭᓂᒃ ᕿᓯᓂᒃ ᐃᓕᕐᓂᑯᓂᒃ, ᐊᒻᒪᓗ ᐱᓗᐊᖕᖑᐊᖅᓱᓂ, ᖃᕿᐊᖅᓯᓚᐅᖅᓯᒪᖕᖏᒻᒪᑕ ᐅᕙᓐᓂᒃ. ᑕᐃᒃᑯᐊ ᐱᓕᐅᓯᐊᕆᓚᐅᖅᓯᒪᔭᒃᑲ ᑐᖕᖓᕕᒋᓕᖅᑕᒃᑲ ᕕᔅᓂᔅᖃᕈᑎᒋᑦᓱᒋᑦ ᓴᓇᒍᑎᒋᕙᑦᓱᒋᓪᓗ. ᓴᓇᕙᑦᑕᒃᑲ ᐱᒋᐊᖅᓯᒪᔪᑦ ᑕᕝᕙᖕᖓᑦ – ᐊᓚᒃᑲᐅᒪᑎᑦᓯᒻᒪᑕ ᓇᓪᓕᓂᕐᒥᒃ, ᑕᑎᖃᕐᓂᕐᒥᒃ, ᐊᒻᒪᓗ ᐃᓕᓴᐅᑎᓂᒃ ᓈᓚᖃᑦᑕᓂᒃᑯᑦ ᐃᓕᓴᐅᑎᒋᑦᓱᒋᑦ ᐅᖃᐅᓯᕐᒥᒃ, ᑐᑭᓯᓂᖅᓴᐅᒍᑎᒋᑦᓱᒋᑦ ᐱᖅᑯᓯᕐᓂᒃ, ᐊᒻᒪᓗ ᑲᑎᒪᒧᑦᓯᖃᑦᑕᓂᒃᑯᑦ ᖃᐅᔨᒪᓪᓕᑕᓂᒃ ᐃᓐᓇᒪᕆᓐᓂᓪᓗ, ᖃᕆᑕᐅᔭᒃᑰᕋᔪᓐᓂᖅᓴᐅᒐᓗᐊᖅᓱᖓ.
ᓴᓂᕌᒍᑦ ᐱᓕᕆᐊᕆᕙᑦᑕᒪ, ᐃᑲᔪᖃᑕᐅᕙᑦᑐᖓ ᐅᓂᒃᑳᖅᑐᐊᖅᑎᐅᕙᑦᓱᖓᓗ ᐊᑐᖅᓱᒍ ᓴᓇᒍᓐᓇᕐᓂᕋ, ᑭᒃᑯᑐᐃᓐᓇᓄᓪᓗ ᐅᖃᓕᒪᒋᐊᖅᑐᐸᑦᓱᖓ ᐅᖃᓕᒫᒐᓕᐅᖅᐸᑦᓱᖓᓗ ᖃᐅᔨᒪᔭᐅᖁᑦᓱᒍ ᖃᓄᐃᒻᒪᖔᖅ ᐃᓪᓗᒐᒥᐅᖑᑦᓱᓂ. ᓴᓇᖃᑦᑕᖅᓱᖓ ᖃᐅᔨᒪᑎᑦᓯᕙᑉᐳᖓ ᖃᓄᐃᒻᒪᖔᖅ ᓄᓇᒋᐊᖕᖓᕕᓂᕐᓄᑦ ᐅᑎᕈᓐᓇᕋᓂ, ᐅᖃᓕᒪᒍᓯᕋᓗ ᑯᑦᑕᖓᑦᓱᓂ, ᐊᒻᒪᓗ ᓄᓇᖅᑲᑎᖃᕈᒪᓪᓕᐸᑦᓱᖓ – ᓇᓗᓇᐃᖅᓯᑦᓱᖓᓗ ᐃᓄᐃᑦ ᒪᑭᑕᒍᓐᓇᕐᓂᖏᓐᓂᒃ ᐃᓚᒌᓐᓂᒃᑯᑦ, ᓯᓚᑦᑐᓴᖅᑕᐅᖃᑦᑕᓂᒃᑯᑦ, ᐊᒻᒪᓗ ᐃᑉᐱᒋᔭᐅᓂᒃᑯᑦ. ᓴᓇᕙᑦᑕᒃᑰᕙᖓ, ᐃᓄᐃᑦ ᑕᑯᑎᒐᓱᐊᖅᐸᑕᒃᑲ ᐊᓚᒡᒐᐃᑦᑑᒍᓐᓇᕐᓂᖏᓐᓂᒃ ᓄᓇᒥᓃᖕᖏᒃᑲᓗᐊᕈᑎᒃ, ᐃᓄᑑᖕᖏᓐᓂᖏᓐᓂᓪᓗ, ᐊᒻᒪᓗ ᐃᓚᐅᒍᓐᓇᕐᓂᖏᓐᓂᒃ ᐱᖅᑯᓯᖃᖃᑎᒥᓐᓄᑦ ᓇᓪᓕᒋᔭᐅᒻᒪᑕ.’
ᐅᖃᐅᓯᑦᓴᐃᑦ ᓴᓇᐅᒐᓕᐅᖅᑎᐅᖃᑎᓄᑦ:
ᕙᓇᔅᓴ ᓴᓇᖃᑦᑕᓂᒃᑯᑦ ᒪᒥᓴᖅᐸᑦᑐᖅ ᐃᓱᒪᔮᕐᓂᐅᓴᓕᕋᐃᒐᒥ. ᓴᓇᖃᑦᑕᖅᓱᓂ ᓂᕆᔭᑦᓴᖅᑖᕈᓐᓇᐸᑦᑐᖅ ᖃᑭᕙᓪᓕᐊᑦᓱᓂᓗ ᕕᔅᓂᔅᖓ. ᐅᖃᐅᓰᑦ ᑲᐃᓪᓗᐊᕆᐊᕈᑎᖏᑦ ᓴᓇᐅᒐᓕᐅᖅᑎᐅᖃᑎᒥᓄᑦ ᒪᒃᑯᒃᑐᓄᓪᓗ, ‘ᓴᐱᓕᖅᑕᐃᓕᒋᑦ, ᐃᓱᒪᐃᑦ ᒪᑐᐃᖓᓗᓂ ᐊᔪᐃᓐᓇᖃᑦᑕᕆᑦᓯ ᐃᑲᔪᖅᑎᒌᓪᓗᓯ.’ ᓂᕕᐊᖅᓯᐊᖑᑦᓱᓂ ᐃᓱᒪᓚᐅᖅᓯᒪᓐᓂᖏᑦᑐᖅ ᖁᕕᐊᓇᕐᓂᖓᓂᒃ ᓴᓇᖃᑦᑕᕐᓂᐅᑉ, ᒫᓐᓇ ᑲᑦᓱᖓᐃᑦᓯᐊᓕᕋᒥ ᓴᓇᒐᓕᐊᒥᓂᒃ ᐃᓴᒥᒍᓐᓇᓕᖅᑐᖅ ᐃᑲᕐᕋᓂᒃ 16-ᓂᒃ ᖃᐅᑕᒫᑦ.
ᕙᓇᔅᓴ ᑕᑯᒍᒪᔪᖅ ᓄᓇᖃᖅᑳᖅᓯᒪᔪᓂᒃ ᐊᕐᓇᓂᒃ ᓇᒻᒥᓂᖅ ᐱᓇᓱᐊᖅᑎᓪᓗᒋᑦ; ᐃᓕᓴᕐᓂᒃᑯᓪᓗ ᓇᒻᒥᓂᖅ ᒪᑭᑕᒍᓐᓇᖅᓯᓗᑎᒃ ᓴᓇᔨᐅᓂᒃᑯᑦ. ᖁᓚᖕᖏᑦᑐᖅ ᐱᕕᖃᖅᑐᐃᓐᓇᐅᒍᓐᓇᕐᓂᖏᓐᓂᒃ ᓴᓇᐅᒐᓕᐅᖅᑏᑦ, ᑕᒪᖏᑦ ᓴᖅᑭᔮᖅᑎᑦᓯᒍᓐᓇᕐᒪᑕ ᐊᔾᔨᖃᖕᖏᓂᕐᒥᓐᓂᒃ.
ᓴᓇᐅᒐᖏᓐᓂᒃ ᓂᐅᕕᕈᒪᔪᑦ ᐅᕗᖓ ᖃᐅᔨᒋᐊᕈᓐᓇᖅᑐᑦ:
ᖃᕆᑕᐅᔭᒃᑯᑦ:www.resilientinukcreations.ca
ᑭᒃᑯᑐᐃᓐᓇᕐᓂᒃ ᑐᓴᐅᒪᑎᑦᓯᕕᒃᑯᑦ: @resilientinuk
ᐄᒪᐃᔪᒃᑯᑦ: resilientinuk@gmail.com
ᐊᔾᔨᓕᐅᒐᐃᑦ:
- ᕙᓇᔅᓴ ᑎᒍᒥᐊᖅᑐᖅ ᕿᓯᔭᒥᒃ ᐴᒥᒃ ᕿᓚᐅᔾᔭᐅᑎᒧᑦ, ᕿᓯᔭᓂᓪᓗ ᐊᖏᔪᖅᑕᖅᓯᒪᑦᓱᓂ ᐊᒻᒪ ᐊᐃᖃᖕᖏᑐᒥᒃ ᐅᐊᓯᑯᐊᖅᓯᒪᑦᓱᓂ. ᑖᓐᓇ ᓇᖏᖅᑐᖅ ᑰᑉ ᓴᓂᐊᓂ ᒥᐱᓯᖕᒥ ᐊᓪᓚᓄᑦ ᓄᓇᒥ.
- ᕙᓇᔅᓴ ᐊᖏᔪᖅᑕᖅᓯᒪᔪᖅ ᕿᓯᔭᒥᒃ ᐊᒻᒪᓗ ᕿᓯᔭᒥᒃ ᐅᓕᒥᒃ ᐊᒡᒐᒥᓄᑦ ᒥᖅᓱᖅᑕᒥᓂᕐᒥᓂᒃ. ᑖᓐᓇ ᕿᓯᔭ ᐅᓕᓕᐊᕆᓂᑯᖓ ᐊᑐᖅᑕᖓᓂ ᑕᑯᔭᐅᖁᑦᓱᓂᒃ ᒐᕙᓇ ᔨᓄᕈᒧᑦ ᒥᐊᓕ ᓴᐃᒪᓐᒧᑦ ᕇᑐ ᕼᐋᓪᒥ ᐅᖃᓕᒪᒋᐊᖅᓯᒪᑎᓪᓗᒍ ᖃᕆᑕᐅᔭᒃᑯᑦ ᓱᒃᑯᔨᐊᖑᕙᑦᑐᑦ ᒥᑦᓵᓄᑦ.
- ᐊᐅᐸᖅᑐᒥᒃ ᐃᑦᑲᑎᖅᓯᒪᔪᒥᒃ ᕿᓯᔮᒃ ᓯᐅᒻᒥᐅᑖᒃ ᐊᖏᔪᖅᑕᓴᐸᖓᓕᖅᑐᖅᓯᒪᔫᒃ – ᕙᓇᔅᓴᐅᑉ ᐆᒻᒪᑎᒥᐅᑕᖏᒃ ᐃᖅᑲᐅᒪᑦᓱᒋᑦ ᐊᓯᐅᓂᑯᐃᑦ ᐃᓄᐊᖅᑕᐅᓂᑯᐃᓪᓗ ᓄᓇᖃᖅᑳᖅᓯᒪᔪᑦ.
- ᐊᑭᓐᓇᕐᒥᐅᑕᓕᐊᕕᓂᖓ ᕙᓇᔅᓴᐅᑉ ᓂᕕᖓᔪᖅ ᐊᐅᓪᓛᕈᑎᖓᓂ ᓄᓇᒃᑰᔪᒥ ᐊᑦᓯᖅᓯᒪᔭᖓᓂᒃ ᐃᒫᒃ ‘ᐃᖏᕐᕋᓂᒃᑯᑦ ᒪᑭᑕᓂᖅ’. ᐊᓚᒡᒐᐃᑦᑑᒍᓯᖅᓯᒪᔪᖅ ᓇᑦᓯᕋᔭᒥᒃ ᕿᕐᓂᖅᑕᒥᒃ ᖃᐃᕋᔪᐊᒥᒃ. ᐅᖃᐅᓯᖏᑦ ‘ᐳᐃᒍᖅᑕᐅᓚᐅᖅᓯᒪᖕᖏᑦᑐᑦ’ ᓴᓇᒪᔪᑦ ᒥᑭᒋᐊᖅᑕᒥᓂᖓᑕ ᐳᐊᑯᐸᐃᓐ ᒥᖅᑯᖏᓐᓂᒃ. ᑮᓇᖕᖑᐊᓕᐅᖅᓯᒪᔪᖅ ᑐᒃᑐᐊᕐᔪᒧᑦ ᓇᔾᔪᒥᓂᕐᒥᒃ ᐊᒻᒪᓗ ᐅᓕᖃᖅᓱᓂᒃ ᐋᖕᖓᓴᔭᒥᒃ ᑎᕆᒐᓐᓂᐊᒥᒃ. ᓄᓇᕋᓕᖅᑐᖅᓯᒪᒻᒥᔪᖅ ᓇᐹᖅᑐᖕᖑᐊᖅ ᓇᐸᖅᑐᔭᓂᒃ ᓇᐸᖅᑐᖕᖑᐊᖃᖅᓱᓂ.
