ᐊᐅᓚᑦᑎᓂᖅ ᓯᕗᓕᐅᖅᑎᐅᓂᕐᓗ

ᐱᓕ ᒥᖅᑯᓵᖅ ᐊᓈᓇᑦᑎᐊᒃᑯᒥᓂ ᐱᕈᕐᓴᓚᐅᖅᐳᖅ ᒥᑦᑎᒪᑕᓕᒃ, ᕿᑭᖅᑖᓗᒃ ᓄᓇᕗᒻᒥ. ᓄᑕᕋᐅᓪᓗᓂ ᓄᓇᐃᓐᓇᕐᒧ ᐊᐅᓪᓚᑲᑕᒃᐸᓚᐅᕐᖢᓂ, ᐱᓕ ᓄᓇᒥᒃ ᓄᓇᒥᐅᑕᕐᓂᒡᓗ ᐃᓄᐃᓪᓗ ᐃᓕᖅᑯᓯᑐᖃᖏᓐᓂ ᖃᐅᔨᒪᓂᖃᐅᓪᓚᕆᒃᐸᓪᓕᐊᓕᓚᐅᖅᐳᖅ ᒪᒃᑯᒃᖢᓂ, ᐊᑕᐅᑦᑎᒃᑯᓪᓗ ᐃᓕᓐᓂᐊᕐᓂᖅᑖᕐᖢᓂ ᖁᓕᓂ. ᐱᓕ ᑎᑎᕋᐅᔭᖅᐸᓕᓚᐅᖅᐳᖅ ᓴᐅᓂᕐᓂᒡᓗ ᓴᓇᐅᒐᖅᐸᓕᕐᖢᓂ, ᐅᒃᑯᓯᒃᓴᓂ ᑐᒑᕐᓂᒡᓗ ᒪᒃᑯᒃᑎᓪᓗᒍ ᓱᓕ, ᒫᓐᓇᐅᔪᖅ ᖃᐅᔨᒪᔭᐅᑦᑎᐊᕐᖢᓂ ᐊᔪᓐᖏᓐᓂᖃᐅᑦᑎᐊᕐᖢᓂᓗ ᓴᓇᐅᒐᓕᐅᖅᑎᐅᕗᖅ ᓴᓇᕙᒃᑕᖏ ᑕᒪᐃᓐᓂ ᑲᓇᑕᓕᒫᒥ ᓄᓇᕐᔪᐊᕐᒥᓗ ᐱᔭᐅᔪᒪᕙᒃᖢᑎᓐ. ᐱᓕ ᐃᓄᖕᓂ ᓴᓇᐅᒐᓕᐅᖅᑎᓂ ᐱᕙᓪᓕᐊᓂᖃᖁᔨᑦᑎᐊᖅᐳᖅ. ᑭᖑᓂᐊᒍᑦ NACCA-ᑯᓐᓂ ᑲᑎᒪᔨᐅᖃᑕᐅᓚᐅᕐᖢᓂ, ᐃᓴᕈᐃᒃᑯᓐᓂ ᓴᓇᐅᒐᓕᐅᖅᑎᑦ ᑲᑎᒪᔨᖏᓐᓂ ᐱᓕᕆᐊᖃᖃᑎᖅᐸᒃᐳᖅ, ᓴᖅᑭᑎᑦᑎᕙᒃᖢᓂ ᐃᓄᖕᓄ ᐅᑭᐅᖅᑕᖅᑐᒥᐅᓄ ᑲᑦᑐᕈᑕᐅᔭᑦᑐᓂ ᐱᔭᐅᔭᕆᐊᖃᖅᑐᓂᒡᓗ. ᐱᓕ ᓱᓕ ᒥᑦᑎᒪᑕᓕᖕᒥᐅᑕᐅᖏᓐᓇᖅᐳᖅ ᖃᑕᓐᖑᑎᖏᓪᓗ. ᓄᓇᐃᓐᓇᕐᒥ ᐃᖃᓪᓕᐊᕐᓯᒪᓐᖏᑦᑕᕌᖓᓐ ᐊᖑᑦᑎᒋᐊᕐᓯᒪᓐᖏᑦᑕᕌᖓᓪᓘᓐᓃᓐ ᐅᕝᕙᓘᓐᓃ ᐊᓯᖏᓐᓂ ᓄᓇᕗᒻᒥ ᑲᑎᒪᔨᐊᓛᓂ ᑲᑎᒪᖃᑕᐅᓐᖏᒃᑯᓂ, ᑐᓐᖓᓱᒃᑎᑕᐅᕙᒃᐳᖅ ᑲᑎᒪᔪᓄ.

ᑖᓇᕙᓐ ᒍᐊᑕᓐ-ᑐᑐ ᐃᓕᓐᓂᐊᕐᓂᖓᓂ ᐊᕐᕌᒍᖓᓂ ᐱᖓᔪᒋᔭᖓᓃᓕᖅᐳᖅ. ᑖᓇᕙᓐ ᐱᕈᕐᓴᓚᐅᖅᐳᖅ ᑲᖏᕐᖠᓂᕐᒥ, ᐅᑭᐅᖑᑎᓪᓗᒍ ᐃᓕᓐᓂᐊᖅᐸᒃᖢᓂ, ᐅᒥᐊᖅᑐᕆᐊᖅᐸᒃᖢᓂ ᐊᐅᓪᓛᑲᑕᒃᐸᒃᖢᓂᓗ ᐊᐅᔭᒃᑯᓐ ᐊᑖᑕᖓᓗ ᐃᓚᒌᒐᓇᐃᓪᓗ ᑕᒪᒃᑭᒃ. ᐅᒥᐊᖅᑐᖅᐸᖕᓂᖅ ᐃᖃᓪᓕᐊᖅᐸᖕᓂᕐᓗ ᓱᓕ ᑖᓇᕙᓐ ᖁᕕᐊᒋᓂᖅᐹᕆᒋᕙᖏᑦ. ᒪᒃᑯᒃᑐᓄ ᖁᕝᕙᓯᖕᓂᕐᓴᓂ ᐃᓕᓐᓂᐊᕌᓂᒃᓯᓚᐅᖅᑳᕐᖢᓂ ᓄᓇᕗᑦ ᓯᕗᓂᒃᓴᕗᒃᑯᓐᓂ ᐋᑐᐋᒥ ᐃᓕᓐᓂᐊᓚᐅᕆᕗᖅ ᐊᕐᕌᒍᖕᓄ ᒪᕐᕉᖕᓄ , ᐊᓱᐃᓛᒃ ᑳᕈᑕᓐ ᓯᓚᑦᑐᒃᓴᕐᕕᒡᔪᐊᖓᓂ (Carleton University) ᓄᓇᖃᖅᑳᕐᓯᒪᔪᓄ ᐃᑲᔪᕐᓱᐃᔾᔪᑎᓂ ᐃᓕᓐᓂᐊᕐᓂᖃᓕᓚᐅᖅᐳᖅ, ᐊᕐᕌᒍᓚᐅᓐᖏᑎᓪᓗᒍᓘᓐᓃᑦ ᓴᓇᐅᒐᓕᐅᖅᐸᖕᓂᕐᒥ ᐃᓕᓐᓂᐊᖅᑎᒻᒪᕆᐅᓕᓚᐅᕐᖢᓂ. ᑖᓇᕙᓐ ᐊᓱᐃᓛᒃ ᐃᓄᖕᓄ ᒪᒃᑯᒃᑐᓄ ᓯᕗᓕᐅᖅᑎᐅᓂᕐᒥ ᐱᓕᕆᐊᖃᓕᓚᐅᕆᕗᖅ ᐊᐅᔭᐅᑎᓪᓗᒍ ᐃᓄᐃᑦ ᑕᐱᕇᑦ ᑲᓇᑕᒃᑯᓐᓂ ᐊᒻᒪᓗ ᐃᖅᑲᓇᐃᔭᖅᑎᒻᒪᕆᓐᖑᕐᖢᓂ ᐊᑐᐊᒐᕐᓂ ᕿᒥᕐᕈᔨᓐᖑᕐᖢᓂ ᑭᖑᓂᑦᑎᐊᖓᒍᓐ. ᑖᓇᕙᓐ ᖁᕕᐊᒋᕙᖓ ᐋᑐᐋᒥᐅᑕᐅᔭᕆᐊᒃᓴᖅ, ᐱᓗᐊᖅᑐᒥ ᐋᑐᐋᒥᐅᓂ ᐃᓄᖕᓂ ᓄᓇᖅᑲᑎᖃᕐᓂᕐᓴᐅᓕᖅᑎᓪᓗᒍ. ᖃᐅᔨᕙᒃᐳᖅ ᐃᓴᕈᐃᒃᑯᓐᓄᐊᖅᐸᒃᖢᓂ ᐃᓄᖕᓂ ᓄᓇᖅᑲᑎᖃᐅᖅᐸᒃᖢᓂ ᐃᓄᐃᑦ ᓄᓇᖏᓐᓂ ᐃᓅᓯᕆᔭᐅᔪᑦ ᐃᓕᓐᖓᓂᖃᕐᓂᕐᓴᐅᔪᓐᓇᖅᐸᒃᐳᖅ ᖃᐅᔨᒪᑦᑎᐊᖏᓐᓇᕈᓐᓇᕐᖢᓂᓗ ᐃᓄᓪᓚᕆᐅᓂᕐᒥᓄᑦ. ᐃᓴᕈᐃᒃᑯᑦᑕᐅᖅ ᐃᑲᔪᕐᓂᑲᖅᖃᖅᐸᒃᑭᕗᑦ ᓂᐱᑖᕐᕕᒋᔭᕆᐊᒃᓴᖅ ᐃᓄᖕᓂ ᑭᒡᒐᖅᑐᐃᔭᕆᐊᖃᖅᐸᒃᑎᓪᓗᒍ, ᐃᓕᖅᑯᓯᑐᖃᓕᕆᓂᕐᒥᒃ, ᐃᓄᐃᑦ ᕿᑎᒍᓯᖏᓐᓂ ᐊᒻᒪ ᐃᓄᐃᑦ ᓴᓇᕐᕈᑎᖏᓐᓂ ᑎᑎᕋᐅᔭᕈᓯᖏᓐᓂᒡᓗ ᓴᓇᕙᖕᓂᕐᒥᒃ, ᑕᒪᒃᑯᓂᖓ ᐃᓅᓇᓱᐊᕈᑕᐅᔪᓐᓇᕐᓂᖏᓐᓄ.

ᓇᑖᓴ ᓛᑦᕆᐅᓪ ᐃᒃᓯᕙᐅᑕᕆᔭᐅᕗᖅ ᐃᓴᕈᐃᒃᑯᓐᓂ ᐃᓄᖕᓄ ᓴᓇᐅᒐᓕᐅᖅᑐᓕᕆᔨᓄ: ᐱᔪᓐᓇᕐᓂᕗᑦ ᑲᑎᒪᔨᖏᓐᓂ. ᓯᕗᓪᓕᕐᒥ ᑲᑎᒪᔨᓄ ᐃᒃᓯᕙᐅᑕᓐᖑᓚᐅᖅᐳᖅ ᐊᕐᕌᒍᑕᒫᕐᓯᐅᒻᒥ ᑲᑎᒪᕐᔪᐊᖅᑎᓪᓗᒋᓐ ᔮᓄᐊᕆ 2021ᒥ, ᓇᑖᓴ ᐃᓴᕈᐃᒃᑯᓐᓄᐊᖅᐳᖅ ᐊᕐᕌᒍᓄ 15-ᓄ ᑎᑎᕋᕐᕕᖕᒥ ᑲᒪᔨᐅᓚᐅᖅᐳᖅ ᐱᓕᕆᐊᓂᒡᓗ ᑐᑭᒧᐊᒃᑎᑦᑎᔨᐅᓚᐅᕐᖢᓂ ᑲᓇᑕᒥᐅᓂ ᑭᒡᒐᖅᑐᐃᔪᓂ ᐃᓄᐃᓐ ᓄᓇᕐᔪᐊᕐᒥᐅᓐ ᑲᑎᒪᔨᕐᔪᐊᖏᓐᓂ, ᑕᐃᑲᓃᑎᓪᓗᒍ ᓄᓇᕐᔪᐊᑉ ᐅᑭᐅᖅᑕᖅᑐᖅᐸᓯᖏᓐᓄᐊᖅᐸᓚᐅᖅᐳᖅ ᐃᓄᖕᓂ ᑭᒡᒐᖅᑐᐃᓪᓗᓂ ᓄᓇᕐᔪᐊᕐᒥᐅᓄ. ᖃᓪᓗᓈᓂ ᐊᑕᐅᓯᐅᓐᖏᑦᑐᓂ ᑎᑎᕋᕐᕕᖕᓂ ᐊᐅᓚᑦᑎᔨᐅᖃᑦᑕᕐᓯᒪᓪᓗᓂ ᓂᐅᕕᕐᕕᕈᔪᖕᓂ, ᒫᓐᓇᐅᔪᖅ ᓇᑖᓴ ᓇᓯᑦᑐᒃᑯᑦ ᑯᐊᐸᓖᓴᖓᓐᓄᓐ ᓄᓇᕗᒻᒥ ᐋᖅᑭᐅᒪᔨᒋᔭᐅᕗᖅ. ᓇᑖᓴ ᐊᓈᓇᖓᑦᑕ ᓄᓇᑐᖃᖓᓐᓂ ᐃᖃᓗᖕᓂ ᐱᕈᕐᓴᕐᓯᒪᕗᖅ ᒫᓐᓇᐅᔪᕐᓗ Carleton Place-ᒥ ᓄᓇᖃᕐᖢᓂ ᖃᑕᓐᖑᑎᖏᓪᓗ. ᓇᑖᓴ ᐃᓴᕈᐃᑦ ᐃᓄᐃᑦ ᓴᓇᐅᒐᓕᐅᕐᕕᐊᓂᒃ ᑲᓇᑕᒥ ᐃᓕᓴᕆᔭᐅᖁᔨᕗᖅ ᐃᓄᖕᓂ ᓴᓇᐅᒐᓕᐅᖅᑎᓂ ᑭᒡᒐᖅᑐᐃᔨᒻᒪᕆᓐᖑᖁᓪᓗᒋᓐ ᐃᑲᔪᕐᓱᐃᕕᒻᒪᕆᐅᓕᕐᓗᑎᒡᓗ.

ᐊᐃᒐ ᐊᑕᒍᑦᓯᐊᖅ ᐃᒃᐱᐊᕐᔪᖕᒥᒃ ᐃᓅᓚᐅᖅᐳᖅ ᐱᕈᕐᓴᓪᓗᓂᓗ. ᕿᑐᕐᖓᕇᖑᓪᓗᑎᓐ ᓄᒃᑎᖅᑎᓪᓗᒍ ᐊᕐᕌᒍᑦ 20-ᓗᐊᖑᓚᐅᖅᑐᓐ ᐋᑐᐋᒧ, ᐃᓐᓇᕐᓂ ᐃᓕᓴᐃᖃᑦᑕᓕᓚᐅᖅᐳᖅ ᐃᑲᔪᖅᑎᐅᖃᑕᓕᕐᖢᓂᓗ ᐊᒻᒪᐃᓛᒃ ᐃᓕᓐᓂᓗᐊᓕᕆᓪᓗᓂ ᐊᐃᖕᓕᑲᒃᑯᓐᓂ ᐊᔪᕆᕐᓱᐃᔨᓐᖑᕐᓴᓪᓗᓂ. ᐃᓅᓯᓕᒫᒥᓂ, ᐊᐃᒐ ᑭᓱᑐᐃᓐᓇᕐᓂ ᓴᓇᐅᒐᓕᐅᖃᑦᑕᕐᓯᒪᕗᖅ ᖃᑕᓐᖑᑎᖏᑕᓗ ᐱᒃᓴᖏᓐᓂ ᕿᓯᖕᓂ ᒥᕐᓱᐃᓐᓇᐅᔭᖃᑦᑕᕐᓯᒪᓪᓗᓂ ᖃᐅᔨᒪᑦᑎᐊᕐᖢᓂ ᒪᒥᓴᕈᑎᒋᔪᓐᓇᑦᑎᐊᕐᓂᖏᓐᓄᑦ ᓴᓇᕙᒃᖢᓂ ᒥᕐᓱᖅᐸᒃᖢᓂᓗ ᕿᑐᓐᖑᑎᒥᓄ ᓂᐅᕕᐊᒃᓴᓂᒡᓘᓐᓃᓐ ᐅᕝᕙᓘᓐᓃ ᑐᓂᖅᑯᑎᒃᓴᒥᓂ. ᐊᐃᒐᐅᒻ ᐱᓕᕆᐊᖏᑦ ᐃᓄᓪᓚᕆᐅᓪᓗᓂ ᐊᔪᕆᕐᓱᐃᔨᑐᐊᑦᑎᐊᖑᓪᓗᓂ ᓴᐃᓐ ᒫᒍᕆᑦ ᑐᒃᓯᐊᕐᕕᐊᓂ ᕚᓂᐊᒥ ᐋᑐᐋ ᓄᓇᓕᖅᐸᐅᔭᖓᓂ ᐱᓕᕆᕐᔪᐊᕈᑎᒋᕙᒃᑲᓗᐊᖅᑎᓪᓗᓂᒋᓐ, ᓱᓕ ᐃᓴᕈᐃᒃᑯᓐᓄᐊᖅᐸᒃᐳᖅ ᑲᑎᒪᕐᔪᐊᖅᑐᓄ ᒥᕐᓱᖅᑐᓄᓪᓗ ᐅᐸᒍᑎᕙᒃᖢᓂ ᐱᔪᓐᓇᕐᓯᑐᐊᕌᖓᒥ.

ᐱᕗᕐᓕ ᑎᓴᒪᐅᔪᓄ ᓴᖅᑭᑎᑦᑎᓯᒪᔪᓄ ᐃᓚᒋᔭᐅᕗᖅ ᐃᓴᕈᐃᒃᑯᓐᓂ ᐃᓄᖕᓂ ᖃᑕᓐᖑᑎᔮᒌᖑᒐᓇᒃᑐᓂ. ᖃᓪᓗᓈᓂ ᐊᖓᔪᖅᑳᖃᕐᖢᓂ, ᑐᓛᑐᒥᐅᒃᓴᔭᐅᓪᓗᓂ, ᐱᕗᓕ ᐃᓅᖃᑎᖃᐅᕐᓯᒪᐅᖅᐳᖅ ᐊᔾᔨᒌᓐᖏᑦᑐᓂ, ᐃᓕᓴᐃᓂᕐᒧ ᐃᓕᓴᕆᔭᐅᔾᔪᑎᖃᕐᖢᓂ. ᐃᓕᓴᐃᔨᐅᓚᐅᕐᖢᓂ ᓯᕗᕕᐅᓪᒥ (Schefferville) ᐃᒡᓗᓕᖕᒥᓗ, ᐊᒻᒪᓗ ᒐᕙᒪᑐᖃᒃᑯᓐᓂ ᐃᓄᓕᕆᔨᑐᖃᒃᑯᓐᓄ ᐊᕐᕌᒍᒐᓴᖕᓄ ᐃᖅᑲᓇᐅᔭᓚᐅᕐᖢᓂ, ᑎᒍᐊᕆᔭᐅᓚᐅᖅ ᐊᐱᑕᒃᑯᓐᓄ ᖃᑕᓐᖑᑎᒌᖑᔪᓄ ᑲᖏᖅᑐᒑᐱᖕᒥ 1985-ᖑᑎᓪᓗᒍ. ᑲᖏᖅᑐᒑᐱᖕᒥᐅᑕᐅᓚᐅᕐᖢᓂ ᐊᕐᕌᒍᓄ 19-ᓄ ᐃᓕᓴᕐᓯᕕᒃᑯᓐ ᑲᑐᔾᔨᖃᑎᒌᖏᓐᓂ/ᖃᑕᓐᖑᑎᒌᓄ ᖃᐅᔨᒋᐊᕐᕕᖕᒥ ᐋᖅᑭᒃᓯᖃᑕᐅᕝᕕᒋᓚᐅᖅᑕᒥᓂ, ᒫᓐᓇᐅᔪᖅ ᐱᕗᓕ ᐋᑐᐋᒥᐅᑕᐅᕗᖅ ᐱᕙᓪᓕᐊᑎᑦᑎᕙᓪᓕᐊᖏᓐᓇᕐᖢᓂ ᐃᓴᕈᐃᒃᑯᓐᓂ ᐃᓄᖕᓄ ᓴᓇᐅᒐᓕᐅᖅᑎᓄ ᐅᐸᒃᑕᕐᕕᖕᒥ ᑐᑭᒧᐊᒃᑎᒋᔭᐅᓪᓗᓂ.

ᒫᑕ ᕕᓕᐅᕆᑎ, ᐃᓄᒡᔪᐊᕐᒥᐅᒃᓴᔭᖅ, ᓄᓇᕕᖕᒥ ᖃᑕᓐᖑᑎᖏᓪᓗ ᐊᐅᓱᐃᑦᑐᕐᒧ ᓅᑎᑕᐅᓚᐅᕐᓯᒪᕗᓐ 1960-ᖑᑎᓪᓗᒍ ᒐᕙᒪᑐᖃᒃᑯᓐ ᑯᐸᐃᒃ ᐅᑭᐅᖅᑕᖅᑐᖅᐸᓯᐊᓂᕐᒥᐅᓂ ᓅᑎᑦᑎᑎᓪᓗᒋᑦ. ᐱᖓᓱᐊᕐᖢᓂ ᐃᓕᓐᓂᐊᕆᐊᖅᑎᑕᐅᓯᒪᕙᓚᐅᕐᓂᕐᒥᓂ ᐊᓂᒎᔾᔨᓯᒪᕗᖅ, ᒫᑕ ᐊᕐᕌᒍᒐᓵᓗᖕᓄ ᖃᑕᓐᖑᑎᖏᑦ ᐃᓱᒪᑕᐅᓇᓱᒃᑐᓄ ᐊᐅᓚᑕᐅᓂᖃᓚᐅᕐᓯᒪᓂᖏᓐᓂ ᑐᑭᓯᓇᓱᐊᕐᓯᒪᕗᖅ. ᑲᓇᑕᒥ ᑕᕐᕆᔮᒃᓴᓕᐊᖑᓯᒪᔪᒥ “ᒫᑕ ᐅᑭᐅᖅᑕᖅᑐᒥ” ᑕᕐᕆᔭᒐᓕᐅᖅᑎᐅᑉ ᑐᖏᓕᒋᓚᐅᕐᖢᓂᐅᒃ, ᑭᒃᑯᓕᒫᓄ ᓄᓇᖃᖅᑳᕐᓯᔪᓄᓪᓗ ᐃᒃᐱᖕᓇᕐᓂᖃᓪᓚᕆᒃᓯᒪᓪᓗᑎᑦ ᓴᖅᑭᑎᑕᐅᓯᒪᕗᓐ. 

ᒫᑕ ᐃᓕᖅᑯᓯᑐᖃᓂ ᐸᐸᑦᑎᓇᓱᐊᕐᓂᕐᒥ ᐱᓕᕆᐊᖃᕐᓯᒪᕗᖅ ᐃᓄᓕᕆᔨᑐᖃᒃᑯᓐᓂᓗ, ᑲᓇᑕᒥ ᐸᐅᒃᑑᑎᒃᑯᑦ ᐊᕐᓇᐃᓐ ᐃᓄᐃᓐ ᑲᑐᔾᔨᖃᑎᒌᖏᓐᓂ, ᑲᓇᑕᒥᐅᓂ ᑭᒡᒐᖅᑐᐃᔨᐅᓯᒪᓪᓗᓂ ᐃᓄᐃᑦ ᓄᓇᕐᔪᐊᕐᒥᐅᓐ ᑲᑎᒪᔨᕐᔪᐊᖏᓐᓂ ᓄᓇᕐᔪᐊᕐᒥ, ᐊᒻᒪᓗ ᓱᓕ ᒫᓐᓇ ᐳᓚᕋᖅᑐᓕᕆᓂᕐᒥ ᖃᐅᔨᒪᔨᒋᔭᐅᓪᓗᓂ ᑐᓵᔨᐅᕙᒃᐳᖅ ᐊᐅᔭᒃᑯᑦ ᐅᑭᐅᖅᑕᖅᑐᒥ ᐳᓚᕋᖅᐸᒃᑐᓂ Adventure Canada ᐅᒥᐊᕐᔪᐊᖏᓐᓂ. ᑭᓯᐊᓂ, ᒫᑕᐅᒻ  ᐃᓅᓯᖓᓂ ᑐᑭᓕᐅᕆᕙᖕᓂᖅ ᐱᓕᕆᐊᕆᓪᓗᐊᑕᕆᓯᒪᕙᖓ. ᑐᑭᓕᐅᖅᑎᒋᔭᐅᔪᒪᓪᓚᕆᒃᐸᒃᐳᖅ ᑐᓵᔨᒋᔭᐅᓗᓂᓘᓐᓃᓐ ᑕᒪᐃᓐᓂ ᑲᓇᑕᐅᒻ ᐊᕕᒃᑐᕐᓯᒪᐅᕐᓂᖏᓐᓂ, ᒐᕙᒪᑐᖃᒃᑯᓐᓂ ᐊᒻᒪ ᓄᓇᕐᔪᐊᕐᒥ. ᖃᖓᑦᑎᐊᓵᖅ ᑕᒪᐃᓐᓂ ᓄᓇᖃᖅᑳᕐᓯᒪᔪᓂ ᐊᕐᓇᕐᓂ ᐊᓯᐅᔨᔭᐅᓯᒪᔪᓂ ᐃᓄᐊᖅᑕᐅᓯᒪᔪᓂᒡᓗ ᐅᓂᒃᑳᓕᐊᓕᒫᓂ ᐃᓄᒃᑎᑑᓕᕆᓚᐅᖅᐳᖅ, ᑕᑭᔪᐊᓘᓪᓗᓂ ᐱᔭᕆᑐᓪᓗᓂᓗ ᑎᑎᖅᑲᖅᑕᓕᐊᖑᓯᒪᔪᒥᒃ. ᑕᐃᒪᓐᓇ ᑐᑭᓕᐊᕆᔪᓐᓇᑦᑎᐊᕐᓂᖓ ᖃᐅᔨᒪᓇᓕᕐᖢᓂ ᒫᑕ ᓄᓇᖃᖅᑳᕐᓯᒪᔪᓂ ᐱᔾᔪᑎᓕᖕᓂ ᐃᓗᐃᑦᑐᕈᕐᓯᒪᓪᓗᓂᒋᓐ ᐃᓱᒪᒋᔭᖃᐅᖅᐳᖅ. 

ᒫᑕᑦᑕᐅᖅ ᐃᓄᓪᓚᕆᐅᓪᓗᓂ ᓴᓇᐅᒐᓕᐅᖅᑎᐅᕗᖅ, ᐊᓈᓇᖓᑦᑕ ᓱᓕ ᑎᒍᒥᐊᖅᐸᒃᑎᓪᓗᓂᐅᒃ ᒥᕐᓱᕆᐅᕐᓴᓯᕙᓚᐅᖅᐳᖅ ᐃᒡᓗᓂ ᑐᐱᕐᓂᒡᓗ ᓄᓇᐃᓐᓇᕐᒥ, ᒫᓐᓇᐅᓕᖅᑐᖅ ᐃᖕᒥᖕᓂ ᑎᑎᕋᐅᔭᖅᑕᒥᓂ ᒥᕐᓱᖅᑕᒥᓂᒡᓗ ᑭᓱᒃᓴᑐᐃᓐᓇᕐᓂ ᒥᕐᓱᖅᐸᓕᖅᐳᖅ, ᐊᑐᒐᒃᓴᓂ ᐊᓯᖏᓐᓂᒡᓗ ᐃᓄᖕᓄ ᓴᓇᐅᒐᓕᐊᖑᕙᒃᑐᓂ ᓴᓇᑲᑕᒃᐸᒃᖢᓂ ᓂᐅᕕᐊᒃᓴᖃᓕᖅᐸᒃᖢᓂ ᖁᕕᐊᒋᔭᖃᑐᐃᓐᓇᒧᓪᓗ ᒥᕐᓱᑲᑕᒃᐸᒃᖢᓂ. ᒫᑕᑦᑕᐅᖅ ᐃᓚᐅᓂᖃᕐᓯᒪᕗᖅ “ᐅᑭᐅᖅᑕᖅᑐᒥ ᑕᒧᐊᓂᖅ” ᐊᕐᕌᒍᑕᒫᑦ ᐱᖅᑯᓯᑐᖃᕐᓂ ᖁᕕᐊᓲᑎᖃᕈᑕᐅᕙᒃᑐᓂ ᐋᑐᐋᒥ, ᐋᖅᑭᒃᓱᐃᓯᒪᐅᕐᖢᓂ ᐃᓚᐅᓂᖃᐅᕐᓯᒪᐅᕐᖢᓂᓗ ᐊᑕᐅᓯᐅᓐᖏᑦᑐᓂ ᐊᓐᓄᕌᓕᐊᖑᕙᒃᑐᓂ ᑕᑯᒃᓴᕈᖅᑎᑦᑎᖃᑦᑕᕐᓯᒪᓪᓗᓂ ᐊᕐᕌᒍᑦ ᐊᕐᕕᓂᓕᓪᓗᐊᖑᓕᖅᑐᓄᓐ. ᒫᑕ ᐋᑐᐋᒥ ᖃᓂᒋᔮᓂᓗ ᓄᓇᖃᕐᓯᒪᓕᖅᐳᖅ ᐊᕐᕌᒍᓄ 40-ᓄ, ᓄᓕᐊᕆᔭᐅᓪᓗᓂ, ᐊᓈᓇᒋᔭᐅᓪᓗᓂ ᐊᒻᒪ ᓂᖏᐅᖅ/ᐊᓈᓇᑦᑎᐊᕆᔭᐅᓪᓗᓂ ᖃᑕᓐᖑᑎᒌᓐ ᐃᓄᒃ/ᑯᕇ ᐅᓇᓕᖅ/ᖃᓪᓗᓈᓂᓗ ᑭᖑᕚᖃᐅᕐᖢᑎᓐ. 

ᑭᖑᓂᐊᓂ ᐃᒃᓯᕙᐅᑕᐅᓂᑰᓪᓗᓂ, ᒫᑕ ᓱᓕ ᐃᓴᕈᐃᒃᑯᓐᓄ ᖃᐅᔨᒪᐅᖅᑕᒥᓂ ᑐᓂᓰᓐᓇᖃᑦᑕᖅᐳᖅ, ᐅᓄᖅᑐᑦ ᓴᓇᐅᒐᓕᕆᓂᕐᒥ ᐱᔾᔪᑎᓕᖕᓂ ᐱᓕᕆᐊᖃᐅᕐᓯᒪᓪᓗᑎᓐ; ᐅᓄᖅᑐᓐ ᐃᓕᓴᕆᔭᐅᓯᒪᔪᓐ ᐃᓕᓴᕆᔭᐅᓯᒪᓐᖏᑦᑑᒐᓗᐊᓪᓗ, ᑲᓇᑕᒥ ᓄᓇᕐᔪᐊᕐᒥᓗ ᐊᒻᒪ ᐃᓕᖅᑯᓯᖃᖃᑎᒌᓐᖏᑦᑑᑎᐊᓗᖕᓂ ᐃᓅᓯᖏᓪᓗ ᐊᔾᔨᒌᓐᖏᑦᑑᑎᐊᓗᖕᓂ, ᑭᒃᑯᑐᐃᓐᓇᕐᓂᒡᓗ ᖃᓄᑐᐃᓐᓇᖅᖃᐅᔨᒪᓂᖃᐅᖅᑐᓂ; ᐊᕐᕌᒍᒐᓵᓗᖕᓄ ᐊᔪᓐᖏᓐᓂᖃᑦᑎᐊᖅᑐᓂ ᒥᕐᓱᖅᑎᒻᒪᕆᖕᓂ ᐃᓚᖃᐃᓐᓇᖅᐸᒃᖢᓂ ᖃᑕᓐᖑᑎᒥᓂᒡᓗ; ᖃᐅᔨᒪᓂᖃᐅᕐᓂᖓ ᑐᑭᓯᐅᒪᓂᖃᐅᕐᓂᖓᓗ ᐊᑐᕐᖢᓂᒋᓐ ᑎᒥᐅᔪᒥᒃ ᑲᒪᒋᔭᖃᕈᓐᓇᕐᓯᓯᒪᕗᖅ ᐃᓅᓂᕐᒥᓂ ᐊᑐᕐᖢᓂ. ᒫᑕ ᐃᓄᖕᓂ ᐊᕐᓇᕐᓂ ᐃᓘᓯᖃᑦᑎᐊᕐᓂᕐᒧ ᑲᔪᖏᕐᓱᐃᕙᒃᐳᖅ ᐋᑐᐋᒥᐅᓂ, ᐃᓄᒃᑎᑐᓪᓗ ᐅᖃᓪᓚᒃᐸᖕᓂᕐᒥᒃ ᐊᔭᐅᕆᑦᑎᐊᖏᓐᓇᕐᖢᓂ ᑕᐃᒪᓐᖓᓂᓕᒫᖅ.

ᓯᒨᓇ ᐊᕐᓇᑦᓯᐊᖅ ᓄᓇᐃᓐᓇᕐᒥ ᐃᓅᓂᑰᕗᖅ ᐃᒡᓗᓕᒃ, ᓄᓇᕗᑦ ᖃᓂᒋᔮᓂ. ᐋᑐᐋᒥ ᖃᓂᒋᔮᓂᓗ ᓄᓇᖃᕐᓯᒪᓕᖅᐳᖅ ᐊᕐᕕᓂᓕᓐ ᐊᕐᕌᒍᓐ ᐅᖓᑖᓄ, ᑭᓯᐊᓂ ᐃᖏᕐᕋᑲᑕᒐᔪᒃᐳᖅ ᑲᓇᑕᐅᒻ ᐅᑭᐅᖅᑕᖅᑐᐊᓂ ᓄᓇᕐᔪᐊᕐᒥᓗ ᐱᓕᕆᔭᖅᑐᕐᖢᓂ. ᓯᒨᓇ ᓄᓇᓕᖕᓂ ᑮᓇᐅᔭᓕᐅᖅᐸᓪᓕᐊᔪᓕᕆᓂᕐᓂ ᖃᐅᔨᒋᐊᖅᑎᐅᕗᖅ ᐅᑭᐅᖅᑕᖅᑐᒥ ᐃᓄᐃᓐ ᓄᓇᓕᖏᓐᓂ ᑮᓇᐅᔭᓕᐅᕈᑕᐅᕙᓪᓕᐊᔪᓐᓇᖅᑐᓂ ᐱᕙᓪᓕᐊᔪᓕᕆᓂᕐᒥᒃ ᐊᒻᒪ ᐃᓱᒪᑕᐅᓂᕐᒧ ᐱᓕᒻᒪᒃᓴᐃᑎᑦᑎᓂᕐᒥᒃ ᐱᓕᕆᐊᖃᓪᓗᐊᑕᕐᖢᓂ, ᐊᒻᒪᓗᑦᑕᐅᖅ ᐋᑐᐋᒥ. ᓯᒨᓇ ᑎᒥᐅᔪᓂ (ᑯᐊᐸᓖᓴᓂ) ᐱᕙᓪᓕᐊᔪᓕᕆᓂᕐᒥ ᐃᓕᓐᓂᐊᕐᓯᒪᓂᖓᓄ ᐃᓕᓴᕆᔭᐅᔾᔪᑎᖃᖅᐳᖅ St. Francis Xavier ᓯᓚᑦᑐᕐᓴᕐᕕᒡᔪᐊᖓᓐᓂᒃ ᐊᔭᐅᕆᔨᐅᖏᓐᓇᕐᓯᒪᓪᓗᓂᓗ ᐃᓄᐃᓐ ᓇᖕᒥᓂᕐᓱᕐᓂᕐᓴᐅᓕᕈᓐᓇᖁᓪᓗᒋᑦ ᐱᖅᑯᓯᑐᖃᕗᓪᓗ ᐃᓕᓐᖓᓂᖃᐅᑦᑎᐊᕋᓗᐊᕐᒪᖔᒋᓐ ᑕᒪᐃᓐᓂᑦᑎᐊᖅ ᒐᕙᒪᓕᕆᔨᐅᔪᓂ.

ᓯᒨᓇ ᐊᒥᓱᓄ ᑲᑎᒪᔨᓄ ᑲᑎᒪᔨᐅᖃᑕᐅᖃᑦᑕᕐᓯᒪᕗᖅ ᐋᖅᑭᒃᓱᐃᖃᑕᐅᓪᓗᓂ, ᐱᕙᓪᓕᐊᔪᓕᕆᓂᕐᒥᒃ ᐊᒻᒪᓗ ᐊᔭᐅᕆᓂᕐᒥᒃ ᐃᓄᖕᓂ ᑭᒡᒐᖅᑐᐃᓪᓗᓂ, ᐱᓗᐊᖅᑐᒥ ᐃᓄᖕᓂ ᐊᕐᓇᕐᓂ. ᐃᓚᖏᑦ ᑎᒥᐅᔪᑦ ᐱᓕᕆᐊᕆᖃᑎᒋᓯᒪᔭᖏᑦ: ᓄᓇᕗᒻᒧ ᐳᓚᕋᒻᑐᓕᕆᔨᒃᑯᑦ, ᓄᓇᕗᒻᒥ ᓄᓇᑖᕋᓱᐊᖅᑐᓕᕆᓂᕐᒧ ᑎᑎᕋᕐᕕᒃ, ᓄᓇᕗᒻᒥ ᐅᖃᐅᓯᓕᕆᓂᕐᒧ ᐃᓕᖅᑯᓯᑐᖃᓕᕆᓂᕐᒧᓪᓗ ᐱᓕᕆᕝᕕᒃ, ᑐᓐᖓᕕᒃᑯᑦ ᓄᓇᕗᒻᒥ, ᐃᖃᓗᖕᓂ ᓄᓇᓕᖕᒥᐅᓄ ᐃᓘᓯᖃᑦᑎᐊᕐᓂᕐᒧ ᓄᑕᖅᑲᓂᒡᓗ ᓴᐳᔾᔨᓯᒪᓂᕐᒧ ᐱᓕᕆᕝᕕᖕᒥ, Carleton ᓯᓚᑦᑐᒃᓴᕐᕕᒡᔪᐊᖓᓂ, ᑲᓇᑕᒥ ᑎᒍᔭᐅᓯᒪᔪᕕᓂᕐᓄ ᑲᑎᒪᔨᑦ, ᐊᒻᒪᓗ ᑲᓇᑕᒥᐅᓐ ᐊᖓᔪᖅᑳᕐᔪᐊᖓᑕ ᑎᑎᕋᕐᕕᐊᓂ. ᐱᓕᕆᐊᒃᓴᖃᐅᕐᔪᐊᖅᐸᒃᑲᓗᐊᖅᑎᓪᓗᒍ, ᓯᒨᓇ ᓱᓕ ᐊᓈᓇᒋᔭᐅᕗᖅ ᓂᖏᐅᖅ/ᐊᓈᓇᑦᑎᐊᕆᔭᐅᓪᓗᓂᓗ, ᐊᒻᒪ ᐱᐅᓯᓯᒪᓪᓚᕆᒃᑐᓂ ᐊᓐᓄᕌᕆᔭᐅᔪᒃᓴᓂ ᓴᓇᐅᒐᓕᐊᒥᓂᒡᓗ ᑎᑎᕋᐅᔭᖅᐸᒃᖢᓂ ᒥᕐᓱᖅᐸᒃᖢᓂᓗ. ᐊᓈᓇᒥᓂ ᐊᓯᖏᓐᓂ ᐃᓚᒥᓂ ᒥᕐᓱᕐᓂᕐᒥ ᐃᓕᓯᒪᓪᓗᓂ, ᓯᒨᓇᐅᑉ ᓴᓇᓯᒪᔭᖏᑦ ᓴᖅᑭᑦᑎᔾᔪᑎᒋᕙᖏᑦ ᐃᓄᖕᓄ ᓄᓇᕐᔪᐊᕐᒥ ᐱᔪᓂ ᐃᓱᒪᒋᕙᒃᑕᖏᓐᓂ ᐅᒃᐱᕈᓯᕆᔭᖏᓐᓂᒡᓗ ᐊᒻᒪᓗ ᓄᓇᒧᓐ ᓂᕐᔪᑎᓄᓪᓗ ᐃᓄᐃᓐ ᓄᓇᖏᓐᓂᕐᒥᐅᓄ ᐊᒃᑐᐊᖓᓂᖃᓪᓚᕆᖕᓂᖓᓄ.

ᓯᒨᓇ ᐃᓴᕈᐃᒃᑯᓐᓄᐊᕈᔾᔨᓚᐅᖅᐳᖅ ᐱᕙᓪᓕᐊᔪᓕᕆᓂᕐᒥ ᑲᑎᒪᔨᓂᒡᓗ ᓴᖅᑭᑉᐸᓪᓕᐊᔪᓂ ᐱᓕᕆᐊᖃᕐᓂᕐᒥ ᖃᐅᔨᒪᐅᕐᓂᖓᓐᓂᒃ, ᐃᓄᓪᓚᕆᐅᓂᖓ ᐊᑐᕐᖢᓂᐅᖕ, ᓱᒃᑲᔪᒥᒃ ᑕᒻᒪᕐᓯᒪᓐᖏᑦᑐᓂᐞᓗ ᕿᒥᕐᕈᔪᓐᓇᑦᑎᐊᕐᖢᓂ ᐱᓕᕆᐊᓄ ᐱᔭᐅᔭᕆᐊᓕᖕᓂ ᐊᑲᐅᒃᑲᓐᓂᕈᑕᐅᔪᓐᓇᖅᑐᓂᒡᓗ, ᐊᒻᒪᓗ ᐊᕐᕌᒍᑕᒫᕐᓯᐅᑎᓃᑦᑐᓂ ᑮᓇᐅᔭᓂ ᐊᑐᖅᑕᒃᓴᓂ ᐃᓱᒪᒋᔭᖃᕈᓐᓇᑦᑎᐊᕐᖢᓂ, ᖃᐅᔨᒪᐅᑦᑎᐊᕐᖢᓂᓗ ᖃᓄᑐᐃᓐᓇᖅ ᐃᓄᐃᓐ ᒥᕐᓱᐊᕆᕙᒃᑕᖏ ᓂᐅᕐᕈᑎᒋᑲᑕᒍᓐᓇᖅᐸᖕᓂᖏᓐᓄᓐ. ᐃᑲᔪᕈᒪᓪᓚᕆᒃᑲᒥ ᐃᓄᖕᓄ ᐋᑐᐋᒥᐊᓄ ᐃᓴᕈᐃᒃᑯᓐᓂ ᐃᓄᖕᓄ ᒥᕐᓱᕐᕕᖕᒥ ᐃᑲᔪᕐᓂᖃᖁᔨᓪᓚᕆᒃᓯᒪᕗᖅ.