ᐃᖅᑲᓇᐅᔭᖅᑎᕗᓐ

Bobby is a Shop Worker and General Helper at Isaruit Inuit Arts. – and Isaruit’s resident mouth organ player!

ᑕᐃᕕᑎ ᐃᕐᖢ ᐃᒃᐱᐊᕐᔪᖕᒥ ᐃᓅᓂᑰᕗᖅ ᒥᑦᑎᒪᑕᓕᖕᒥ ᐱᕈᕐᓴᓪᓗᓂ. ᐃᖃᓗᖕᓄ ᓄᒃᑎᓚᐅᖅᐳᖅ ᐃᓕᓐᓂᐊᕐᕕᒡᔪᐊᓕᐊᕐᖢᓂ. ᒍᐊᑕᓐ ᕌᐳᑦᓴᓐ ᐃᓕᓐᓂᐊᕐᕕᒡᔪᐊᖓᓂ ᐱᐊᓂᒃᓯᓚᐅᖅᐳᖅ 1979ᖑᑎᓪᓗᒍ ᐊᒻᒪᐃᓛᒃ ᕿᔪᓕᕆᓂᕐᒥᒃ ᐃᓕᓐᓂᐊᓕᓚᓚᐅᕐᖢᓂ ᕗᐊᑦ ᓯᒥᑦ, ᓄᓇᑦᓯᐊᕐᒥ. ᐃᕐᖢᖕ ᐊᓱᐃᓛᒃ ᕿᔪᓕᕆᔨᐅᓕᕐᖢᓂ ᒥᑦᑎᒪᑕᓕᖕᒧᐊᒃᑲᓐᓂᓚᐅᖅᐳᖅ. ᓄᑖᓂᒎᖅ ᐃᒡᓗᕐᔪᐊᓕᐅᖅᑎᐅᖃᑕᐅᓚᐅᖅᐳᖅ, ᐋᖅᑭᐅᒪᔪᓕᕆᔨᐅᓪᓗᓂ ᐊᒻᒪ ᓇᖕᒥᓂᖅ ᐱᓕᕆᐊᖃᕐᖢᓂ ᓄᓇᒋᓚᐅᖅᑕᒥᓂ ᐊᕐᕌᒍᓄᑦ ᖁᓕᓄᑦ. ᑕᐃᕕᑦ ᐅᖃᓚᐅᖅᐳᖅ ᓴᓇᐅᒐᓕᐅᕈᒪᕙᓕᓚᐅᕐᓂᖓᓄᓐ ᐊᖑᓇᓱᒃᑎᐅᓂᖓᓂ ᐱᔭᕆᐊᖃᖅᐸᓚᐅᖅᑕᖏᓐᓂ ᐱᒋᐊᕐᕕᖃᕐᖢᓂ. ᐊᖑᓇᓱᒃᑎᐅᓪᓗᓂ ᓴᓇᕐᕈᑎᒥᓂ ᓴᓇᔭᕆᐊᖃᖅᐸᓚᐅᖅᐳᖅ ᐋᖅᑭᐅᒪᐃᓐᓇᖅᑎᖦᖢᓂᒋᓪᓗ, ᒫᓐᓇᐅᔪᖅ ᒪᒃᑯᖕᓂᕐᓴᐅᔪᓂ ᐃᓕᓴᐃᕙᓕᕐᖢᓂ ᓴᓇᐅᒐᓕᐅᕐᕕᖕᒥ. ᐃᕐᖢᒃ ᐃᓕᓐᓂᐊᖅᑎᑕᒥᓂ ᐃᓄᐃᑦ ᓴᓇᐅᒐᓕᐅᕈᓯᑐᖃᖏᓐᓂ ᐃᓕᓐᓂᐊᖅᑎᑦᑎᕙᒃᐳᖅ ᐃᓴᕈᐃᑦ ᐃᓄᐃᑦ ᓴᓇᐅᒐᓕᐅᖅᑎᑦ ᓴᓇᐅᒐᓕᐅᕐᕕᐊᓂ ᐃᓕᓴᐃᔨᐅᓪᓗᓂ.

ᐃᓅᔭ, ᒪᒃᑯᒃᑑᓪᓗᓂ, ᐃᖅᑲᓇᐃᔭᓚᐅᑲᖃᑦᑕᓚᐅᕐᖢᓂ ᐃᖅᑲᓇᐃᔭᖅᑎᓐᖑᒻᒪᕆᓚᐅᖅᐳᖅ ᐃᓴᕈᐃᒃᑯᓐᓂ, ᓇᑦᑎᐅ ᓂᕿᖏᓐᓂ ᓂᕐᖠᐅᖅᑎᐅᖃᑕᐅᓪᓗᓂ ᐅᓪᓗᑐᐃᓐᓇᒃᑯᓐ ᐃᓯᑐᐃᓐᓇᕐᓇᐅᑎᓪᓗᒍ. ᒫᓐᓇᐅᔪᖅ ᒥᕐᓱᕐᓂᕐᒥ ᐊᔪᕈᓐᓃᕐᓴᖅᐳᖅ ᒥᕐᓱᖅᑎᐅᓪᓗᓂ ᐃᓴᕈᐃᒃᑯᓐᓂ.

ᐊᐃᔭ ᖁᒪᖔᐱᒃ ᒪᒃᑯᒃᑑᕗᖅ ᖃᕆᓴᐅᔭᓕᕆᓂᕐᒥ ᑎᑎᕋᐅᔭᕐᓯᒪᔪᓕᕆᓂᕐᒥᒡᓗ ᐱᓕᕆᐊᖃᖅᑎᐅᔪᖅ ᖁᕕᐊᒋᔭᖃᕐᖢᓂ ᑕᑯᓐᓈᒐᒃᓴᓕᐊᖑᕙᒃᑐᓂ ᓴᓇᐅᒐᓕᐅᖅᑎᐅᓂᕐᒥᓄ ᐊᒻᒪ ᓴᓇᐅᒐᓕᐅᕐᓂᕐᒧ ᐱᓕᕆᔨᐅᑎᓪᓗᒍ. ᒫᓐᓇᐅᔪᖅ ᐊᐃᔭ ᓴᓇᐅᒐᓕᐊᖑᕙᒃᑐᓂ ᐊᐅᓚᑦᑎᔨᐅᓂᕐᒧ ᐱᓴᑉ (Bishop’s) ᓯᓚᑦᑐᕐᓴᕐᕕᒡᔪᐊᖓᓂ ᐃᓕᓐᓂᐊᖅᑕᒥᓂ ᓄᖅᑲᐅᔾᔨᓯᒪᓚᐅᑲᒃᐳᖅ ᐅᒃᑯᓯᒃᓴᕐᒥᒃ ᓴᓇᐅᒐᓕᐅᕈᓯᕐᓂ ᐃᓕᓐᓂᐊᖔᕈᒪᓪᓗᓂ ᐊᑖᑕᒥᖕᓂ, ᕉᐱᓐ ᖁᒪᖔᐱᖕᒥ ᐊᒻᒪᓗ ᖃᕆᑕᐅᔭᕈᔪᖕᓂ ᐃᑲᔪᖅᑎᐅᓪᓗᓂ ᐃᓴᕈᐃᒃᑯᓐᓂ. 2019ᖑᑎᓪᓗᒍ ᐱᓕᕆᐊᕆᓚᐅᖅᑕᖓ ᑕᐃᔭᐅᔪᖅ “ᕿᓚᐅᔾᔭᖅᑎ” ᓯᕗᓪᓕᐅᔾᔪᑎᒋᓚᐅᖅᐸᖓ ᓵᓚᒃᓴᕐᖢᓂ 19-29ᓂ ᐊᕐᕌᒍᓕᖕᓂ ᓄᓇᖃᖅᑳᕐᓯᒪᔪᓄ ᓴᓇᐅᒐᓕᐅᖅᑎᓄ ᐅᓂᒃᑳᖅᑐᐊᓕᐅᖅᑎᓄᓪᓗ ᑐᓐᓂᕐᕈᓯᐊᖅᑖᓚᐅᕐᓯᒪᓪᓗᓂ ᐃᑦᑕᕐᓂᓴᓕᕆᔨᒃᑯᓐᓄ ᑲᓇᑕᒥ, ᐅᓄᖅᑐᓂᒡᓗ ᐅᖃᓕᒫᒐᓕᐊᖑᖃᑦᑕᕐᓯᒪᔪᓂ ᐱᓕᕆᐊᖃᐅᕐᓯᒪᓪᓗᓂ, ᓲᕐᓗ 2021ᒥ ᖁᓐᖏᐊᒐᒃᓴᓕᐊᕆᓚᐅᖅᑕᒥᓂ “ᓇᓴᕋ ᓈᒻᒪᓐᖏᓗᐊᕐᒪᓐ” ᐃᓐᕼᐋᐱᑦ (Inhabit) ᑐᓴᒐᒃᓴᓕᕆᔨᒃᑯᓐᓂ. ᐅᓄᖅᑐᓂ ᑕᕐᓴᓕᐅᕐᓯᒪᐅᕐᖢᓂ ᑎᑎᕋᐅᔭᕐᓯᒪᐅᕐᖢᓂᓗ. ᑎᑎᕋᐅᔭᓚᐅᕐᓯᒪᒋᕗᖅ $20ᒥᒃ ᓄᑖᖑᔪᓂ 2024ᖑᑎᓪᓗᒍ. ᐊᐃᔭ ᒫᓐᓇᐅᔪᖅ ᐋᑐᐋᒥᐅᑕᐅᕗᖅ ᐃᓴᕈᐃᒃᑯᓐᓂ ᓇᑦᑎᕐᓂᓐᖔᖅᑐᓂ ᐱᓕᕆᔨᐅᓪᓗᓂ ᐊᒻᒪᓗ ᒪᒃᑯᒃᑐᓄ ᐱᓕᕆᐊᓂ ᑲᒪᔨᐅᓪᓗᓂ.

ᐊᓯᓇ ᑲᓐᓄᑕᖅ ᓴᓂᕋᔭᒃ, ᓄᓇᕗᑦ ᖃᓂᒋᔮᓂ ᐃᓅᓂᑰᕗᖅ ᐱᕈᕐᓂᑰᓪᓗᓂᓗ, ᓴᓂᕋᔭᖕᒧ ᒪᒃᑯᒃᓯᓪᓗᓂ ᓄᒃᑎᓕᑕᐃᓐᓇᕐᖢᓂ. ᐊᓯᓇ ᐊᑕᓈᕐᔪᐊᑦ ᐃᓕᓐᓂᐊᕐᕕᖓᓂ ᐃᓕᓐᓂᐊᓚᐅᖅᐳᖅ 8ᓄ ᑎᑭᖦᖢᓂ ᐊᒻᒪᐃᓛᒃ ᓴᓂᕋᔭᖕᒥ  ᓯᕗᓪᓕᖅᐸᐅᓪᓗᓂ ᑎᑎᖅᑲᖅᑖᕐᕕᖕᒥ ᑎᑎᖅᑲᕐᓂᐊᕐᕕᓕᕆᔨᓐᖑᓚᐅᕐᖢᓂ ᑭᓯᐊᓂ ᓯᕗᓪᓕᕐᒥ ᕿᑐᕐᖓᖅᑖᕋᒥ. ᐊᓯᓇ ᐊᖓᔪᒥᖕᓂᒃ ᔭᐸᓕᐅᕈᓐᓇᕐᓯᓚᐅᖅᐳᖅ ᖃᑕᓐᖑᑎᖏᓐ ᐃᖕᒥᓄᓪᓘᓐᓃᓐ ᓴᓐᓇᑎᕙᒃᖢᓂ. ᐃᖅᑲᓇᐃᔮᒥᓂ ᕿᓄᐃᓵᕐᓂᕐᒥᒃ ᐃᑲᔪᖅᑕᒃᓴᕆᔭᒥᓄᓐ ᑭᒃᑯᑐᐃᓐᓇᕐᓄᓪᓗ  ᑐᓐᖓᓇᕆᐊᖃᕐᓂᕐᒥᒡᓗ ᐃᓕᑦᑎᕝᕕᖃᐅᖅᐸᓚᐅᖅᐳᖅ, ᒫᓐᓇᒧ ᑎᑭᖦᖢᒍ ᐊᑐᖅᑕᒥᓂ. ᑲᓐᖑᑦᑕᐅᓐᖏᓐᓂᕐᓴᐅᓕᕐᓯᒪᕗᖅ ᐱᓕᕆᐊᖓᑦᑎᒍᓐ. ᑲᓐᓄᑕᖅ  ᐅᖃᕐᓯᒪᕗᖅ ᓴᓇᐅᒐᓕᐅᖃᑦᑕᓕᓚᐅᕐᓯᒪᓂᖓᓄᓐ ᕿᑐᕐᖓᒥᓄᓐ. ᐱᓇᔪᓪᓚᑦᑖᕐᖢᓂ ᒥᕐᓱᕆᐊᖃᖅᐸᒃᖢᓂ ᐳᐊᓗᓂ, ᑲᒥᖕᓂ, ᐊᓐᓄᕌᓂ, ᐊᓯᖏᓐᓂᒡᓗ ᐊᒃᓱᕉᑎᖃᖅᐸᒃᖢᓂ ᖁᕕᐊᒋᔭᖃᖅᐸᓪᓕᐊᓕᓚᐅᖅᐳᖅ ᓴᓇᐅᒐᓕᐅᕐᓂᕐᒥᒃ. ᐊᓯᓇ ᓴᓇᐅᒐᓕᐅᕐᕕᖕᒥ ᐃᓐᓇᐅᖃᑕᐅᕗᖅ ᒥᕐᓱᕐᓂᕐᒧᓪᓗ ᐃᓕᓴᐃᔨᐅᖃᑕᐅᓪᓗᓂ ᑕᒫᓂᕐᒥᐅᓄ ᐃᓄᖕᓄ.

ᐱᐊᑐᓪ ᐃᓅᓚᐅᖅᐳᖅ ᐱᕈᕐᖢᓂᓗ ᓇᐃᔾᔨᐅᕆᐊᒥ (ᑕᕆᐅᕌᓘᑉ ᐊᑭᐊᓂ), ᖃᑕᓐᖑᑎᖏᓪᓗ. ᐱᐊᑐᓪ ᓯᕗᓪᓕᐅᓪᓗᓂ ᐃᓴᕈᐃᒃᑯᓐᓂ ᑮᓇᐅᔭᓕᕆᓂᕐᒧ ᑐᑭᒧᐊᒃᑎᑦᑎᔨᐅᓚᐅᖅᐳᖅ, ᐱᖓᓱᐃᓐᓇᕐᓂ ᐃᖅᑲᓇᐃᔭᖅᑎᖃᕐᖢᓂ – ᐃᓴᕈᐃᑦ ᑮᓇᐅᔭᓕᕆᔨᖓᑦ, ᑮᓇᐅᔭᓕᕆᔨᑉ ᐃᑲᔪᖅᑎᖓᑦ ᐊᒻᒪ ᐃᖕᒥᓂᒃ ᑮᓇᐅᔭᓕᕆᔾᔪᑎᓂᒃ ᐅᖃᐅᔾᔨᕐᓱᐃᔨᐅᓪᓗᓂ ᐸᕐᓇᒍᑎᓕᐅᕈᑎᓂᒡᓗ ᐱᓕᕆᐊᖃᐅᕐᖢᓂ. ᐱᐊᑐᓪᑕᐅᖅ ᐃᓴᕈᐃᒃᑯᑦ ᐃᖏᕐᕋᓂᖓᓐᓂᒃ ᑲᒪᔨᐅᒋᕗᖅ.

ᐱᐊᓐ ᐃᓪᓚᐅᖅ ᑲᖏᖅᑐᒑᐱᖕᒥ ᐱᕈᕐᓴᓂᑰᕗᖅ, ᐊᑖᑕᒥᓂ ᔫᓱᐊ ᐃᓪᓚᐅᕐᒥ ᐊᖑᓇᓱᒋᐊᖃᑎᖃᖅᐸᒃᖢᓂ ᐊᐅᓪᓚᑲᑕᖃᑎᖃᖅᐸᒃᖢᓂᓗ, ᐊᒻᒪ ᖃᑕᓐᖑᑎᒌᖑᓪᓗᑎᓐ ᐊᐅᓪᓛᕐᓯᒪᔭᖅᑐᖅᐸᒃᖢᑎᑦ ᐅᐱᕐᖓᒃᓵᒃᑯᑦ ᐊᐅᔭᒃᑯᓪᓗ. ᑕᐃᒪᓐᖓᓂ 13-ᖑᓕᓚᐅᕐᓯᒪᒐᒥ ᐊᑖᑕᒥᓂ ᐱᓕᕆᐊᖃᖃᑎᖃᐃᓐᓇᖅᐸᓚᐅᖅᐳᖅ ᐊᖑᓇᓱᒋᐊᖅᐸᒃᑐᓄ ᐊᐅᓪᓚᑲᑕᒃᑎᑦᑎᔨᐅᓪᓗᓂ ᑐᓵᔨᐅᓪᓗᓂᓗ ᖁᓪᓕᒃᑯᓐᓂ ᐊᐅᓪᓛᑲᑕᑦᑎᑦᑎᔨᓄᓐ, ᖃᑕᓐᖑᑎᒌᖑᓪᓗᑎ ᓇᖕᒥᓂᕆᓚᐅᖅᑕᖓᓂ. ᐱᕈᕐᓴᕙᓪᓕᐊᓪᓗᓂ, ᐱᐊᓐ ᓄᓇᐃᓇᕐᒧ ᐊᐅᓪᓛᕐᓯᒪᖃᑕᐅᖏᓐᓇᖅᐸᓚᐅᖅᐳᖅ, ᐊᕐᕌᒍᓕᒫᖅ. ᐊᔪᓐᖏᓐᓂᖃᐅᑦᑎᐊᓕᓚᐅᖅᐳᖅ ᐱᖅᑯᓯᑐᖃᑦᑎᒍᓐ, ᐊᖑᑦᑎᓂᕐᒥ ᑮᔭᖃᑦᑕᕆᐊᕐᓂᕐᒥᒡᓗ (ᒥᑭᒋᐊᕐᓂᐊᕐᓂᕐᒥᒃ), ᐃᖏᕐᕋᔭᖕᓂᕐᒥᒃ, ᐅᓂᒃᑳᖅᑐᐊᕐᓂᕐᒥᒃ ᓂᕐᖠᐅᕐᓂᕐᒥᒡᓗ, ᓄᓇᐃᓐᓇᕐᒥ ᐱᓱᑲᑕᒃᐸᖕᓂᕐᒥ ᕿᒧᒃᓯᖅᐸᖕᓂᕐᒧ ᓯᑯᒃᑯᓐ, ᖃᐃᖅᑲᑐᔪᒃᑰᕐᓂᕐᒥ ᑕᐅᕗᖓᓕᒫᖅ ᑲᓇᑕᒥ ᓄᓇᕐᔪᐊᕐᒥ ᐊᔾᔨᓕᐅᕆᔨᕐᔪᐊᓕᕆᔨᖏᓐᓄᑦ ᐊᐅᓪᓚᖅᑎᑦᑎᑲᑕᖃᑦᑕᕐᓂᕐᒧᓐ. 2005-ᖑᑎᓪᓗᒍ ᐱᐊᓐ ᖃᓪᓗᓈᓐ ᓄᓇᖏᓐᓄᐊᓚᐅᖅᐳᖅ ᕆᔾᔭᐃᓇᒧᓐ ᐊᒻᒪᐃᓛᒃ ᐋᑐᐋ ᖃᓂᒋᔮᓄᓐ, ᓂᕿᓕᕆᕝᕕᖕᓂ ᐃᖅᑲᓇᐃᔭᖅᐸᓚᐅᕐᖢᓂ ᐃᒡᓗᕐᔪᐊᓕᕆᓂᕐᒥ ᖁᕕᐊᒋᔭᖃᓕᓚᐅᕆᕗᖅ ᐊᔾᔨᒌᓐᖏᑦᑐᓂ ᓴᓇᔪᓕᕆᓂᕐᒥ ᐱᓕᕆᐊᖃᐅᖅᐸᓕᕐᖢᓂ. ᒫᓐᓇᐅᔪᖅ ᓱᓕ ᐱᐊᓐ ᓄᓇᐃᓐᓇᕐᒥ ᖃᐅᔨᒪᐅᕐᓂᖓ ᐊᑐᖅᐸᓕᖅᐸᖓ ᖃᓪᓗᓈᓂ ᓇᐹᖅᑐᖃᐅᕐᕕᐅᔪᓂ ᖃᑕᓐᖑᑎᖏᓪᓗ ᐱᕈᕐᓴᓪᓗᓂᒋᓐ ᐃᓄᓪᓚᕆᒃᑎᑐᓐ. ᐱᐊᓐᑕᐅᖅ ᓴᓇᐅᒐᓕᐅᕐᕕᖕᓂ ᑐᑭᒧᐊᒃᑎᑦᑎᔨᐅᒋᕗᖅ ᐃᓴᕈᐃᒃᑯᓐᓂ, ᐊᐅᓚᑦᑎᔨᐅᓪᓗᓂᓗ ᐃᓴᕈᐃᒃᑯᑦ ᐃᓐᓇᕐᓂ ᐃᓄᖕᓂ ᖃᐅᔨᒋᐊᕈᑎᒋᕙᒃᑕᖏᓐᓂ. ᐃᓴᕈᐃᒃᑯᓐᓂ ᐋᓐᓂᐊᖅᑕᐃᓕᔪᓕᕆᓂᕐᒧ ᐊᑦᑕᕐᓇᖅᑕᐃᓕᔭᕆᐊᖃᕐᓂᕐᒧᓪᓗ ᐱᔾᔪᑎᓕᖕᓂ ᑐᑭᒧᐊᒃᑎᑦᑎᔨᐅᕗᖅ.

ᐱᕗᕐᓕ ᑎᓴᒪᐅᔪᓄ ᓴᖅᑭᑎᑦᑎᓯᒪᔪᓄ ᐃᓚᒋᔭᐅᕗᖅ ᐃᓴᕈᐃᒃᑯᓐᓂ ᐃᓄᖕᓂ ᖃᑕᓐᖑᑎᔮᒌᖑᒐᓇᒃᑐᓂ. ᖃᓪᓗᓈᓂ ᐊᖓᔪᖅᑳᖃᕐᖢᓂ, ᑐᓛᑐᒥᐅᒃᓴᔭᐅᓪᓗᓂ, ᐱᕗᓕ ᐃᓅᖃᑎᖃᐅᕐᓯᒪᐅᖅᐳᖅ ᐊᔾᔨᒌᓐᖏᑦᑐᓂ, ᐃᓕᓴᐃᓂᕐᒧ ᐃᓕᓴᕆᔭᐅᔾᔪᑎᖃᕐᖢᓂ. ᐃᓕᓴᐃᔨᐅᓚᐅᕐᖢᓂ ᓯᕗᕕᐅᓪᒥ (Schefferville) ᐃᒡᓗᓕᖕᒥᓗ, ᐊᒻᒪᓗ ᒐᕙᒪᑐᖃᒃᑯᓐᓂ ᐃᓄᓕᕆᔨᑐᖃᒃᑯᓐᓄ ᐊᕐᕌᒍᒐᓴᖕᓄ ᐃᖅᑲᓇᐅᔭᓚᐅᕐᖢᓂ, ᑎᒍᐊᕆᔭᐅᓚᐅᖅ ᐊᐱᑕᒃᑯᓐᓄ ᖃᑕᓐᖑᑎᒌᖑᔪᓄ ᑲᖏᖅᑐᒑᐱᖕᒥ 1985-ᖑᑎᓪᓗᒍ. ᑲᖏᖅᑐᒑᐱᖕᒥᐅᑕᐅᓚᐅᕐᖢᓂ ᐊᕐᕌᒍᓄ 19-ᓄ ᐃᓕᓴᕐᓯᕕᒃᑯᓐ ᑲᑐᔾᔨᖃᑎᒌᖏᓐᓂ/ᖃᑕᓐᖑᑎᒌᓄ ᖃᐅᔨᒋᐊᕐᕕᖕᒥ ᐋᖅᑭᒃᓯᖃᑕᐅᕝᕕᒋᓚᐅᖅᑕᒥᓂ, ᒫᓐᓇᐅᔪᖅ ᐱᕗᓕ ᐋᑐᐋᒥᐅᑕᐅᕗᖅ ᐱᕙᓪᓕᐊᑎᑦᑎᕙᓪᓕᐊᖏᓐᓇᕐᖢᓂ ᐃᓴᕈᐃᒃᑯᓐᓂ ᐃᓄᖕᓄ ᓴᓇᐅᒐᓕᐅᖅᑎᓄ ᐅᐸᒃᑕᕐᕕᖕᒥ ᑐᑭᒧᐊᒃᑎᒋᔭᐅᓪᓗᓂ.

ᑲᐅᔾᔭᒃ ᒥᑦᑎᒪᑕᓕᖕᒥᐅᑕᒃᓴᔭᐅᕗᖅ ᓯᕗᓪᓕᖅᐸᐅᓪᓗᓂᓗ ᐃᓴᕈᐃᒃᑯᓐ ᐃᖅᑲᓇᐃᔭᖅᑎᖏᓐᓂ Roots-ᑯᓐᓂ ᐃᓐᓇᖅᑕᕆᔭᐅᓕᕐᖢᓂ.

ᑳᑦ, ᑯᕆᔅᑎ, ᑕᐅᓐᓯᐊᓐ ᐱᕈᕐᓯᒪᕗᑦ ᐳᕌᒃᕕᐅᓪ (Brockville), ᐊᓐᑎᐅᕆᐅᒥ ᖃᑕᓐᖑᑎᒥᓂ. ᐃᓕᓴᐃᔨᐅᓂᕐᒧ ᐃᓕᓐᓂᐊᕐᓯᒪᓪᓗᓂ, ᑳᑦ ᐃᓕᓐᓂᐊᕐᔪᐊᕐᓯᒪᒋᕗᖅ ᐃᓄᓕᕆᓂᕐᒥᒃ ᐋᑐᐋ ᓯᓚᑦᑐᕐᓴᕐᕕᒡᔪᐊᖓᓂ. ᑳᑦ ᐃᓴᕈᐃᒃᑯᓐᓂ ᐃᓄᐃᑦ ᓴᓇᐅᒐᓕᐅᖅᑎᓄ ᐱᓕᕆᐊᓂ ᑲᒪᔨᐅᕗᖅ ᐱᒋᐊᖅᑎᑦᑎᔾᔪᑎᓂᒡᓗ ᑎᑎᕋᖅᑎᐅᓪᓗᓂ ᐊᓯᖏᓐᓂᒡᓗ ᑮᓇᐅᔭᖅᑖᒃᑲᓐᓂᕋᓱᒍᑎᓂ ᐱᓕᕆᐊᖃᐅᕐᖢᓂ.

ᓰᓇ ᐊᑯᒪᓕᒃ ᑐᓄᓂᖅ ᕿᑭᖅᑖᓗᖕᒥᐅᑕᒃᓴᔭᐅᕗᖅ, ᒥᑦᑎᒪᑕᓕᐅᔪᖅ, ᓄᓇᕗᒻᒥ. ᓂᖏᐅᒃᑯᒥᓂ ᐱᕈᕐᓴᓂᑰᓪᓗᓂ, ᖁᕕᐊᒋᔭᖃᓪᓚᕆᓕᓚᐅᖅᐳᖅ ᐃᓄᐃᓐ ᕿᓚᐅᔾᔭᕈᓯᖏᓐᓂ ᑲᑕᒡᔭᕈᓯᖏᓐᓂᒡᓗ ᑕᑯᔭᕆᐅᕋᒥ ᑐᓄᓂᒃᑯᓐᓂ ᖁᓐᖏᐊᖅᑎᑦᑎᔨᓂ ᓄᑕᕋᐅᑎᓪᓗᒍ. ᑕᐃᔅᓱᒪᓂ ᐱᖅᑯᓯᑐᖃᕐᓂ ᐊᑐᖅᑕᐃᓕᑎᑕᐅᑎᓪᓗᒋᑦ, ᓰᓇ ᐃᓄᓪᓚᕆᐅᓂᕐᒥᓂᒃ ᓇᓗᓇᐃᕐᓯᓪᓇᕆᒃᐸᓪᓕᐊᓕᓚᐅᖅᐳᖅ ᖁᓐᖏᐊᖅᐸᒃᖢᓂ ᑐᓄᓂᖅ ᖁᓐᖏᐊᖅᑎᑦᑎᔨᖏᓐᓂ ᐱᖃᓯᐅᑎᓪᓗᒋᑦ ᐸᑲᒃ ᐃᓄᒃᓱᒃ, ᐊᒻᒪᓗ ᐊᖓᖓᓐᓂᒃ ᐊᒃᑲᖓᓐᓂᒡᓗ. 

ᓰᓇ ᓄᓕᐊᔪᓐᖑᐊᖑᓚᐅᖅᐳᖅ ᐃᓕᓐᓂᐊᕐᕕᒡᔪᐊᕐᒥ ᐱᓐᖑᐊᕐᓂᖃᖅᑎᓪᓗᒋᑦ ᑕᐃᔭᐅᔪᒥᒃ “ᐃᓐᓇᑦᑎᓐᓂ ᓂᐱᑖᖅᑎᑦᑎᓂᖅ” ᐊᑏᓚ ᑰᕆᒧᓐ ᑲᒪᒋᔭᐅᓚᐅᕐᓯᒪᔪᖅ ᓯᕗᓪᓕᕐᒥ ᓴᖅᑭᑎᑕᐅᓚᐅᕐᓯᒪᓪᓗᓂ ᔫᕆᒃ, ᓱᐃᑦᓱᓚᓐᒥ (ᑕᕆᐅᕌᓘᒻ ᐊᑭᐊᓂ) ᐊᒻᒪᓗ ᑕᕐᕆᔭᖅᑕᐅᓚᐅᕐᖢᓂ ᔭᓗᓇᐃ, ᓄᓇᑦᓯᐊᕐᒥ. ᑕᐃᒪᓐᖓᓐ 2006ᖑᑎᓪᓗᒍ, ᐊᐅᔭᐃᓐᓇᒃᑯᓐ ᓰᓇ ᑎᑎᕋᕐᓯᒪᕗᖅ, ᑲᒪᔨᐅᓯᒪᕗᖅ, ᐊᒻᒪ ᐱᓐᖑᐊᖅᑎᐅᖃᑕᐅᓯᒪᕗᖅ ᐊᑕᐅᓯᐅᓐᖏᑦᑐᓂ ᐃᓄᐃᓐ ᐅᓂᒃᑲᐅᓯᑐᖃᖏᓐᓂ ᐊᑐᕐᖢᑎᓐ ᖁᓐᖏᐊᖅᑎᑦᑎᖃᑦᑕᕐᓯᒪᕗᖅ, ᐱᖃᓯᐅᑎᓪᓗᒍ ᑕᕐᕆᔮᒃᓴᓕᐊᖑᓚᐅᖅᑐᖅ “ᐊᓯᓐᖑᖅᑐᓐ” ᓴᓇᓚᐅᖅᑕᖓ 2012ᖑᑎᓪᓗᒍ ᑲᑎᑎᕆᔾᔪᑕᐅᓪᓗᓂ ᓯᕗᓪᓕᕐᓂ ᕿᑎᒃᑎᐅᕙᓚᐅᖅᑐᓂ ᖁᓐᖏᐊᖅᑕᐅᔪᒃᓴᐅᓪᓗᑎᓐ. 

ᓰᓇ ᐅᓄᖅᑐᓂ ᖁᓐᖏᐊᖅᑎᑦᑎᔨᓂ ᐱᓕᕆᐊᖃᖃᑎᖃᖃᑦᑕᕐᓯᒪᓕᖅᐳᖅ, ᑕᒪᒃᑯᓂᖓᓗ ᑎᑎᕋᖅᑎᐅᔪᓂ ᑐᓄᓂᕐᒥᐅᓐ ᖁᓐᖏᐊᖅᑎᑦᑎᔨᑦ ᐱᓕᕆᐊᖏᓐᓂ ᐊᒻᒪᓗ ᖃᒡᒋᐊᕗᑦ ᑲᑐᔾᔨᖃᑎᒌᖏᓐᓂ. ᓰᓇ ᐊᓯᖏᓪᓗ ᖁᓐᖏᐊᖅᑎᑦᑎᔨᐅᖃᑎᖏᓐ ᑕᕐᕆᔮᒃᓴᓕᐅᓚᐅᖅᐳᑦ “ᖃᓪᓗᓈᖅ ᐱᓯᒃᓯᔨ” ᑕᐃᔭᐅᔪᒥᒃ ᑎᑎᕋᖅᑕᐅᓚᐅᕐᓯᒪᔪᒥᒃ ᔮᓐ ᕼᐆᔅᑕᓐᒧᓐ ᒥᑦᑎᒪᑕᓕᖕᒥ. ᐊᓐᑎᐅᕆᐅᒧ ᓅᓚᐅᖅᑎᓐᓇᒍ, ᓰᓇ ᓄᓇᕗᑦ ᒐᕙᒪᒃᑯᖏᓐᓂ ᐃᖅᑲᓇᐃᔭᖅᑎᐅᓚᐅᖅᐳᖅ ᐊᕐᕌᒍᓄ 15ᓄ ᐊᒻᒪᓗ ᐊᔾᔨᒌᓐᖏᑦᑐᓂ ᐊᐅᓚᑦᑎᔨᓄ ᑲᑎᒪᔨᐅᖃᑕᐅᕙᓚᐅᕐᖢᓂ.

ᓰᓇ ᐱᓕᕆᐊᖃᐃᓐᓇᕐᓯᒪᕗᖅ ᓄᓇᕐᔪᐊᕐᒥ ᐅᒥᐊᕐᔪᐊᕐᓃᑦᑐᓄ ᖁᓐᖏᐊᖅᑐᓕᕆᔨᐅᓪᓗᓂ ᐃᓄᐃᓐ ᐃᓕᖅᑯᓯᖏᓐᓂ ᐊᕐᕌᒍᓄ 25ᖑᓕᖅᑐᓄ ᑎᓴᒪᐃᓐ ᕿᑐᕐᖓᖏᓐ ᐱᕈᕐᓴᓂᓕᒫᖏᓐᓂ. ᓰᓇ ᖁᕕᐊᒋᔭᖃᓪᓚᕆᒃᐳᖅ ᐃᓄᖕᓂ ᐃᓐᓇᕐᓂ ᐱᓕᕆᐊᖃᑎᖃᕆᐊᒃᓴᖅ ᐱᖅᑯᓯᑐᖃᑦᑎᒍᓪᓗ ᓯᕗᓪᓕᐅᔾᔭᐅᔪᓂ ᐃᓕᖅᑯᓯᕆᔭᐅᔪᓂᒡᓗ ᐊᑐᐃᓐᓇᕆᐊᒃᓴᖅ ᑭᖑᓂᒃᓴᑦᑎᓐᓄ ᑲᔪᓯᐅᒪᑎᑦᑐᒪᓪᓗᓂᒋᓐ.

ᔨᐊᓯ ᖃᓐᖑᖅ ᐃᓄᓪᓚᕆᒃ ᐃᓅᓚᐅᖅᐳᖅ ᐱᕈᕐᓴᓪᓗᓂᓗ ᐃᒡᓗᓕᒃ ᓄᓇᕗᒻᒥ. 16-ᖑᑎᓪᓗᒍ, ᔨᐊᓯ ᖃᑕᓐᖑᑎᖏᓪᓗ ᐋᑐᐊᒧ ᓄᒃᑎᓚᐅᖅᐳᓐ. ᑕᐃᒪᓐᖓᓂ ᐋᑐᐋᒦᓕᕋᒥ, ᔨᐊᓯ ᐃᓚᒋᔭᐅᖏᓐᓇᕐᓯᒪᕗᖅ ᐋᑐᐋᒥᐅᓄ ᐃᓄᖕᓄ, ᐊᔾᔨᒌᓐᖏᑦᑐᓂ ᐱᓕᕆᐊᖃᐅᕐᓯᒪᓪᓗᓂ ᑕᒪᐃᓐᓂ ᑐᓐᖓᓱᕝᕕᖓᑦ ᐃᓄᐃᑦᑯᓐᓂ ᐊᒻᒪ ᐃᓅᖃᑎᒌᑦ ᑐᒥᖓᓂ. ᔨᐊᓯ ᐱᖓᓱᓂ ᒪᒃᑯᓕᖅᑐᓂ ᕿᑐᕐᖓᖃᖅᐳᖅ, ᒫᓐᓇᐅᔪᕐᓗ ᐊᖏᕐᕋᒥᓂ ᐊᓈᓇᐅᕗᖅ. ᓴᖅᑭᑎᑦᑎᓚᐅᖅᐳᖅ CKCU 93.1 F.M  ᐅᖃᓪᓚᒡᕕᖕᒥᒃ ᐃᓄᖕᓄ ᐋᑐᐋᒥᐅᓄ  ᓈᓚᐅᑎᖃᕐᕕᖕᒥᒃ  ᐱᖓᔪᐊᑕᒫᑦ ᐃᑲᕐᕋᒧ ᐊᑕᐅᓯᕐᒧ ᑐᓴᕐᓴᐅᕙᒃᖢᓂ ᐅᓪᓗᕈᒻᒥᑕᕐᓇᒥ. ᔨᐊᓯ ᖁᕕᐊᓱᒃᐳᖅ ᐋᑐᐋᒥᐅᓂ ᐃᓅᖃᑎᖃᕆᐊᒃᓴᖅ ᕿᑐᕐᖓᒥᓂᒡᓗ ᖁᓐᖏᐅᖑᔭᕐᖢᓂᓗ ᐃᓄᐃᑦ ᐃᓕᖅᑯᓯᑐᖃᖏᓐᓂ ᐅᖃᐅᓯᖏᓐᓂᒡᓗ ᐃᓕᑉᐸᓪᓕᐊᖏᓐᓇᖅᑎᓪᓗᒋᓐ. ᐃᓄᒻᒪᕆᐅᓂᕐᒥᓂᒃ ᔭᒐᐃᓂᐊᕋᓱᒋᓚᐅᕐᓯᒪᒐᓗᐊᖅᑎᓪᓗᒍ ᒪᒃᑯᒃᑎᓪᓗᒍ ᐋᑐᐋᒧᐊᕋᒥ, ᔨᐊᓯ ᐃᓅᖃᑎᒥᖕᓂ ᖃᐅᔨᒪᖁᔨᑦᑎᐊᖅᐳᖅ ᐋᑐᐋᒥ ᐃᖢᐊᕆᔭᒥᓂ ᐃᓂᑖᕈᓐᓇᑦᑎᐊᕐᓂᕐᒥᓄᓐ, ᐃᖕᒥᑎᑑᓚᐅᖅᑐᕐᓗ ᓄᓇᓕᖕᒥ ᐃᒡᓗᓕᖕᒥ ᐱᕈᕐᓴᓚᐅᕐᖢᓂ ᑕᐃᒫᑦᑕᐃᓐᓇᓪᓗᐊᖅ ᓄᓇᖅᑲᑎᒌᖕᓂᖃᕈᓐᓇᕐᓂᕐᒥᓄᑦᑕᐅᖅ ᑕᒫᓂ ᓄᓇᓕᖅᐸᐅᔭᐅᔪᒥ ᐋᑐᐋᒥ. ᔨᐊᓯ ᐃᓄᖕᓂ ᐋᑐᐋᒥᐅᓂ ᑭᒡᒐᖅᑐᐃᓪᓗᓂ ᓴᖅᑭᑎᓪᓚᕆᒃᐸᒃᑕᒥᓄ ᐊᔭᐅᕆᔨᐅᖏᓐᓇᕐᓯᒪᕗᖅ ᑕᐃᓐᒪᖓᑦ ᐃᓴᕈᐃᒃᑯᑦ ᐃᓄᐃᑦ ᓴᓇᐅᒐᓕᐅᖅᑎᑦ ᑲᑎᒪᔨᖏᓐᓂ ᑲᑎᒪᔨᐅᖃᑕᐅᓕᓚᐅᕐᓯᒪᒐᒥ ᐋᒐᔅᑎ, 2021-ᒥ.

ᔨᒥ ᑰᓂᓘᓯ ᐃᖅᑲᓇᐃᔭᖅᐳᖅ ᐃᓴᕈᐃᑦ ᓴᓇᐅᒐᓕᐅᕐᕕᖓᓂ, ᐸᓚᐅᒐᔾᔨᐅᖅᐸᒃᖢᓂᓗ ᐳᓛᕐᕕᖕᒥ.

ᔩᓂ ᒥᑦᑎᒪᑕᓕᖕᒥᐅᑕᒃᓴᔭᐅᕗᖅ, ᒥᕐᓱᕐᓂᕐᒧ ᐱᓕᕆᐊᓂ ᑐᑭᒧᐊᒃᑎᑦᑎᔨᑉ ᐃᓇᖏᖅᑎᒋᓯᒪᔭᖓᓐ ᑕᐃᒪᓐᖓᓐ ᐄᑉᕈ, 2025ᒥ 

ᔩᓇ ᐃᖄᓕᒃ ᐃᖃᓗᖕᓂ ᐃᓅᓚᐅᖅᐳᖅ ᑲᔾᔮᕐᓇᓪᓚᕆᒃᑐᒥᒡᓗ ᕿᑭᖅᑕᕐᔪᐊᕐᒥ ᐱᕈᕐᓴᓚᐅᕐᖢᓂ. ᒫᓐᓇᐅᔪᖅ ᑐᓐᖓᓱᒃᑎᑦᑎᓂᕐᒧ ᑐᑭᒧᐊᒃᑎᑦᑎᔨᐅᕗᖅ ᐃᓴᕈᐃᒃᑯᓐᓂ, ᐃᑲᔪᕐᓱᐃᔨᐅᖃᑕᐅᓪᓗᓂ ᐃᓄᖕᓂ ᐅᑭᐅᖅᑕᖅᑐᒥᐅᑕᓂᒡᓗ ᖃᓪᓗᓈᓃᑦᑐᓂ. ᔩᓇ ᑕᐃᒪᓐᖓᓂ ᐱᓕᕇᓐᓇᕆᐊᒃᓴᖅ ᖁᕕᐊᒋᕙᖓ, ᐱᓗᐊᖅᑐᒥ ᐊᓯᒥᓂ ᐃᑲᔪᕈᓐᓇᕌᖓᒥ. ᓲᕐᓗ ᐆᒃᑑᑎᒋᓗᒍ, ᑲᓇᐃᑎᐅᓐ ᓄᐊᑦᑯᓐᓄ ᖃᖓᑕᓲᓕᕆᔨᒃᑯᓐᓂ ᐃᖅᑲᓇᐃᔭᖅᑎᓪᓗᒍ ᑲᒪᒋᔭᖃᖅᐸᓚᐅᖅᐳᖅ ᐊᑦᑕᕐᓇᖅᑕᐃᓕᔭᕆᐊᖃᕐᓂᕐᒥᒃ ᐅᔾᔨᕐᓱᕆᐊᖃᕐᓂᕐᒥᒡᓗ, ᐊᔪᕈᓐᓃᕐᓴᒃᑲᓐᓂᕈᑎᒋᓪᓗᓂᒋᓪᓗ ᑎᑎᕋᕐᓂᐊᕐᕕᓕᕆᓂᕐᒥᒃ, ᑐᑭᒧᐊᒃᑎᑦᑎᓂᕐᒥᒃ, ᐊᒻᒪ ᑐᓴᐅᒪᔪᓕᕆᓂᕐᒥᒃ.

ᖃᓪᓗᓈᓂ ᐱᓕᕆᐊᖏᓐᓂ, ᓴᓐᖏᔪᒥ ᐊᔭᐅᕆᔨᐅᓕᖅᐳᖅ ᓂᕿᓕᕆᓂᕐᒧ ᐊᑐᐊᒐᕆᔭᐅᔪᓂ ᐃᓄᖕᓄ ᑲᑦᑐᕈᑕᐅᔭᑦᑐᑦ ᐃᑲᔪᕐᓱᐃᔾᔪᑕᐅᓯᒪᓐᖏᓗᐊᕐᓂᖏᓐᓄ ᐊᑭᕋᖅᑐᕐᖢᓂ ᐃᑲᔪᕐᓱᐃᔾᔪᑕᐅᓯᒪᓐᖏᓐᓂᖏᓐᓄ ᐃᓄᐃᑦ ᖃᓄᐃᓐᖏᑦᑎᐊᕈᑎᖏᓐᓄ, ᐃᑲᔪᕐᓱᐃᓪᓗᓂᓗ ᐃᓄᐃᑦ ᐊᑐᐊᒐᖏᓐᓂ ᐃᓄᐃᑦ ᓂᕿᖏᓐ ᐊᑐᐃᓐᓇᐅᓂᕐᓴᐅᓕᕈᓐᓇᖁᓪᓗᒋᓐ. ᐊᒡᓛᓪᓘᓐᓃᓐ ᖁᕕᐊᒋᓂᖅᐹᕆᕙᖓ ᓂᕿᓪᓚᑦᑖᓂ ᐊᒥᖅᑳᖃᑦᑕᕆᐊᒃᓴᖅ ᐱᓗᐊᖅᑐᒥ ᐱᕕᑭᓐᓂᕐᓴᐅᕙᒃᑐᓄ. ᖃᓪᓗᓈᓂᕐᒥᐅᑕᐅᓪᓗᓂ ᖃᐅᔨᒪᒐᒥ ᓂᕿᓪᓚᑦᑖᖅᑐᕆᐊᒃᓴᖅ ᐱᔭᕆᑐᕙᖕᓂᖓᓄᓐ, ᑕᐃᒪᐃᓐᓂᖓᓄᓪᓗ ᓯᕗᓪᓕᐅᑎᑦᑎᕗᖅ ᓂᕿᓪᓚᑦᑖᓂᓐᖔᖅᑐᓂ ᓂᕐᖠᐅᖃᑦᑕᕆᐊᒃᓴᖅ ᐃᖢᕐᕆᓐᓇᕐᓂᖏᓐᓄ, ᐃᖅᑲᕐᓇᕐᓂᖏᓐᓄ, ᐊᒻᒪ ᐊᖏᕐᕋᒧ ᐃᖅᑲᐃᓯᓐᓇᕐᓂᖓᓄ.

ᖁᕕᐊᒋᓂᖅᐹᕆᓯᒪᔭᖓ ᐃᓄᒋᐊᕌᓗᖕᓄ ᓂᕿᓪᓚᑦᑖᓂ ᓂᕐᖠᐅᕈᔾᔨᑎᓪᓗᒍ ᓄᓇᖅᑲᑎᒌᓂ. ᖁᕕᐊᓇᓪᓚᕆᓚᐅᖅᐳᖅ ᐅᓄᖅᑐᓐ ᑭᒃᑯᑐᐃᓐᓇ ᓂᕿᓪᓚᑦᑖᓂ ᓂᕆᖃᑎᒌᒋᐊᖅᑐᒐᓇᒃᑎᓪᓗᒋᓐ, ᐅᖃᖃᑎᒌᒐᓇᒃᖢᑎᓐ, ᐃᓄᐃᓪᓗ ᐃᓕᖅᑯᓯᑐᖃᖏᓐᓂ ᐃᒃᐱᒍᓱᓪᓚᕆᒃᖢᑎᓐ. ᐊᓯᒥᓂ ᓂᕆᑎᑦᑎᔭᕆᐊᒃᓴᖅ, ᐱᓗᐊᖅᑐᒥ ᐃᖅᑲᐅᒪᑎᓪᓗᒋᑦ ᐊᖏᕐᕋᒥᓂ ᓂᕆᕙᒃᑕᕋᓗᐊᒥᓂ, ᖁᕕᐊᒋᓪᓚᕆᒃᐸᖓ. ᔩᓇᒧᓐ, ᓂᕿᓪᓚᑦᑖᓐ ᐃᓅᓕᓴᐅᑎᑐᐃᓐᓇᐅᓐᖏᓚᓐ – ᓇᒡᓕᖕᓂᕐᒧ, ᐱᖅᑯᓯᑐᖃᕐᓄ, ᑲᑎᖃᑎᒌᖕᓂᕐᒧᓪᓗ ᐱᔾᔪᑎᖃᐅᓪᓚᕆᒃᐳᓐ. ᐱᓂᐊᖅᑐᓄ ᐸᕐᓇᒃᐸᓪᓕᐊᑎᓪᓗᒍ, ᓄᓇᓕᖕᒥ ᐱᓕᕆᐊᓂ ᐃᑲᔪᕐᓱᐃᑎᓪᓗᒍ, ᐅᕝᕙᓘᓐᓃ ᐊᓯᒥᓂ ᓂᕐᖠᐅᕈᔾᔨᑎᓪᓗᒍ, ᐱᒃᑯᓕᓪᓚᕆᒃᐳᖅ ᐅᑎᖅᑎᑦᑎᐊᕐᔪᒍᓐᓇᕋᒥ ᐃᒃᐱᒍᓱᑦᑎᐊᖅᑐᒥ ᑕᒪᐃᓐᓂ ᐅᕙᑦᑎᓐᓂ ᐃᓅᓪᓗᑕ.

ᔩᓇ ᒫᓐᓇᐅᔪᖅ ᐃᓴᕈᐃᒃᑯᓐᓂ ᑐᓐᖓᓱᒃᑎᑦᑎᓂᕐᒧ ᑐᑭᒧᐊᒃᑎᑦᑎᔨᐅᕗᖅ ᐳᓛᕐᕕᑦᑎᓐᓂ, ᐃᖕᒥᖕᓂᒃ ᐃᖅᑲᓇᐃᔭᖃᑎᖏᓪᓗ ᐳᓛᕆᐊᖅᑐᓂ ᓂᕆᔭᒃᓴᖃᖅᑎᑦᑎᔨᐅᓪᓗᑎᓐ ᐃᖢᕐᕆᑦᑎᐊᖅᑐᓕᕆᔨᐅᓪᓗᑎᒡᓗ ᐅᓪᓗᑐᐃᓐᓇᑕᒫᓐ.

ᐃᓐᓇᕆᔭᕐᖓᐅᑕᖅ ᖃᐅᔨᒪᔨ

ᔫᓱᐊ ᑲᐅᑕᖅ ᐃᓪᓚᐅᖅ ᖃᒻᒪᕐᒥ ᐃᓅᓂᑰᕗᖅ ᒥᑦᑎᒪᑕᓕᖕᒥ ᑎᓴᒻᐸᐅ ᓄᓐᖑᐊᓂ. ᑕᐃᒪᓐᖓᓂ ᐊᓂᒎᔾᔨᓯᒪᐅᖅᐳᖅ. ᐊᓈᓇᑦᑎᐊᒥᓄ ᑲᓇᖕᓇᕐᒧ ᐱᕈᕐᓴᔭᐅᓪᓗᓂ ᖃᑕᓐᖑᑎᒌᓐ ᓄᓇᒋᔭᖓᓐᓂ, ᐃᓄᒃᑎᑐ ᐅᖃᓪᓚᐃᓐᓇᕐᖢᓂ ᐱᖅᑯᓯᖃᐃᓐᓇᕐᖢᓂᓗ ᐊᖑᑦᑎᔾᔪᓯᖃᐅᕐᖢᓂᓗ ᐱᕈᕐᓴᓚᐅᖅᐳᖅ ᓄᑕᕋᐅᓪᓗᓂ ᒪᒃᑯᒃᑎᓪᓗᒍᓗ. ᒪᒃᑯᒃᓯᑎᓪᓗᒍ 16-ᖑᓚᐅᖅᑎᓐᓇᒍᓗ ᓯᕗᓪᓕᕐᓂ ᕿᒧᒃᓯᖃᓕᓚᐅᖅᐳᖅ ᐃᓄᑑᓪᓗᓂ ᕿᒻᒥᖏᓪᓗ ᐊᖑᑦᑎᕙᓕᕐᖢᓂ. ᐊᖑᑦᑎᓂᕐᒧᑦ ᐃᓅᓇᓱᐊᕈᓐᓇᕐᓂᕐᒧᓪᓗ ᐊᔪᓐᖏᓐᓂᕆᔭᖏᓐ ᐊᓈᓇᑦᑎᐊᕐᒥᓂ ᐃᓕᓯᒪᐅᖅᐸᖏᓐ , ᐊᖓᒃ/ᐊᒃᑲᒃᑯᒥᓂ ᐊᒻᒪ ᐊᓯᖏᓐᓂ ᐃᓚᒋᔭᒥᓂ. ᐅᕐᓱᐊᓗᖕᓂᐊᖅᑎᓂ ᐃᐊᒻᒪᓐᑕᓐᒥ (Edmonton) ᓇᖕᒥᓂᕆᔭᐅᔪᒥ, ᐹᓐ ᐋᑎᒃᑯᓐᓂ (Pan Arctic) ᐃᖅᑲᓇᐃᔭᒃᓲᔭᓚᐅᕐᖢᓂ ᓇᓂᓯᕕᖕᓄᐊᓚᐅᕐᓯᒪᕗᖅ ᐅᔭᕋᖕᓂᐊᕐᕕᖕᒥ ᓄᓇᒃᑰᕈᑎᕐᔪᐊᕐᓂ ᐊᐅᓚᐅᑎᓕᕆᔨᐅᓪᓗᓂ ᐊᖁᑎᐅᓪᓗᓂᓗ. ᓄᓇᐃᓐᓇᒃᑰᓕᓂᖓᓄ ᐊᖁᑎᓪᓚᕆᐅᓕᓚᐅᖅᐳᖅ ᐱᓕᒻᒪᒃᓴᐃᑎᑦᑎᕙᒃᖢᓂ ᓄᓇᒃᑰᕆᑎᕐᔪᐊᓂᒡᓗ ᐊᖁᑎᓄ ᐅᔭᕋᖕᓂᐊᖅᑎᓄᓪᓗ ᐃᓱᒪᑕᐅᓪᓗᓂ. ᕿᑐᕐᖓᕐᒥᓂᒃ ᐱᐊᓐᒥᒃ ᐊᓕᖅᑲᒥᒡᓗ ᓄᓇᒥ ᖃᐅᔨᒪᔭᕆᐊᖃᖅᑕᒥᓂ ᖃᐅᔨᒪᔭᓕᒫᖏᓐᓂᒃ ᐃᓕᓐᓂᐊᖅᑎᑦᑎᓚᐅᖅᐳᖅ. ᖁᓪᓕᒃᑯᓐᓂ ᐊᐅᓪᓛᖅᑎᑦᑎᔨᓂ ᐊᖓᔪᖅᑳᖑᓚᐅᖅᐳᖅ ᐊᐅᓪᓛᖅᑎᑦᑎᔨᕐᖓᐅᑕᐅᓪᓗᓂᓗ 1990-ᒥ 2002ᒧ ᐊᒻᒪ ᐊᐱᑕᒃᑯᓐᓂ ᐱᕙᓪᓕᐊᔪᓕᕆᓂᕐᒧ ᑎᒥᐅᔪᒥ ᐊᖓᔪᖅᑳᖑᓚᐅᕐᖢᓂ ᑲᖏᖅᑐᒑᐱᒃ, ᓄᓇᕗᒻᒥ. ᔫᓱᐊ ᐱᔭᕆᑐᔪᓂ ᐊᓂᒎᔾᔨᓯᒪᐅᑐᐃᓐᓇᕋᓂ, ᓲᕐᓗ ᐅᒥᐊᒃᑯᑦ ᓇᖏᐊᕐᓇᖅᑐᒃᑰᓚᐅᕐᓯᒪᔪᓂ ᐊᓯᖏᓐᓂᒡᓗ ᓄᓇᐃᓐᓇᕐᒥ ᐊᒃᓱᕈᕐᓇᖅᑐᒃᑰᖃᑦᑕᕐᓯᒪᐅᖅᐳᖅ, ᑭᓯᐊᓂᑦᑕᐅᖅ ᐃᓅᓯᕐᒥᓂ ᐃᓅᓯᖃᑦᑎᐊᕐᓂᕐᒥᒃ ᐃᓕᓐᓂᐊᕐᓯᒪᐅᖅᐳᖅ ᑲᑦᑐᕈᑕᐅᔭᑦᑐᖃᐅᕋᓗᐊᖅᑎᓪᓗᒍ ᖃᓪᓗᓈᓃᑎᓪᓗᒍ. ᔫᓱᐊ ᐅᖃᐅᓯᖅᑕᓂ ᐃᓕᖅᑯᓯᑐᖃᕐᓂᓗ ᐃᖅᑲᐅᒪᔭᒥᓂ ᖃᐅᔨᒪᔭᒥᓂᓗ ᐊᑐᐃᓐᓇᓪᓚᕆᒃᓯᒪᕗᖅ ᐊᑯᓂᐅᔪᖅ ᐱᒐᔪᒃᖢᓂ ᐃᓅᓯᖃᖅᑎᓪᓗᒍ ᑕᒪᒃᑯᓂᖓᓗ ᖃᐅᔨᒪᐅᕐᓂᕆᔭᒥᓂ ᖃᐅᑕᒫᑦᑎᐊᖅ ᐃᓴᕈᐃᒃᑯᑦ ᐃᓄᐃᑦ ᓴᓇᐅᒐᓕᐅᖅᑎᖏᓐᓂ ᐃᓐᓇᖅᑕᕆᔭᐅᖃᑕᐅᓪᓗᓂ. ᔫᓱᐊ ᐅᖃᓪᓚᒃᑎᓪᓗᐊᑕᐅᕙᒃᐳᖅ ᐃᓄᐃᓐ ᐃᓐᓇᐃᓐ ᓴᓇᐅᒐᓕᐅᖅᑎᓐ ᖃᐅᔨᓇᓱᐊᕈᑕᐅᕙᒃᑐᓂ ᐊᐃᑉᐱᑕᒫᓐ ᐅᓐᓄᒃᓴᒃᑯᓐ.

ᔭᕉᒻ ᐃᓴᕈᐃᒃᑯᓐᓄᐊᖅᐸᓕᓚᐅᖅᐳᖅ ᐃᓄᓪᓚᕆᖕᓂ ᐃᓅᖃᑎᖃᑲᑕᒋᐊᖅᑐᖅᐸᒃᖢᓂ, ᐊᒻᒪ ᐳᑭᖅᑕᓕᐅᓂᕐᒥ ᐃᓕᓐᓂᐊᕐᓂᖃᓚᐅᑲᒃᖢᓂ ᐋᓪᒑᓐᑯᐃᓐ (Algonquin) ᓯᓚᑦᑐᕐᓴᕐᕕᖓᓂ ᐃᓴᕈᐃᒃᑯᓐᓂ ᖃᐅᔨᓴᖅᑎᒋᔭᐅᓕᓚᐅᖅᐳᖅ. ᐅᐱᒋᓪᓚᕆᒃᐸᕗᓐ ᑲᒪᑦᑎᐊᕈᒪᓂᖓᓄᓐ ᖃᐃᕙᒃᑐᓂ ᐃᖅᑲᓇᐃᔭᖅᑎᓂᒡᓗ. ᔭᕉᒻᑕᐅᖅ ᒪᒃᑯᒃᑐᓄ ᐃᓄᖕᓄ ᕿᑎᒍᓯᕐᓄ ᐱᓕᕆᐊᖃᖅᑎᐅᒋᕗᖅ ᐱᖓᔪᐊᓐᓂᑕᒫᓐ ᐅᓐᓄᒃᓴᒃᑯᓐ.

ᔮᑭ ᐃᓴᕈᐃᒃᑯᓐᓂ ᐃᖅᑲᓇᐃᔭᓯᒋᐊᓚᐅᖅᐳᖅ ᓴᓇᐅᒐᓕᐅᖅᑎᐅᓪᓗᓂ ᐱᐅᓴᕐᓯᒪᔪᓂᒡᓗ ᐅᓗᓕᐅᖅᑎᐅᓪᓗᓂ. ᔮᓄᐊᕆᒥ ᓴᓇᐅᒐᓕᐅᕐᕕᕗᓐ ᒪᑐᓯᒪᑎᓪᓗᒍ, ᒥᖑᐊᖃᑦᑕᓕᓚᐅᖅᐳᖅ ᑎᑎᕋᐅᔭᕐᓯᒪᔪᓕᕆᕙᓕᕐᖢᓂᓗ. ᔮᑭ ᒫᓐᓇᐅᔪᖅ ᐃᓴᕈᐃᒃᑯᓐᓂ ᒥᖑᐊᖅᑎᐅᕗᖅ ᑎᑎᕋᐅᔭᕐᓯᒪᔪᓕᕆᔨᐅᓪᓗᓂᓗ.

ᕉᐱᓐ ᖁᒪᖔᐱᒃ ᒥᑦᑎᒪᑕᓕᐅᒻ ᖃᓂᒋᔮᓂ ᕿᑭᖅᑖᓗᒃ, ᓄᓇᕗᒻᒥ ᐃᓅᓂᑰᕗᖅ ᐱᕈᕐᓴᓂᑰᓪᓗᓂᓗ. ᖃᑕᓐᖑᑎᒌᖑᓪᓗᑎᓐ ᐊᐅᓪᓛᕐᓯᒪᐃᓐᓇᖅᐸᓚᐅᖅᐳᓐ, ᕉᐸᓐ ᐊᓈᓇᑦᑎᐊᒃᑯᒥᓂ ᐱᕈᕐᓴᓚᐅᕋᒥ. ᕉᐱᓐ ᐊᖑᓇᓱᖕᓂᕐᒥ ᓴᓇᐅᒐᓕᐅᕐᓂᕐᒥ ᓄᑕᕋᐅᓪᓗᓂ ᐃᓕᑦᑎᕙᓪᓕᐊᓕᓄᓚᐅᖅᐳᖅ. ᐃᓕᓐᓂᐊᕐᓂᕐᒥᒃ ᐱᒻᒪᕆᐅᒍᓱᓐᖏᒃᑲᓗᐊᖅᑎᓪᓗᒍ, ᕉᐱᓐ ᓄᓇᕗᑦ ᓯᓚᑦᑐᕐᓴᕐᕕᒡᔪᐊᖓᓂ ᐃᖃᓗᖕᓂ ᐃᖅᑲᓇᐃᔭᓕᓚᐅᖅᐳᖅ 20-ᓂᒐᓚᒃ ᐅᑭᐅᖃᓕᖅᑎᓪᓗᒍ ᐱᐅᓴᐅᑎᕈᔪᖕᓂ ᓴᓇᐅᒐᓕᐅᕐᓂᕐᒧ ᐃᓕᓴᐃᔨᐅᓪᓗᓂ. ᑕᒪᓐᓇ ᐊᑐᕐᖢᓂᐅᒃ ᕉᐱᓐ ᐊᔾᔨᒌᓐᖏᑦᑑᑎᓂ ᓴᓇᐅᒐᓕᐅᖃᑦᑕᓕᓚᐅᖅᐳᖅ ᑲᓇᑕᓕᒫᒥ ᐱᓕᕆᐊᖑᕙᒃᑐᓂ, ᓄᓇᕐᔪᐊᕐᒥᐅᓄᓪᓗ ᖃᐅᔨᒪᔭᐅᓕᕐᖢᓂ ᐊᔾᔨᒌᓐᖏᑦᑐᓂ ᐊᔾᔨᐅᓐᖏᑦᑐᓂᒡᓗ ᓴᓇᐅᒐᓕᐅᖅᑎᐅᓂᖓᓐᓄ ᐃᓄᐃᑦ ᐃᓕᖅᑯᓯᑐᖃᖏᓐᓂ ᑐᓐᖓᕕᖃᐅᖅᑐᓂ, ᑕᕐᕆᔭᐅᓯᐅᕐᓂᕐᒥ, ᓴᓇᐅᒐᓕᐅᕐᓂᕐᒥ, ᑐᓴᕐᓈᒐᓕᐅᕐᓂᕐᒥ ᐊᒻᒪ ᖃᓄᑐᐃᓐᓇᖅ ᓴᓇᔭᒃᓴᒥ ᓴᖅᑭᕝᕕᐅᒍᓂ. ᖃ ᖓᑦᑎᐊᓵᖅ ᕉᐱᓐ ᐱᖃᓐᓇᕆᔭᖓᓪᓗ ᐱᒋᐊᖅᑎᑦᑎᓚᐅᖅᐳᑦ  Reconseal ᐃᓄᒃᓯᐅᑎᓂ, ᐃᓕᖅᑯᓯᖃᖃᑎᒌᓐᖏᑦᑑᑎᓄ ᓇᑦᑎᕐᓯᐅᕐᓂᕐᒧ ᐱᓕᕆᐊᕆᔭᖏᓐᓂ ᓇᑦᑎᓐ ᓂᕿᖏᓐᓂ ᕿᓯᖏᓐᓂᒡᓗ ᐃᓄᖕᓄ ᖃᓪᓗᓈᓃᑦᑐᓄ ᑐᕌᖓᓪᓗᓂ. ᕉᐱᓐ ᐃᓴᕈᐃᑦ ᐃᓄᐃᑦ ᓴᓇᐅᒐᓕᐅᖅᑎᑦ ᑲᑎᒪᔨᖏᓐᓄ ᐃᓚᒋᔭᐅᓕᓚᐅᖅᐳᖅ 2022ᖑᑎᓪᓗᒍ ᑲᑎᒪᔨᐅᖃᑕᐅᖏᓐᓇᓚᐅᕐᖢᓂᓗ ᔮᓄᐊᕆ 2025ᒧ ᑎᑭᖦᖢᒍ.

ᕼᐃᔅᕋᓐ ᐃᓴᕈᐃᒃᑯᓐᓂ ᐃᖅᑲᓇᐃᔭᓚᐅᑲᒃᐸᓚᐅᖅᐳᖅ ᕿᑎᒃᑐᓂ ᐃᑲᔪᖅᑎᐅᓪᓗᓂ ᓂᕐᖠᐅᕐᕕᖕᒥᓗ ᖃᓄᑐᐃᓐᓇᖅ ᐱᔪᖃᖅᑎᓪᓗᒍ. ᕼᐃᔅᕋᓐ ᓂᕐᖠᐅᖅᑎᒻᒪᕆᓐᖑᕆᐅᕐᓴᕗᖅ – ᑎᔅᓯᓇᒃᑲᐅᓪᓗᓂᓗ – ᑕᒪᐃᓐᓂ ᖁᕕᐊᒋᔭᐅᓪᓚᕆᒃᑐᓐ ᐃᖅᑲᓇᐅᔭᖅᑎᓄ ᖃᐃᕙᒃᑐᓄᓪᓗ.