ᓴᓇᐅᒐᓕᐅᖅᑎᐅᑉ ᓄᓇᖓ: ᐋᑐᕚ, ᐋᓐᑖᕆᐅ
ᓴᓇᐅᒐᓕᐅᖅᑎᐅᑉ ᐱᕈᕐᕕᒋᓯᒪᔭᖓ ᓄᓇᒋᓯᒪᔭᖓᓗ: ᐊᐅᓱᐃᑦᑐᖅ ᐊᒻᒪᓗ ᒥᑦᓯᒪᑕᓕᒃ
ᓴᓇᕙᑦᑕᖏᑦ: ᐅᖃᐅᓯᓕᕆᕕᒻᒥ ᑲᒪᔨ, ᐅᖃᐅᓯᓕᕆᔨᒃ, ᑐᑭᓕᐅᕆᔨ, ᒥᖅᓱᖅᑎ, ᑲᑕᔾᔭᖅᑎ ᐊᔮᔮᖅᑎᐅᑦᓱᓂ, ᐱᓪᓚᕆᖕᖑᐊᖅᑎ, ᓂᑦᓯᑦᑕᒐᕐᓂᒃ ᓴᓇᓲᖑᑦᓱᓂ
ᓴᓇᐅᒐᓕᐅᕈᑎᒋᕙᑦᑕᖏᑦ ᓴᓇᓲᖏᓪᓗ: ᐊᑎᒌᑦ, ᐳᐊᓗᐃᑦ, ᑲᒥᑐᐃᓐᓇᐃᑦ, ᓂᕈᒥᐊᒐᐃᑦ, ᓇᑦᓯᕋᔭᐃᑦ ᕿᓰᑦ, ᓄᕕᖅᓵᑦᓴᐃᑦ, ᑕᕐᕆᔭᐃᑦ ᐊᒻᒪᓗ ᑕᑯᓐᓇᕋᑦᓴᐃᑦ ᐃᓄᐃᑦ ᐱᖅᑯᓯᖏᓐᓂᒃ ᐱᓯᒪᔪᑦ.
ᐊᕐᕌᒍᖅ ᐃᓅᓕᖅᕕᕕᓂᖓ: ᒪᐃ 1985
ᓴᓇᐅᒐᓕᐅᖅᑎᐅᑉ ᐱᐅᓯᖓ: ᐃᓅᓱᑦᑑᑎᓪᓗᒍ ᓱᓕ, ᔭᐃᓐ ᐋᓇᒥᓄ/ᐊᓈᓇᑦᓯᐊᒥᓄᑦ ᒥᖅᓱᕆᐅᖅᑎᑕᐅᒪᔪᖅ ᑲᑕᔾᔭᕆᐅᖅᑎᑕᐅᒪᑦᓱᓂ. ᑐᑭᓯᓪᓚᕆᓚᐅᕋᓂ ᖃᓄᖅ ᐊᑑᑎᖃᕐᒪᖔᖅ ᒥᖅᓱᓂᖅ, ᐱᕈᖅᓴᑦᓱᓂ ᐃᓕᓐᓂᐊᕐᓂᑯᒋᒐᒥᐅᒃ ᒫᓐᓇ ᖁᕕᐊᒋᔭᖓ.
ᐃᖕᖏᐅᓯᖏᑦ ᐊᒻᒪᓗ ᑕᑯᑦᓴᐅᖃᑕᐅᕕᒋᕙᑦᑕᖏᑦ:
ᔭᐃᓐ ᐊᐃᑉᐸᖃᖅᓱᓂ ᓰᓇ ᐊᑯᒪᓕᒻᒥᒃ ᑲᑕᔾᔭᖃᑦᑕᖅᓯᒪᔪᖅ ᐊᔮᔮᖃᑦᑕᖅᓯᒪᑦᓱᓂᓗ ᐅᒥᐊᕐᔪᐊᒃᑯ ᓂᐅᕐᕈᑕᖅᑎᓂᒃ ᑕᑯᓂᐊᖅᓯᒪᑎᓪᓗᒋᑦ ᐳᓛᕆᐊᖅᑐᓄᑦ ᑐᖕᖓᓱᕝᕕᒻᒥ ᒥᑦᓯᒪᑕᓕᒻᒥ ᐅᑭᐅᓂ (10) ᖁᓕᐅᖕᖏᓗᐊᖅᑐᓂ. ᐱᓪᓚᕆᖕᖑᐊᖅᑎᐅᖃᑕᐅᓯᒪᒻᒥᔪᖅ ᑐᓄᓂᕐᒥ ᑕᑯᓐᓇᒐᓄᑦ ᐊᓪᓛᑦ ᑲᖏᖅᓱᒑᐱᒻᒨᓚᐅᕐᓂᑯ ᐃᓚᒋᔭᐅᑦᓱᓂ ᓄᓇᕗᒥ ᕿᓂᓲᓄᑦ ᑲᑕᔾᔭᕆᐊᖅᓱᓂ. ᑕᕐᕆᔭᓕᐊᖑᒪᔪᓄᑦ ᐃᓚᐅᓯᒪᒻᒥᔪᖅ ᔮᓐ ᕼᐃᐅᔅᑕᓐ ᑕᕐᕆᔭᓕᐅᖅᑎᓪᓗᒍ ᑕᐃᒎᓯᓕᒻᒥᒃ ᖃᑯᖅᑕ ᐱᑎᑦᑖᖅᑎ ᐃᓄᑉᐹᓗᒻᒧᑦ ᓄᓕᐊᕆᔭᐅᖕᖑᐊᖅᓱᓂ, ᐊᓯᐊᖑᖕᖑᐊᖅᓯᒪᒐᓗᐊᕐᒥᑦᓱᓂ. ᑭᒃᑯᑐᐃᓐᓇᐃᑦ ᑕᑯᓐᓇᕐᓂᑯᐃᑦ ᖁᕕᐊᒋᔭᖃᖅᑐᒥᓂᐅᓂᕋᕋᐃᒻᒪᑕ ᔭᐃᓐ ᖁᔭᓕᕙᑦᑐᖅ ᐊᑐᖃᑦᑕᕋᒥ ᓱᓕ ᐱᖅᑯᓯᕐᒥᓂᒃ.
ᐃᓕᓴᐃᓂᖅ ᐃᓄᓐᓄᑦ ᐃᓕᖅᑯᓯᕐᓂᒃ:
ᐃᓕᓐᓂᐊᖅᑎᐸᐅᔭᐅᓂᖅᓴᓄᑦ ᐃᓕᓐᓂᐊᕐᕕᓂ, ᐊᒻᒪᓗ ᐃᓄᖃᕐᕕᐅᕙᑦᑐᓂ, ᔭᐃᓐ ᐃᓕᓴᐃᖃᑦᑕᖅᓯᒪᔪᖅ ᓄᑲᑉᐱᐊᓂᒃ ᑲᑕᔾᔭᕆᐅᖅᓴᑎᑦᓯᑦᓱᓂ ᒥᑦᓱᕆᐅᖅᓴᑎᑦᓯᑦᓱᓂᓗ. ᐃᑉᐱᓐᓂᐊᔭᒥᓂ ᑲᒪᓇᕐᓂᕋᐃᓲᖅ ᐃᓕᓐᓂᐊᑎᑦᓯᓕᕋᐃᒐᒥ ᖃᐅᔨᒪᔭᒥᓄᑦ.
ᓴᓇᐅᒐᓕᐅᖅᑎᐅᑉ ᐃᓚᐅᕕᒋᕙᑦᑕᖏᑦ ᐃᓕᖅᑯᓯᒃᑯᑦ ᐃᓄᓐᓄᑦ ᐱᖅᑯᓯᖅᓱᕐᕖᑦ:
ᑕᒪᐃᑎᒍᑦ ᒥᖅᓱᖃᑦᑕᓂᒃᑯᑦ, ᐅᖃᐅᓯᓕᕆᔨᐅᓂᒃᑯᑦ, ᑐᑭᓕᐅᕆᔨᐅᓂᒃᑯᑦ ᐊᒻᒪᓗ ᑲᑕᔾᔭᖃᑦᑕᓂᒃᑯᑦ
ᔭᐃᓐ ᐃᑲᔪᖅᐸᑦᑐᖅ ᐃᓄᐃᑦ ᐱᖅᑯᓯᖓᓐᓂᒃ ᐆᒪᑎᑦᓯᖃᑕᐅᑦᓱᓂ ᐃᓕᓴᐃᖃᑦᑕᓂᒃᑯᑦ. ᐅᕝᕙ ᐅᖃᐅᓯᕆᓯᒪᔭᖏᑦ: ‘ᐆᒪᑏᓐᓇᕈᒪᔭ ᐱᖅᑯᓯᕆᒐᑦᑎᒍ ᐃᓕᖅᑯᑎᕆᑦᓱᒍ. ᑕᐅᓴᓃᑦᑐᑦ ᐊᕐᕌᒍᐃᑦ ᖄᖏᖅᑎᓪᓗᒋᑦ ᓱᓕ ᐆᒪᒻᒪᑦ, ᓱᓕ ᑕᐅᓴᒃᑲᓂᕐᓂᒃ ᐊᕐᕌᒍᓂᒃ ᐆᒪᖁᒐᒃᑯ.’
ᐃᓕᓐᓂᐊᑎᑦᓯᔨᐅᖃᑦᑕᖅᓯᒪᔪᖅ ᐃᓄᐃᑦ ᑐᖕᖓᓱᕝᕕᖓᓐᓂ ᐊᑎᒋᓕᐅᕆᐅᖅᓴᕈᒪᔪᓂᒃ ᐊᒻᒪ ᓱᓕ ᓰᓇ ᐊᑯᒪᓕᒻᒥᒃ ᐱᖃᑎᖃᖅᐸᑦᓱᓂ ᑲᑕᔾᔭᓕᕋᐃᒻᒪ ᐊᔮᔮᓕᕋᐃᒻᒪᓪᓗ ᐃᓕᓐᓂᑯᒥᓂᒃ ᐃᓐᓇᒪᕆᓐᓂᒃ. ᐅᖃᐅᓯᕐᒥᓂᒃ ᐆᒪᑎᑦᓯᒻᒥᔪᖅ ᐃᓄᑦᑎᑐᑦ ᐅᖃᓕᒪᖃᑎᖃᖅᐸᑦᓱᓂ ᐃᓄᓐᓂᒃ ᐃᖅᑲᓇᐃᔭᕐᕕᒻᒥᓂ.
ᐅᖃᐅᓯᑦᓴᖏᑦ ᐊᓯᓄᑦ ᓴᓇᐅᒐᓕᐅᓲᓄᑦ:
ᔭᐃᓐ ᖃᐅᔨᒪᕗᖅ ᐃᓕᓐᓂᐊᕐᓂᖅ ᐱᔭᕆᐊᑐᓲᖑᒐᓗᐊᖅᑎᓪᓗᒍ ᓴᐱᓕᑦᑕᐃᓕᕐᓂᒥᒃ ᖁᕕᐊᓇᖅᓯᒍᓐᓇᕐᒪᑦ.
ᓴᓇᐅᒐᖓᓂᒃ ᓂᐅᕕᕐᕕᑦᓴᐃᑦ: ᑎᑭᓴᐃᒍᒪᔪᓄᑦ ᖃᕆᑕᐅᔭᒃᑯᑦ, ᐅᕝᕙᓘᓐᓂᑦ ᑕᑯᕋᓐᓈᖅᑕᐅᖁᔨᔪᑦ ᔭᐃᓐᒥᒃ, ᑎᑎᕋᕐᕕᒋᒍᓐᓇᖅᑕᐃᑦ ᐅᑯᑎᒎᓇ: jsingoorie@gmail.com
