ᑭᒃᑰᒻᒪᖔᑦᑕ/ᑲᑎᒪᔨᕗᑦ

ᓇᑖᓴ ᓚᑐᕋᐃᓪ

ᐃᑦᓯᕙᐅᑕᖅ

ᓇᑖᓴ ᓚᑐᕋᐃᓪ ᐃᑦᓯᕙᐅᑕᖅᑦ ᐃᓴᕈᐃᑦ ᐃᓄᐃᑦ ᓴᓇᐅᒐᓕᐅᖅᑏᑦ ᑲᑎᒪᔨᖏᓐᓄᑦ: ᐱᔪᓐᓇᕐᓂᕗᑦ ᑲᑎᒪᔨᖏᓐᓂ. ᓇᑖᓴ ᓂᕈᐊᖅᑕᐅᒋᐊᖕᖓᓚᐅᖅᓯᒪᔪᖅ ᐃᑦᓯᕙᐅᑕᐅᑉ ᐃᓂᖓᓄᑦ ᐃᓴᕈᐃᑦ ᐊᕐᕌᒍᑕᒫᖅᓯᐅᒻᒥᒃ ᑲᑎᒪᓇᖃᖅᑎᓪᓗᒋᑦ ᔭᓐᓄᐊᕆ 2021-ᒥ. ᓇᑖᓴ 15-ᓂᒃ ᐅᑭᐅᓂᒃ ᐃᖅᑲᓇᐃᔭᖅᓯᒪᔪᖅ ᐊᓪᓚᕕᒻᒥ ᐊᐅᓚᑦᓯᔨᐅᑦᓱᓂ ᐊᒻᒪᓗ ᑲᓇᑕᒥᐅᓄᑦ ᑭᒡᒐᐅᑦᓱᓂᒃ ᐃᓄᐃᑦ ᓯᓚᕐᔪᐊᒥ ᑲᑎᒪᔨᕐᔪᐊᖏᓐᓄᑦ ᐱᓕᕆᐊᓂᒃ ᐊᐅᓚᑦᓯᔨᐅᑦᓱᓂ ᑕᐃᑦᓱᒪᓂᓗ ᓇᒧᑐᐃᓐᓇᖅ ᓄᓇᕐᔪᐊᓄᑦ ᐊᐅᓪᓚᖃᑦᑕᖅᓯᒪᔪᖅ ᓴᐳᔾᔨᔨᐅᑦᓱᓂ ᐃᓄᓐᓂᒃ ᓯᓚᕐᔪᐊᓕᒫᒥ. ᐃᖅᑲᓇᐃᔮᒥᒍᑦ ᐊᐅᓚᑦᓯᔨᐅᖃᑦᑕᖅᓯᒪᑦᓱᓂ, ᓇᑖᓴ ᒫᓐᓇ ᐃᖅᑲᓇᐃᔭᖅᑐᖅ ᒥᑦᓯᖃᑦᓯᐊᑐᒃᑯᑦ ᐃᖏᕐᕋᑎᑦᓯᔨᐅᑦᓱᓂ ᓇᓯᑦᑐᖅ ᑯᐊᐳᕇᓴᒃᑯᓐᓂ ᓄᓇᕗᒥ. ᓇᑖᓴ ᐱᕈᖅᓴᓂᑰᑦᓱᓂ ᐊᓈᓇᖓᑕ ᓄᓇᖓᓂ ᐃᖃᓗᓐᓂ ᒫᓐᓇ ᑳᓪᑕᓐ ᐸᓚᐃᔅᒥ ᓄᓇᖃᓕᖅᑐᑦ ᐃᓚᒌᑦ. ᓇᑖᓴ ᑲᑦᓱᖓᐃᑦᑐᖅ ᖃᐅᔨᒪᔭᐅᓕᖅᑎᑦᓯᓂᕐᒧᑦ ᐃᓴᕈᐃᑦ ᐃᓄᐃᑦ ᓴᓇᐅᒐᓕᐅᖅᑎᓂᒃ ᓄᓇᕐᔪᐊᓕᒫᑦᑎᓐᓂ ᐃᑲᔪᕈᑎᒋᑦᓱᓂᐅᒃ ᐃᓄᓐᓂᒃ ᓴᓇᐅᒐᓕᐅᖅᑎᓂᒃ.

ᕉᐸᓐ ᖁᒪᖔᐱᒃ

ᐃᑦᓯᕙᐅᑕᐅᑉ ᑐᖏᓕᖓ

ᕉᐸᓐ ᖁᒪᒑᐱᒃ ᐃᓅᓕᕐᓂᑰᑦᓱᓂ ᐱᕈᖅᓴᓯᒪᔪᖅ ᒥᑦᑎᒪᑕᓕᒻᒥ ᕿᑭᖅᑖᓘᑉ ᐃᓚᖓᓂ ᓄᓇᕗᒥ. ᐃᓚᒥᓄᑦ ᐃᓚᒋᔭᐅᑦᓱᓂ ᓅᖃᑦᑕᖅᓯᒪᔪᖅ ᐱᕈᐃᔭᐅᓂᑰᒐᒥ ᐊᑖᑕᑦᓯᐊᒃᑯᒥᓐᓄᑦ. ᕉᐸᓐ ᐃᓅᓂᕐᒥᒍᑦ ᐊᖑᓇᓱᒋᐅᖅᓴᓯᒪᔪᖅ ᓴᓇᖃᑦᑕᕆᐅᕐᓂᑰᑦᓱᓂ ᐱᕈᐸᓪᓕᐊᑦᓱᓂ. ᐃᓕᓐᓂᐊᕆᕐᕕᒻᒥ ᐃᓕᓐᓂᐊᕆᐊᖅ ᐃᕿᐊᒋᔭᖃᕐᓂᑰᒐᓗᐊᖅᓱᓂ, ᕉᐸᓐ ᐃᓕᓴᐃᔨᐅᒍᓐᓇᖅᓯᒪᔪᖅ ᔫᓗᕆᓕᐅᕐᓂᕐᒥᒃ ᓄᓇᕗᒥ ᓯᓚᑦᑐᓴᕐᕕᒻᒥ ᐃᖃᓗᓐᓂ ᐊᕙᑎᓂᒃ (20-ᓂᒃ) ᐅᑭᐅᖃᖅᓱᓂ. ᑕᐃᑲᓂ ᐱᒋᐊᖅᓱᓂ ᕉᐸᓐ ᓴᓇᒍᓐᓇᖅᓯᓯᒪᔪᖅ ᓱᓇᑐᐃᓐᓇᕐᓂᒃ ᓇᒥᑐᐃᓐᓇᖅ ᑲᓇᑕᒥ, ᐊᒻᒪᓗ ᓇᒥᑐᐃᓐᓇᖅ ᓯᓚᕐᔪᐊᒥ ᖃᐅᔨᒪᔭᐅᓕᖅᓱᓂ ᓴᓇᕙᒻᒪᑦ ᑕᑯᓐᓇᕋᑦᓴᓂᒃ ᐱᓯᒪᔪᓂᒃ ᐃᓄᐃᑦ ᐱᖅᑯᓯᖓᓐᓂᒃ, ᓴᓇᐅᒐᓂᒃ, ᓂᔾᔭᐅᑎᓂᒃ ᐊᒻᒪᓗ ᓱᓇᑐᐃᓐᓇᕐᓂᒃ ᐊᑐᐃᓐᓇᐅᒐᐃᒻᒪᑕ. ᒫᓐᓇᖃᒻᒥᖅ, ᕉᐸᓐ ᐱᖃᑎᖓᓗ ᖃᓯᒋᐊᕐᓂᐊᖅᑎᐅᖃᑎᖃᓕᖅᑐᖅ ᐊᑦᓯᖅᓯᒪᔪᒥᒃ ᕆᑲᓐ ᐃᓄᑦᓯᐅᑎ, ᐊᔾᔨᒌᖕᖏᑦᑐᓂᒃ ᐱᖅᑯᓯᓕᓐᓄᑦ ᓂᕿᖏᑦ ᕿᓯᖏᓪᓗ ᐱᔭᐅᖃᑦᑕᓂᐊᖅᑎᓪᓗᒋᑦ ᐃᓄᓐᓄᑦ ᓇᐹᖅᑐᓕᒻᒥ ᓄᓇᖃᓕᖅᑐᓄᑦ. ᕉᐸᓐ ᑲᑎᒪᔨᕈᖃᑕᐅᓚᐅᖅᓯᒪᔪᖅ ᐃᓴᕈᐃ ᐃᓄᐃᑦ ᓴᓇᐅᒐᓕᐅᖅᑏᑦ ᑲᑎᒪᔨᖏᓐᓄᑦ ᔭᓐᓄᐊᕆ 2022-ᒥ. ᕉᐸᓐ ᐃᓚᖏᓪᓗ ᒫᓐᓇ ᐋᑐᕚᒥᐅᑦ.

ᐱᓕ ᒥᖅᑯᓵᖅ

ᐱᖅᑯᓯᕐᒥᒃ ᖃᐅᔨᒪᓪᓕᑕᕆᔭᖅ ᑲᑎᒪᔨᓄᑦ

ᐱᓕ ᒥᖅᑯᓵᖅ ᐃᓅᓕᕐᒪᑦ ᐱᕈᖅᓴᔭᐅᓂᑯ ᐊᑖᑕᑦᓯᐊᒃᑯᒥᓐᓄᑦ ᒥᑦᑎᒪᑕᓕᒻᒥ ᕿᑭᖅᑖᓘᑉ ᐃᓚᖓᓂ ᓄᓇᕗᒥ. ᐱᕈᖅᓴᑦᓱᓂ ᓇᒧᑐᐃᓐᓇᖅ ᓄᓇᒧᑦ ᓅᖃᑦᑕᖅᓯᒪᒐᒥ ᓴᓇᐅᒐᓕᐅᖅᑎᒻᒪᕆᕈᖅᓯᒪᕗᖅ ᖃᐅᔨᒪᑦᓯᐊᖅᓱᓂᓗ ᐱᖅᑯᓯᕐᒥᓂᒃ, ᐊᒻᒪᓗ ᐃᓕᓐᓂᐊᖅᓯᒪᓂᖓ ᖁᕝᕙᓯᓐᓂᖃᖅᓱᓂ ᖁᓕᒥᒃ (10-ᒥᒃ). ᐱᓕ ᑎᑎᖅᑐᒐᖅᐸᑦᓱᓂ ᓴᓇᐅᒐᓕᐅᖅᐸᑦᑐᖅ ᓴᐅᓂᒥᓂᕐᓂᒃ, ᐅᒃᑯᓯᑦᓴᓂᒃ ᑑᒑᓂᓪᓗ ᐱᒋᐅᕐᓂᑰᒐᒥ ᓱᕈᓯᐅᑦᓱᓂ. ᐊᒻᒪᓗ ᓴᓇᓯᑎᐅᓂᖓ ᖃᐅᔨᒪᔭᐅᑦᓯᐊᓕᖅᑐᖅ ᐱᔭᐅᕙᑦᓱᑎᒃ ᑲᓇᑕᒥᐅᓄᑦ ᐊᓯᓂᓗ ᓄᓇᕐᔪᐊᓕᓐᓄᑦ. ᐱᓕ ᐃᑲᔪᕈᒪᓪᓚᕆᑦᑐᖅ ᐱᕙᓪᓕᐊᑎᑦᓯᖃᑕᐅᓂᕐᒧᑦ ᐃᓄᓐᓂᒃ ᓴᓇᐅᒐᓕᐅᓲᓂᒃ. ᑲᑎᒪᔨᐅᖃᑦᑕᖅᓯᒪᒐᒥ ᓄᓇᕐᔪᐊᑎᓐᓂ ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᖏᓐᓂ, ᐱᓕ ᑲᑦᓱᖓᐃᑦᓱᓂ ᐱᓕᕆᖃᑕᐅᕙᑦᑐᖅ ᐃᓴᕈᐃᑦ ᐃᓄᐃᑦ ᓴᓇᐅᒐᓕᐅᖅᑏᑦ ᑲᑎᒪᔨᖏᓐᓄᑦ, ᐅᖃᐅᓯᖃᖃᑦᑕᕐᒪᑦ ᐃᓄᓐᓄᑦ ᓴᓇᐅᒐᓕᐅᖅᑎᓄᑦ ᐅᑭᐅᖅᑕᖅᑐᒥᐅᓄᑦ ᐊᑦᓱᕈᕈᑕᐅᕙᑦᑐᓂᒃ. ᐱᓕ ᐃᓚᖏᓪᓗ ᒥᑦᑎᒪᑕᓕᒻᒥᐅᑦ, ᑕᐃᑲᓃᑉᐸᑦᓱᓂ ᐊᖑᓇᓱᒋᐊᖅᓯᒪᖕᖏᑐᐊᕈᓂ ᐃᖃᓪᓕᐊᖅᓯᒪᖕᖏᑐᐊᕈᓂᓗ, ᐅᕝᕙᓘᓐᓃᑦ ᐊᓯᐊᓄᑦ ᓄᓇᓕᓐᓄᑦ ᑲᑎᒪᒋᐊᖅᓯᒪᖕᖏᑐᐊᕈᓂ ᓇᐅᑐᐃᓐᓇᕐᓄᑦ ᑲᑎᒪᔨᐅᕕᒋᕙᓄᑦ ᖃᐃᖁᔭᐅᕙᒻᒪᑦ.

ᔭᓯ ᑲᖕᖑᖅ

ᑐᓴᕋᑦᓴᓕᕆᔨ ᑲᑎᒪᔨᓄᑦ

ᔭᓯ ᑲᖕᖑᖅ ᐃᓅᓕᕐᓂᑰᑦᓱᓂ ᐱᕈᖅᓴᓯᒪᔪᖅ ᐃᒡᓗᓕᖕᒥ, ᓄᓇᕗᒥ.  16-ᓂᒃ ᐅᑭᐅᖃᓕᖅᓱᓂ ᐋᑐᕚᒧᑦ ᓅᓐᓂᑯ ᐃᓚᖏᓪᓗ. ᐋᑐᕚᒥᐅᖑᓕᖅᓱᓂ, ᔭᓯ ᐃᓚᐅᖃᑦᑕᖅᑐᖅ ᐃᓅᖃᑎᒥᓄᑦ ᐋᑐᕚᒥ, ᐱᓕᕆᖃᑕᐅᑦᓱᓂ ᐃᓄᐃᑦ ᑐᖕᖓᓱᕝᕕᖓᓂ ᐊᒻᒪᓗ ᐃᓅᖃᑎᒌᓂ. ᔭᓯ ᐱᖓᓱᓂᒃ (3) ᕿᑐᕐᖓᖃᕋᒥ ᒫᓐᓇ ᐊᖏᕐᕋᖅᓯᒪᕙᑦᑐᖅ.  ᓴᖅᑮᓯᒪᔪᖅ ᐅᖃᓪᓚᕝᕕᒻᒥᒃ, ᐃᓄᐃᑦ ᑐᓴᐅᑎᖓᓐᓂᒃ ᐋᑐᕚᒥ, ᐊᒻᒪ ᓱᓕ ᐃᓛᓐᓂᒃᑯᑦ ᑐᓴᐅᑎᖅᑎᐅᕙᑦᑐᖅ ᐋᖅᑭᑦᓱᐃᔨᐅᑦᓱᓂ ᓈᓚᐅᑎᒃᑯᑦ ᐅᖃᐅᓯᑦᓴᓂᒃ ᑐᓴᐅᑎᒃᑯᑦ CKCU 93.1 FM-ᑯᑦ ᑐᓴᖅᓴᐅᕙᑦᑐᒥᒃ ᐱᖓᑦᓯᑕᒫᑦ 12-ᒥ ᐅᓪᓗᕈᕐᒥᑕᕐᓇᐅᑎᓪᓗᒍ. ᔭᓯ ᖁᕕᐊᑉᐸᑦᑐᑦ ᑲᑎᒪᑦᓯᒋᐊᒥ ᐃᓅᖃᑎᒥᓂᒃ ᕿᑐᕐᖓᖏᑦ ᐃᓕᓐᓂᐊᑎᓪᓗᒋᑦ ᐃᓄᑦᑎᑐᑦ ᐱᖅᑯᓯᕐᒥᓂᒃ ᐅᖃᐅᓯᕐᒥᓂᓪᓗ. ᑕᒪᐅᖓ ᓅᒐᒥ ᐅᕕᒃᑲᐅᑦᓱᓂ ᐊᓯᐅᔨᓂᐊᖅᑐᕆᓯᒪᔪᖅ ᕿᓇᐅᓂᕐᒥᓂᒃ, ᑭᓯᐊᓂ ᐊᖏᖅᓯᒪᔪᖅ ᖃᐅᔨᒪᑎᑦᓯᖃᑦᑕᓂᕐᒧᑦ ᐃᓅᖃᑎᒥᓂᒃ ᐋᑐᕚᒥ ᐊᑲᕐᕆᒍᓐᓇᕐᓂᖏᓐᓂᒃ ᐃᓅᖃᑎᓂᒃ ᐃᓚᑦᓴᖅᑕᖃᕐᒪᑦ ᑕᒫᓂ ᑕᐃᒫᑦᓴᐃᓐᓇᖅ ᐱᕈᖅᓴᕕᒋᓯᒪᔭᖓᑎᑐᑦ.  ᔭᓯ ᑲᑦᓱᖓᐃᑦᓱᓂ ᐃᑲᔪᖅᐸᑦᑐᖅ ᐃᓅᖃᑎᓂᒃ ᐋᑐᕚᒥ ᑲᑎᒪᔨᐅᖃᑕᐅᓂᕐᒥᒍᑦ ᐃᓴᕈᐃᑦ ᐃᓄᐃᑦ ᓴᓇᐅᒐᓕᐅᖅᑏᑦ ᑲᑎᒪᔨᖏᓐᓂ ᐱᒋᐊᓚᐅᖅᓯᒪᒐᒥᓂᒃ ᐊᐅᒍᓯ 2021-ᒥ. 

ᔨᓂ ᓲᓯ

ᑮᓇᐅᔭᓂᒃ ᓇᐅᑦᓯᑐᖅᑎ ᐃᓴᕈᐃᑦ ᐃᓄᐃᑦ ᓴᓇᐅᒐᓕᐅᖅᑏᑦ ᑲᑎᒪᔨᖏᓐᓂ

ᔨᓂ ᐃᓅᓕᕐᓂᑰᑦᓱᓂ ᐱᕈᖅᓴᓯᒪᔪᖅ ᐃᖃᓗᓐᓂ, ᓄᓇᕗᒥ ᐱᕈᐃᔭᐅᑦᓱᓂ ᐊᓈᓇᒥᓄᑦ ᐊᑖᑕᒥᓄᓪᓗ, ᐅᓖᐱᑲ ᐊᓇᕕᐊᐱᒃ-ᓲᓯᒧᑦ ᐊᒻᒪ ᐳᕋᐃᔭᓐ ᓲᓯᒧᑦ.  ᐃᓕᓐᓂᐊᕈᑎᓂᒃ ᖁᕝᕙᓯᓐᓂᓕᓐᓂᒃ 12-ᓂᒃ ᐱᔭᕇᕋᒥ ᐃᓕᓐᓂᐊᕐᕕᐊᓗᒻᒥ ᐃᖃᓗᓐᓂ, ᐊᕐᕌᒍᓕᒫᒥᒃ ᔨᓂ ᐃᓕᓐᓂᐊᕆᐊᓪᓚᑦᓯᒪᔪᖅ ᓄᓇᕗᑦ ᓯᕗᓂᑦᓴᕗᒃᑯᓐᓂ ᐋᑐᕚᒥ. ᑕᐃᑲᓂ ᐃᓕᓐᓂᐊᖅᓱᓂ ᖃᐅᔨᒪᒋᐊᓪᓚᒍᒪᓂᑯ ᐃᓄᐃᑦ ᓯᕗᓕᖏᓐᓂᒃ, ᐱᖅᑯᓯᖓᓐᓂᒃ, ᐅᖃᐅᓯᖓᓐᓂᒃ, ᐃᓄᓐᓄᑦ ᐊᑦᓱᕈᕈᑕᐅᕙᑦᑐᓂᒃ ᐊᒻᒪᓗ ᑲᑎᒪᔨᐅᕕᐅᖃᑦᑕᖅᑐᓂᒃ. ᔨᓂ ᐱᓇᓱᐊᕐᓂᕐᒥᒍᑦ ᐃᖅᑲᓇᐃᔭᖅᓯᒪᔪᖅ ᓇᒥᑐᐃᓐᓇᖅ ᐊᐅᓚᑦᓯᔨᐅᖃᑕᐅᑦᓱᓂ ᒐᕙᒪᒃᑯᓐᓂ ᓄᓇᕗᒥ ᐊᒻᒪᓗ ᐃᓄᓐᓄᑦ ᑲᑐᔾᔨᖃᑎᒌᖑᕕᓂ ᐃᖃᓗᓐᓂ ᐋᑐᕚᒥᓗ.  ᖁᕕᐊᒋᓂᖅᐹᕆᓯᒪᔭᖓ ᐅᒻᒪᑎ, ᐱᐊᕋᑦᓴᓕᓐᓂ ᐊᕐᓇᓂᒃ ᐃᓕᓐᓂᐊᕈᑎᖃᖅᓱᓂ ᐃᖃᓗᓐᓂ. ᔨᓂ ᒫᓐᓇ ᐃᓕᓐᓂᐊᖅᑐᖅ ᑮᓇᐅᔭᓕᕆᐅᑎᓂᒃ ᐋᓪᒑᓐᑯᐃᓐ ᓯᓚᑦᑐᓴᕐᕕᒻᒥ ᐊᒻᒪᓗ ᐊᕐᕋᒍᓕᒫᒥᒃ ᐃᑲᔪᖅᑎᒋᓕᖅᓱᑎᒍ ᐃᓴᕈᐃᑦ ᐃᓄᐃᑦ ᓴᓇᐅᒐᓕᐅᖅᑏᑦ ᑮᓇᐅᔭᓕᕆᐅᑎᖏᑦ ᑲᒪᒋᒋᐊᖃᓕᕋᐃᒻᒪᑕ. ᔨᓂ ᐃᓕᓐᓂᐊᕆᐊᓪᓚᒍᒪᔪᖅ ᑮᓇᐅᔭᓕᕆᐅᑎᓂᒃ ᐊᒻᒪᓗ ᓇᖏᐊᕐᓇᖅᑐᒨᑦᑕᐃᓕᓂᕐᒥᒃ ᑮᓇᐅᔭᓕᐅᕋᓱᐊᖕᖏᒻᒪᑕ ᐃᓴᕈᒃᑯᑦ ᓇᐅᑦᓯᑐᖅᑎᐅᒻᒪᑦ ᐃᓴᕈᐃᑦ ᐃᓄᐃᑦ ᓴᓇᐅᒐᓕᐅᖅᑏᑦ ᑲᑎᒪᔨᖏᑕ ᑮᓇᐅᔭᖁᑎᖏᓐᓂᒃ.    

ᐊᑯᒪᓕᒃ ᑎᑭᕕᒃ

ᑲᑎᒪᔩᑦ ᑎᑎᕋᖅᑎᖓᑦ

ᐊᑯᒪᓕᒃ ᑎᑭᕕᒃ ᐱᕈᕐᓂᑯ ᑭᒻᒥᕈᒻᒥ ᓄᓇᕗᒥ ᓅᓐᓂᑰᑦᓱᓂ ᐃᖃᓗᓐᓄᑦ 2009−ᒥ ᐃᖅᑲᓇᐃᔭᕆᐊᖅᓱᓂ ᐃᖅᑲᖅᑐᐃᓂᓕᕆᔨᒃᑯᓐᓂ ᐊᒻᒪ ᑭᒃᑯᓕᒫᓂᒃ ᑭᒡᒐᑐᖅᑎᐅᑉ ᐊᓪᓚᕝᕕᖓᓂ ᓄᓇᕗᑦ ᒐᕙᒪᒃᑯᓐᓂ. 2017-ᒥ ᐊᑯᒪᓕᒃ ᐋᑐᕚᒧᑦ ᓅᓐᓂᑯ ᐃᖅᑲᓇᐃᔭᕆᐊᖅᓱᓂ ᑐᖕᖓᓱᕝᕕᖓᓐᓂ ᐃᓄᐃ. ᐊᖅᑯᑕᐅᒍᓐᓇᖅᑐᓂᒃ ᓇᓂᓯᔨᐅᑦᓱᓂ ᑐᖕᖓᓱᕝᕕᖓᓐᓂ ᐃᓄᐃᑦ, ᐊᑯᒪᓕᒃ ᐃᑲᔪᖅᐸᑦᑐᖅ ᐃᓄᓐᓂᒃ ᐋᓐᓂᐊᕕᓕᐊᖅᓯᒪᔪᓂᒃ. ᐊᑯᒪᓕᒃ ᖁᕕᐊᒋᔭᓕᒃ ᐃᕐᓂᕐᒥᓂᒃ ᑲᑎᒪᑦᓯᒋᐊᒥᒃ ᐃᓚᐅᕙᑦᓱᓂᑎᒃ ᓇᐅᑐᐃᓐᓇᕐᓄᑦ ᓱᓂᕆᔭᓄᑦ ᐋᑐᕚᒥ. ᓂᖅᓯᐅᕆᐊᖅ ᐆᑕᓕᐅᕆᐊᕐᓗ ᖁᕕᐊᒋᔭᖃᕐᒥᔪᖅ ᐃᓚᖏᓐᓄᑦ ᐊᓯᖏᓐᓄᓪᓗ ᐱᔭᑦᓴᓂᒃ. “ᖁᕕᐊᑦᑐᖓ ᐃᓴᕈᐃᑦ ᒪᑐᐃᖓᖃᑦᑕᕐᒪᑦ ᑭᒃᑯᓕᒫᓄᑦ ᐋᑐᕚᒥ ᒥᖅᓱᕈᒪᔪᓄᑦ ᓴᐸᖕᖏᕆᒍᒪᔪᓄᓪᓗ, ᐊᓯᖏᓐᓂᓪᓗ ᓴᓇᒍᒪᕙᑦᑐᓄᑦ ᓴᓇᕕᒻᒥ.” ᐊᖏᖅᓯᒪᔪᖅ ᐃᑲᔪᖃᑦᑕᓂᕐᒧᑦ ᐃᓄᓐᓂᒃ ᐋᑐᕚᒥ ᑲᐃᓪᓗᐊᖅᐸᓪᓗᒋᑦ ᐃᓚᐅᕕᑦᓴᓄᑦ ᐃᓄᑦᑎᑐᑦ ᐃᓄᐃᑦ ᓱᑎᑕᐅᓕᕋᐃᑉᐸᑕ.

ᑕᓄᕙᓐ ᒍᐊᑕᓐ-ᑐᑐ

ᐅᕕᒃᑲᓂᒃ ᑭᒡᒐᑐᖅᑎ ᑲᑎᒪᔨᓂ

ᑕᓄᕙᓐ ᒍᐊᑕᓐ-ᑐᑐ ᑲᖏᕐᖠᓂᕐᒥᐅᑦᓴᔭ. ᑕᓄᕙᓐ ᐱᕈᐃᔭᐅᒪᔪᖅ ᑲᖏᕐᖠᓂᕐᒥ ᐃᓕᓐᓂᐊᖅᐸᑦᓱᓂ ᐅᑭᐅᒃᑯᑦ ᐅᐱᕐᖔᒃᑯᓪᓗ ᐅᒥᐊᒃᑯᑦ ᓅᖃᑕᐅᕙᑦᓱᓂ ᐊᐅᓪᓚᖅᓯᒪᖃᑕᐅᕙᑦᓱᓂᓗ ᐊᑖᑕᒃᑯᒥᓐᓄᑦ ᐃᓚᒥᓄᓪᓗ. ᑕᓄᕙᓐ ᓱᓕ ᐅᒥᐊᒃᑯᑦ ᓅᒐᒪᕙᑦᑐᑦ ᐃᖃᓪᓕᐊᕈᒪᕙᑦᓱᓂᓗ. ᐃᓕᓐᓂᐊᕐᓂᒥᓂᒃ ᐱᔭᕇᕋᒥ ᐃᓕᓐᓂᐊᑲᓐᓂᖅᓯᒪᔪᖅ ᓄᓇᕗᑦ ᓯᕗᓂᑦᓴᕗᒥ ᐅᑭᐅᓂᒃ ᒪᕐᕉᓐᓂᒃ ᑐᖔᒍᓪᓗ ᑳᓪᑕᓐ ᓯᓚᑦᑐᓴᕐᕕᔾᔪᐊᒧᑦ ᔫᓂᕚᓯᑎᒧᑦ ᐃᓕᓐᓂᐊᕆᐊᒃᑲᓐᓂᖅᓯᒪᔪᖅ ᐃᑲᔪᖅᑕᐅᑦᓱᓂ ᓄᓇᖃᖅᑳᖅᓯᒪᔪᓂᒃ ᐃᓕᓐᓂᐊᕈᒪᔪᓂᒃ ᐃᑲᔪᑎᖅᓄᑦ ᐃᓕᓐᓂᐊᖅᓱᓂ ᓴᓇᐅᒐᓕᕆᓂᕐᒥᒃ. ᑕᓄᕙᑦ ᐱᓕᒻᒪᑦᓴᖅᑎᑕᐅᓯᒪᔪᖅ ᐃᓄᓐᓄᑦ ᐅᕕᒃᑲᓄᑦ ᓯᕗᓕᖅᑎᐅᒋᐅᖅᓴᓱᓂ ᐃᓄᐃᑦ ᑕᐱᕇᒃᑯᓐᓂ ᑲᓇᑕᒥ ᐊᒻᒪᓗ ᐃᖅᑲᓇᐃᔭᖅᑎᑕᐅᓕᖅᓱᓂᒃ ᒪᓕᒐᓂᒃ ᑐᑭᓯᓂᐊᖅᑎᐅᓂᕐᒧᑦ. ᑖᓄᕙ ᖁᕕᐊᑦᑐᖅ ᐋᑐᕚᒥ ᓄᓇᖃᕆᐊᖅ ᐃᓚᐅᒍᓐᓇᖃᑦᑕᕋᒥ ᐃᓄᓐᓄᑦ ᐋᑐᕚᒥᐅᓄᑦ. ᖃᐅᔨᓯᒪᔪᖅ ᐃᓴᕈᒃᑯᑎᒍᑦ ᑐᖕᖓᓂᕐᒥᓂᒃ ᑭᓇᐅᓂᕐᒥᓄᑦ ᐃᓅᓪᓗᓂ. ᐃᓚᐅᖃᑦᑕᖅᓱᓂ ᐃᓴᕈᒃᑯᓐᓂ ᓂᓪᓕᐊᒍᓐᓇᖅᓯᕙᑦᑐᖅ ᓴᐳᔾᔨᔨᐅᑦᓱᓂ ᐃᓄᐃᑦ ᐱᖅᑯᓯᖓᓂᒃ, ᐃᓕᓐᓂᐊᕈᓐᓇᕐᓂᖏᓐᓂᒃ, ᒐᕙᒪᒃᑯᓐᓄᑦ ᒪᑦᑕᐅᒋᐊᖃᖅᑎᑕᐅᒪᔪᓂᒃ, ᓴᓇᐅᒐᓕᕆᓂᕐᒥᒃ, ᐊᒻᒪᓗ ᐊᓯᖏᓐᓂᒃ . ᑕᓄᕙᓐ ᖁᕕᐊᒋᔭᖃᕐᒥᔪᖅ ᕿᓚᐅᔾᔭᓂᕐᒥᒃ ᐊᒻᒪᓗ ᐃᓄᓐᓄᑦ ᐱᖕᖑᐊᖃᑕᐅᒋᐊᒥᒃ ᓴᓇᕐᕈᑎᓕᐅᕐᓂᒥᓪᓗ ᐃᓄᐃᑦ ᓴᓇᕐᕈᑎᖏᓐᓂᒃ ᐃᓅᑦᓯᐊᓇᕐᒪᑕ.