ᐲᑕ ᐃᑎᓐᓄᐊᖅ

ᐲᑕ ᐃᑎᓐᓄᐊᖅ ᐃᒡᓗᓕᒑᕐᔪᒃ, ᓄᓇᑦᓯᐊᖅ (ᓄᓇᕘᓕᖅᑐᒥ) ᐃᓅᓚᐅᕐᓯᒪᕗᖅ ᒫᓐᓇᐅᔪᕐᓗ ᕆᔅᒪᓐᒥ ᐱᕈᕐᓴᐃᔪᓕᕆᕕᖕᒥ (Richmond Organic Acres) ᓄᓇᖃᖅᐳᖅ, ᓄᓇᐃᓐᓇᕐᒥᓐᖔᖅᑐᓂ ᐱᕈᖅᑐᓕᐅᖅᐸᒃᖢᑎᓐ.

ᓯᕗᓪᓕᕐᓂ ᐊᕐᕌᒍᓂ ᖁᓕᓂ ᐲᑕ ᓄᓇᐃᓐᓇᕐᒥ ᐱᕈᕐᓴᓚᐅᖅᐳᖅ ᕿᒧᒃᓯᖅᐸᒃᖢᓂ, ᐊᖑᓇᓱᒋᐊᖅᐸᒃᖢᓂ, ᑮᔭᖃᑦᑕᕆᐊᖅᐸᒃᖢᓂ (ᒥᑭᒋᐊᕐᓂᐊᕆᐊᖅᐸᒃᖢᓂ), ᐃᖃᓪᓕᐊᖅᐸᒃᖢᓂᓗ. ᐃᓚᖓᓂ ᒪᒃᑯᖕᓂᖓᓂ ᐃᓐᓇᕈᖅᑎᓪᓗᒍᓗ ᐋᑐᐋ, ᐊᓐᑎᐅᕆᐅᒥ ᐱᖃᓐᓇᕆᔭᖏᒡᓗ ᒪᕐᕉᖕ ᐃᓕᓐᓂᐊᓚᐅᖅᐳᖅ . ᖃᐅᔨᒪᓇᑎ ᓱᓇᐅᕝᕙ ᐋᑐᐋᒧ ᓄᒃᑎᖅᑎᑕᐅᔪᕕᓂᓐ ᒐᕙᒪᑐᖃᒃᑯᓐ ᓯᕗᓕᐅᖅᑎᖏᓐᓄᓐ, ᐃᓕᖅᑯᓯᑐᖃᕆᓐᖏᑕᒥᓄ ᐊᓯᓐᖑᕈᓐᓇᕐᒪᖔᑕ ᓱᓇᐅᕝᕙ ᖃᐅᔨᓴᖅᑕᐅᔪᓐ. ᑕᐃᒪᐃᓕᐅᖅᑕᐅᕙᒃᐸᖕᓂᖏᓐ ᖃᓄᕐᓗ ᐃᒃᐱᖕᓇᕐᓂᖃᕐᓯᒪᓂᖓ ᖃᐅᔨᓴᕈᑕᐅᓯᒪᓕᖅᐳᖅ ᐅᖃᓕᒫᒐᓕᐊᖑᔾᔪᑕᐅᓪᓗᓂᓗ “ᖃᐅᔨᓴᕈᑕᐅᓪᓗᑎᓐ ᐃᓄᐃᓐ” (2009).

ᐲᑕ ᐅᐃᓂᐸᐃᖕᒥ ᑰᒡᔪᐊᕌᓗᖕᒥᓗ (Winnipeg and Churchill) ᐋᓐᓂᐊᕐᕕᒡᔪᐊᕐᓂ ᑐᑭᓕᐅᖅᑎ/ᑐᓵᔨᐅᓪᓗᓂ ᐃᖅᑲᓇᐃᔭᖅᐸᓚᐅᖅᐳᖅ 1970ᕈᔪᖕᓂ, ᐊᒻᒪ ᐅᑭᐅᖅᑕᖅᑐᒥ ᐃᓄᓕᕆᓂᕐᒧ ᐱᓕᒻᒪᒃᓴᐃᑎᑦᑎᔨᐅᓚᐅᕆᓪᓗᓂ ᐃᖢᐊᕐᓴᐃᔨᓂ/ᓇᔭᓐᖑᐊᓂ ᒫᓂᑑᐸᐅᒻ ᓯᓚᑦᑐᕐᓴᕐᕕᒡᔪᐊᖓᓂ. 1970-ᓂᕈᔪᒃ, ᐲᑕ ᐅᖃᓪᓚᒃᑎᐅᓚᐅᖅᐳᖅ ᓈᓚᐅᓯᕆᕝᕕᓕᕆᔨᐅᓪᓗᓂᓗ ᓰᐲᓰᒃᑯᓐᓂ ᐃᖃᓗᖕᓂ ᑰᒡᔪᐊᕌᓗᖕᒥᓗ.1976ᒥ 1978ᒧ, ᐲᑕ ᐃᓕᓴᐃᔨᒻᒪᕆᐅᖃᑕᐅᓚᐅᖅᐳᖅ ᐋᑐᐋ ᓯᓚᑦᑐᕐᓴᕐᕕᒡᔪᐊᖓᓂ, ᐃᓄᒃᑎᑐᑦ ᐅᖃᐅᓯᕐᒥ ᐊᒻᒪ ‘ᐅᑭᐅᖅᑕᖅᑐᕐᒥᐅᓐ ᐊᓯᓐᖑᖅᑐᒃᑰᕐᓂᖏᓐ” ᑕᐃᔭᐅᔪᒥᒃ ᐃᓕᓐᓂᐊᖅᑎᑦᑎᓪᓗᓂ. ᐲᑕ ᓯᕗᓪᓕᖅᐹᑦᑎᐊᖑᓪᓗᓂ ᐃᓅᓪᓗᓂ ᒪᓕᒐᓕᐅᖅᑎᕐᔪᐊᒃᑯᓐᓄ ᑲᑎᒪᔨᓐᖑᖃᑕᐅᓚᐅᖅᐳᖅ, ᓄᓇᑦᓯᐊᕐᒥᒃ ᐊᕕᒃᑐᕐᓯᒪᓂᐊᓂ ᑭᒡᒐᖅᑐᐃᓪᓗᓂ ᑲᓇᑕᐅᒻ ᒪᓕᒐᓕᐅᕐᕕᒡᔪᐊᖓᓂ 1979-ᒥ 1984-ᒧ. ᐊᕐᕌᒍᓄ 40-ᓗᐊᖑᓕᖅᑐᓄ, ᐲᑕ ᐃᓚᐅᓂᖃᕐᓯᒪᐃᓐᓇᖅᐳᖅ ᒐᕙᒪᓕᕆᓂᕐᒥᒃ, ᑕᕐᕆᔮᒃᓴᓕᐅᕐᓂᕐᒥᒃ, ᑐᓴᒐᒃᓴᓕᕆᓂᕐᒥᒃ, ᐃᓕᓐᓂᐊᖅᑎᑦᑎᓂᕐᒥᒡᓗ. ᓇᖕᒥᓂᖅ ᐱᓕᕆᐊᖃᖅᐳᖅ (ᑲᖏᕐᖠᓂᕐᒥ), ᐱᔨᑦᑎᕋᐅᑎᖃᕈᑎᖃᕐᖢᓂ ᑐᑭᓕᐅᕐᓂᕐᒧᓐ, ᑐᓵᔨᐅᓂᕐᒧᓐ, ᐅᖃᓪᓚᖕᓂᕐᒧ/ᐅᖃᐅᓯᖃᕐᓂᕐᒧ, ᐃᓕᓐᓂᐊᓯᓐᓈᖅᑐᓂ ᑲᒪᔨᐅᓂᕐᒧ, ᐊᒻᒪ ᐅᓂᒃᑳᓕᐊᓂ ᑎᑎᕋᕐᓂᕐᒧ. ᖁᕕᐊᒋᔭᖃᖅᐳ ᕼᐋᑭᖅᑐᓂ ᑎᓕᐅᕆᔨᐅᔭᕆᐊᒃᓴᖅ, ᓄᑖᓐᖑᖅᑎᕆᓇᓱᓕᕐᖢᓂᓗ ᖃᖓᑕᔪᓐᓇᐅᑎᖓᓂᒃ.

ᐲᑕ ᐃᑎᓐᓄᐊᖅ ᐃᓴᕈᐃᑦ ᐃᓄᐃᑦ ᓴᓇᐅᒐᓕᐅᖅᑎᖏᓐᓂ ᖃᐅᔨᒋᐊᖅᑎᒋᔭᐅᕗᖅ ᐃᓄᒃᑎᑐᓪᓗ ᐅᖃᐅᓯᖓᓐᓂ ᖃᕆᓴᐅᔭᒃᑯᑦ  ᐃᓕᓐᓂᐊᖅᑎᑦᑎᓕᖃᑦᑕᕐᓂᐊᕐᖢᓂ ᐊᑐᖅᑕᒃᓴᓂ ᑮᓇᐅᔭᖅᑕᖃᓕᖅᐸᑦ.