ᓴᓇᐅᒐᓕᐅᖅᑎᐅᑉ ᐊᑎᖓ: ᐊᐃᔭ ᖁᒪᖔᐱᒃ
ᐊᑎᓕᐅᕈᓯᖓ: ᐊᐃᔭ ᖁᒪᖔᐱᒃ (ᐃᓄᑦᑎᑐᑦ ᐊᑎᓕᐅᕋᐃᒐᒥ ᐆᒻᒪᑎᖕᖑᐊᖃᓲᖅ ᐃᓱᐊᓂ)
ᓄᓇᓕᒃ: ᒑᑎᓄ, ᑯᐸᐃᒥ
ᓇᒥᒥᐅᑦᓴᔭᐅᓂᖓ ᓴᓇᐅᒐᓕᐅᖅᑎᐅᑉ: ᐃᖃᓗᒻᒥᐅᑦᓴᔭ ᓄᓇᕗᒥ
ᓴᓇᕙᑦᑕᖏᑦ: ᐊᐃᔭ ᓇᑦᓯᔭᓂᒃ ᓴᓇᕙᑦᓱᓂ ᒪᒃᑯᒃᑐᓄᑦ ᐃᑲᔪᖅᑎᒋᔭᐅᕙᑦᑐᖅ, ᐊᒻᒪᓗ ᑎᑎᖅᑐᒐᖅᑎᐅᑦᓱᓂ, ᑕᖅᓴᑦᓴᓂᓪᓗ ᑎᑎᖅᑐᒐᖅᐸᑦᓱᓂ, ᕿᒥᕐᕈᐊᒐᓂᒃ ᐅᖃᓕᒫᒐᓕᐅᓲᖑᑦᓱᓂ, ᐊᒻᒪᓗ ᓇᑦᓯᕐᓂᐊᖅᑎᐅᑦᓱᓂ.
ᐱᐅᒋᓂᖅᐹᖏᑦ ᓴᓇᐅᒐᑦᓴᐃᑦ ᐊᒻᒪᓗ ᓱᓇᓂᒃ ᐱᔾᔪᑎᖃᕐᒪᖔᑕ: ᐅᒃᑯᓯᑦᓴᖅ, ᓴᐅᓂᒐᓚᐃᑦ, ᐊᒥᐊᑦ, ᔭᕐᕋᐃᑦ, ᑕᕐᕆᔭᐃᑦ, ᖃᕆᑕᐅᔭᒧᑦ ᐊᒥᐊᕈᑏᑦ, ᓇᑦᓯᕋᔭᐃᑦ, ᐊᒻᒪᓗ ᐅᓂᒃᑳᓂᒃ ᐅᖃᓕᒫᒐᓕᐅᕈᑏᑦ.
ᐊᐱᖅᓱᖅᑕᐅᑦᓱᓂ ᓴᓇᕙᑦᑕᖏᑕ ᒥᑦᓵᓄᑦ ᐊᒻᒪᓗ ᖃᓄᖅ ᑐᑭᖃᖅᑎᒻᒪᖔᒋᑦ, ᐊᐃᔭ ᐅᖃᓚᐅᖅᑐᖅ ᐱᐅᒋᔭᒥᓂᒃ ᓴᓇᖃᑦᑕᕋᒥ ᑐᑭᓯᔭᐅᖁᕙᑦᑕᖏᑦ ᐊᓯᒥᓄᑦ. ᓇᑦᓯᓕᕆᓕᕋᐃᒐᒥ ᕿᓯᓕᕆᓗᐊᖕᖑᐊᐸᑦᑐᖅ ᓴᓇᕙᒃᑲᓗᐊᖅᓱᓂ ᐊᓯᖏᓐᓂᒃ ᒥᑭᔫᑎᓂᒃ ᓲᕐᓗ ᓇᒡᒍᐊᕐᒥᒐᓚᐃᑦ (ᔫᓗᕆ) ᓱᓇᖕᖑᐊᒐᓚᐃᓪᓗ.
ᐊᕐᕌᒍ ᐃᓅᓕᖅᕕᕕᓂᖓ: 1998
ᓴᓇᐅᒐᓕᐅᖅᑎᐅᑉ ᐱᐅᓯᖓ: ᓄᑕᕋᐅᓪᓗᓂ ᐊᐃᔭ ᐅᖃᓕᒫᕈᒪᕙᓚᐅᖅᑐᖅ ᕿᒥᕐᕈᐊᒐᓂᒃ ᐊᒻᒪᓗ ᐱᖕᖑᐊᕈᒪᓲᖑᑦᓱᓂ. ᑲᑦᓱᖓᐃᒍᑎᖃᖅᐸᑦᑐᖅ ᐊᓯᒥᓂᒃ ᐃᓄᓐᓂᒃ ᓴᓇᐅᒐᓕᐅᓲᓂᒃ, ᐊᒻᒪᓗ ᕿᒥᕐᕈᐊᒐᓂᒃ ᐅᖃᓕᒫᖃᑦᑕᕐᓂᑯᒥᓂᒃ 90ᔅ ᐊᕐᕌᒍᖏᓐᓂ ᓱᓕ ᐅᑭᐅᖅᑕᖅᑐᒥᐅᖑᑦᓱᓂ, ᔭᒪᐃᓐ ᐊᕐᓇᐅᑕᐅᔫᑉ ᑎᑎᖅᑐᒐᖏᓐᓂᒃ ᐃᓗᓕᖃᖅᓱᑎᒃ ᐅᖃᓕᒫᒐᐃᑦ. ᑲᑦᓱᖓᐃᑎᑕᐅᒃᑲᓐᓂᖅᐸᒻᒥᔪᖅ ᐃᓄᐃᑦ ᐊᓯᖏᓐᓄᑦ ᐅᖃᓕᒫᒐᓕᐊᖑᖃᑦᑕᖅᓱᒪᔪᑦ – ᓲᕐᓗ ᕼᐃᐅᓪ ᐳᐃ ᐊᒻᒪᓗ ᖃᐅᔨᓴᖅᑏᑦ (ᐅᐊᑦᓰᑦ). ᐃᓱᒻᒥᕋᐃᒐᒥ ᓴᓇᒐᑦᓴᒥᒃ ᓴᓇᓯᕙᑦᑐᖅ, ᐊᒻᒪᓗ ᓄᖅᑲᐅᑎᔾᔮᒐᓂᐅᒃ ᐱᔭᕇᖕᖏᓐᓂᓕᒫᖓᓂ.
ᓴᓇᐅᒐᖏᑦ ᐊᓚᒃᑳᒪᔪᑦ ᐊᒻᒪᓗ ᓴᓇᐅᒐᓕᐅᖅᑎᐅᖃᑎᒥᓂᒃ ᑐᓴᖅᓯᒪᔭᖏᑦ: ᐊᐃᔭᐅᑉ ᐊᑖᑕᖓᑕ ᐊᑖᑕᑦᓯᐊᖓᑕᓗ ᓴᓇᐅᒐᖏᑦ ᑕᑯᑦᓱᒐᖃᕐᕕᒻᒦᑦᑐᑦ, ᐊᒻᒪᓗ ᐊᓈᓇᑦᓯᐊᖓᑕ ᓴᓇᔭᒥᓂᖏᑦ ᑕᑯᑦᓴᐅᑦᓱᑎᒃ ᑕᑯᑦᓱᒐᖃᕐᕕᒻᒥ ᐊᓂᖅᑎᕆᔪᓄᑦ ᐊᑐᖅᑕᐅᖃᑦᑕᕐᓂᑯᓂᒃ ᐊᓚᒃᑲᐅᒪᔪᓂᒃ ᒑᑎᓄᒥ. ᐊᐃᔭ ᓴᓇᕙᑦᑐᖅ ᓂᐅᕐᕈᑎᑦᓴᒥᓂᒃ. ᑕᖅᓴᑦᓴᓂᒃ ᑎᑎᖅᑐᒐᖅᐸᑦᑐᖅ ᕿᒥᕐᕈᐊᒐᓃᑦᑐᑦᓴᓂᒃ ᓄᑕᖅᑲᓄᑦ, ᐊᒻᒪᓗ ᖃᕆᑕᐅᔭᒃᑯᑦ ᓴᖅᑭᔮᖅᑐᑦᓴᓂᒃ. ᐊᐃᔭ ᐃᓚᐅᖃᑦᑕᖅᓯᒪᔪᑦ ᐊᓯᓄᑦ ᓴᓇᐅᒐᓕᐅᖅᑎᓄᑦ ᐊᓚᒃᑲᐅᒪᑎᑕᐅᓕᕋᐃᒻᒪᑕ ᓴᓇᔭᒥᓂᖏᑦ ᐊᖏᔫᖕᖏᑦᑐᒥ ᑕᑯᑦᓱᒐᖃᕐᕕᒻᒥ ᓲᕐᓗ ᓴᕕᕋᔭᓂᒃ ᓴᓇᐅᒐᓕᐅᖅᑎᓄᑦ ᓴᓇᐅᒐᐃᑦ, ᓯᑖᓐᓯᑏᑦ, ᑯᐸᐃᒥ 2022-ᖑᑎᓪᓗ. ᑲᓇᑕᒥ ᑮᓇᐅᔭᓂᒃ ᑕᖅᓴᓕᐅᖅᑏᑦ ᐊᓚᒃᑲᐃᕋᑖᓚᐅᕐᒥᔪᑦ 20-ᑖᓚᒥᒃ ᑮᓇᐅᔭᒥᒃ ᓴᕕᕋᔭᒥᒃ ᑕᖅᓴᓕᒻᒥᒃ ᐊᐃᔮᑉ ᑎᑎᖅᑐᒐᕐᓂᑯᖓᓂᒃ ᓄᓇᕗᒥᐅᑦ ᓇᓪᓕᐅᓂᖅᓯᐅᕐᓂᖃᖅᑎᓪᓗᒋᑦ 25-ᓂᒃ ᐅᑭᐅᓂᒃ ᓄᓇᕗᖃᓕᖅᑎᓪᓗᒍ.
ᓴᓇᐅᒐᓕᐅᖅᑎᐅᑉ ᐃᓚᐅᒍᑎᒋᕙᑦᑕᖏᑦ ᐃᓕᖅᑯᓯᒃᑯᑦ ᐃᓄᐃᑦ ᐱᖅᑯᓯᖅᓲᑎᖏᓐᓂ: ᐊᐃᔭ ᐊᓯᐅᔨᓯᒪᖕᖏᑦᑐᖅ ᐃᓄᑦᑎᑐᑦ ᐱᖅᑯᓯᕐᒥᓂᒃ ᓇᑦᓯᕐᓂᐊᖅᑎᐅᖃᑦᑕᓂᒃᑯᑦ, ᓇᑦᓯᔭᓂᒃ ᕿᓯᓕᕆᖃᑦᑕᓂᒃᑯᑦ, ᓂᖅᓯᐅᖃᑦᑕᓂᒃᑯᑦ, ᒥᑦᓱᖃᑦᑕᓂᒃᑯᑦ, ᐊᒻᒪᓗ ᐅᓂᒃᑳᖅᑎᐅᖃᑦᑕᓂᒃᑯᑦ ᓇᒻᒥᓂᕐᒥᓄᓪᓗ ᐃᓚᒋᔭᐅᕙᑦᓱᓂ
ᓯᓚᑐᓂᕐᒥᒍᑦ ᐅᖃᐅᓯᑦᓴᖏᑦ ᓴᓇᐅᒐᓕᐅᖅᑎᐅᖃᑎᓄᑦ: ᐊᐃᔭ ᕿᑲᑐᐃᓐᓇᖁᔨᖕᖏᑦᑐᖅ ᐱᒍᒪᔭᕐᓃᕕᑦ ᐱᒍᒪᒍᕕᑦ ᐅᕝᕙᓘᓐᓃᑦ ᓴᓇᐅᒐᓕᐅᖃᑦᑕᕈᒪᒍᕕᑦ. ᒪᒃᑯᒃᑐᓂᒃ ᖃᐅᔨᒪᖁᔨᔪᖅ ᖁᓚᕆᔭᐅᖁᔨᒐᓂᒃ ᐱᒍᓐᓇᕐᓂᖏᓐᓂᒃ, ᐱᒐᓱᐊᖔᖁᑦᓱᒋᑦ: “ᐱᒍᓐᓇᖅᑐᕆᒍᕕᑦ ᐱᒍᒪᔭᕐᓃᕕᑦ ᐊᑏ ᑲᔪᓯᑐᐃᓐᓇᕆᑦ. ᑲᑦᓱᖓᐃᓪᓗᑎᑦ!”
ᓴᓇᐅᒐᖓᓂᒃ ᓂᐅᕕᕈᒪᓐᓂᕈᕕᑦ: ᐊᐃᔭ ᓵᖃᖃᑦᑕᕐᒪᑦ ᓂᐅᕕᕋᖅᑎᑦᓯᔪᖃᓕᕋᐃᒻᒪᑦ ᓴᓇᐅᒐᓂᒃ, ᐅᕝᕙᓘᓐᓃᑦ ᑎᑭᓵᕆᓗᒍ ᖃᕆᑕᐅᔭᒃᑯᑦ ᑕᑯᒋᐊᕐᕕᖁᑎᖓᓄᑦ ᐅᕝᕙᓘᓐᓃᑦ ᕙᐃᔅᐳᒃᑯᑦ.
ᑐᕌᕈᑎᖓ:
ᓴᓇᐅᒐᖏᑕ ᐊᔾᔨᖏᑦ:
- 20$-ᑖᓚ ᓴᕕᕋᔭᐅᑦᓱᓂ ᑮᓇᐅᔭᖅ ᑕᖅᓴᓕᒃ ᐊᐃᔭᐅᑉ ᑎᑎᖅᑐᒐᖓᓂᒃ ᐊᕐᓇᖕᖑᐊᒥᒃ ᐊᓈᓇᖕᖑᐊᒥᒃ ᓇᓴᕐᒥᐅᑕᖕᖑᐊᓕᒃ ᕿᑐᕐᖓᒥᓂᒃ. ᓄᑕᖅᑲᐃᑦ ᒧᑭᖕᖑᐊᖅᑐᑦ ᐅᓗᕆᐊᓇᖅᑐᖃᖕᖏᑦᑐᒥ ᐅᓐᓄᐊᒥ ᓯᕿᓂᖅᑎᓪᓗᒍ.
- ᐊᐃᔭᐅᑉ ᐅᖃᓕᒫᒐᓕᐅᕆᐊᖕᖓᐅᑎᖓ, ᐊᒥᓱᓕᐊᖑᓂᑯ ᐃᓂᓪᓚᑦᓯᒪᔪᑦ
(Inhabit) ᐃᓕᓐᓂᐊᕈᑎᑦᓴᓕᐅᖅᑎᖏᓐᓄᑦ, ᐊᕐᕚᑦ ᐊᒥᓱᓕᐅᖅᑎᓄᑦ.
- ᐊᐃᔮᐅᑉ ᑕᖅᓴᓕᐊᒥᓂᖓ ‘ᕆᑲᓐᓰᓪᑯᓐᓄᑦ’ ᓇᑦᓯᓂᐊᖅᑏᑦ ᐊᒻᒪᓗ ᓇᑦᓯᒥᓂᕐᓂᒃ ᓂᐅᕕᐊᑦᓴᖃᓲᑦ ᐱᖃᖃᑕᐅᕕᒋᑦᓱᓂᐅᒃ ᐊᐃᔮᑉ.
- ᑎᑎᖅᑐᒐᖏᑕ ᐃᓚᖓᑦ
- ᑎᑎᖅᑐᒐᖏᑕ ᐃᓚᖓᑦ
- ᑎᑎᖅᑐᒐᖏᑕ ᐃᓚᖓᑦ
- ᐊᒥᐊᒐᖏᑕ ᐃᓚᖓᑦ
- ᖃᕆᑕᐅᔭᒧᑦ ᑎᑎᖅᑐᒐᓕᐊᒥᓂᖓ ᐱᒍᒪᔪᒧᑦ ᑎᓕᔭᐅᑦᓱᓂ
- ᐊᐃᔭᐅᑉ ᐳᐊᓗᓕᐊᒥᓂᖏᒃ ᐳᐊᓗᓕᐅᖃᑦᑕᓕᕋᑖᖑᑦᓱᓂ
ᓴᓇᔨᐅᑉ ᐊᔾᔨᖓ
ᐊᐃᔭ ᐃᓴᕈᐃᑦ ᓴᓇᕕᖓᓃᑦᓱᓂ