ᐃᓴᕈᐃᑦ ᓇᓗᓇᐃᒃᑯᑕᕆᓕᖅᑕᖓ ᐃᓱᒪᒋᔭᐅᓯᓚᐅᖅᓯᒪᔪᖅ ᖃᕆᑕᐅᔭᒧᑦ ᓴᓇᓂᑯᒋᔭᖓᓂ ᒪᕇ ᓖ ᓯᖒᕆ ᑐᕌᒻᐸᐃᒧᑦ, ᐃᓅᑦᓱᓂ ᐊᔪᖕᖏᑦᑐᖅ ᐱᕈᖅᓴᓂᑰᑦᓱᓂ ᐋᑐᕚ ᐃᓚᖓᓂ. ᐊᑎᒋᓕᐅᕆᐅᖅᓴᖃᑕᐅᑦᓱᓂ ᕕᑉᕈᐊᕆ 2020-ᒥ, ᒪᕇ ᓖ ᑐᑭᓯᓕᕋᒥ ᖃᓄᖅ “ᐃᓴᕈᐃᑦ” ᒥᑦᓯᖃᕐᒪᖔᖅ (ᖃᓪᓗᓈᑎᑐᑦ, ᐃᓴᕈᐃᑦ) ᐅᐱᒋᓕᓚᐅᖅᓯᒪᔭᖓ ᐊᑎᖅᑖᕆᔭᐅᑎᓪᓗᒍ ᐃᓄᓐᓄᑦ ᐊᕐᓇᓄᑦ ᒥᖅᓱᖃᑎᒌᑉᐸᑦᑐᓄᑦ ᐋᑐᕚᒥ.
ᐊᑎᒋᓕᐅᕆᐅᖅᓴᖃᑕᐅᑦᓱᓂ ᑕᐃᑦᓱᒪᓂ ᖃᐅᔨᒋᐅᓚᐅᖅᓯᒪᔪᖅ ᑲᖑᓄᑦ ᓂᕐᓕᓄᓪᓗ ᐃᓴᕈᕕᓃᑦ ᓴᓂᐅᑎᒋᔭᐅᕙᓐᓂᕆᐊᖏᑦ ᑐᐲᑦ ᐃᓪᓗᕕᒐᐃᓪᓗ ᐃᓗᐊᓂ. ᑕᒪᓐᓇ ᐃᓱᒪᒋᑦᓱᒍ, ᐊᑑᑎᖃᑦᓯᐊᕐᓂᖓ ᒥᖅᓱᕐᓂᐅᑉ ᓱᓇᑐᐃᓐᓇᓂᓪᓗ ᓴᓇᖃᑦᑕᕐᓂᐅᑉ ᐃᓄᑦᑎᑐᑦ “ᖁᕝᕙᐸᓪᓕᒍᑕᐅᓲᖑᓂᖓᓂᒃ” ᐃᓅᓯᕐᒧᑦ ᐃᓱᒪᒋᒋᐊᖅᓱᓂᒋᑦ, ᒪᕇ ᓖ ᕿᓂᓯᓂᑯ ᐃᓴᕈᖕᖑᐊᓂᒃ ᖃᕆᑕᐅᔭᒃᑯᑦ ᖃᐅᔨᒐᓱᐊᖅᓱᓂ ᓇᓪᓕᖏᑦ ᓇᓗᓇᐃᒃᑯᑕᑦᓴᑦᓯᐊᖑᒐᔭᕐᒪᖔᑕ. ᐅᔾᔨᑐᖅᓱᓂ ᖃᐅᔨᓯᒪᒻᒥᔪᖅ ᐅᓗᐃᑦ ᐃᓴᕈᕐᔫᔮᕐᓂᖕᓐᓂᒃ, ᐊᒻᒪᓗ ᐃᐳᖏᑦ ᐃᖅᑲᐃᑎᒋᑦᓱᒋᑦ ᓂᕐᓖᑦ ᑲᖑᐃᓪᓗ ᐃᑎᒐᔮᖏᓐᓂᒃ. ᐃᓴᕈᒃᑯᓐᓂᒃ ᐱᒋᐊᖅᑎᑦᓯᓯᒪᔪᑦ ᑲᑎᒪᔩᑦ ᑎᓕᓯᓯᓚᐅᖅᓯᒪᔪᑦ ᒪᕇ ᓖᒥᒃ ᖃᕆᑕᐅᔭᒧᑦ ᓴᓇᖁᔨᑦᓱᑎᒃ ᐃᓴᕈᐃᑦ ᓇᓗᓇᐃᒃᑯᑕᑦᓴᖓᓐᓂ ᐱᔭᕇᕐᒪᓪᓗ ᑕᒪᐃᓐᓄᑦ ᑲᑎᒪᔨᓄᑦ ᓈᒻᒪᒋᔭᐅᓚᐅᖅᓯᒪᔪᖅ ᓇᓗᓇᐃᒃᑯᑕᕆᔭᐅᓂᐊᓕᖅᓱᓂ ᐊᐅᓚᑦᓯᔪᓄᑦ.
ᐊᔪᖕᖏᑦᑐᑦ ᐃᖅᑲᓇᐃᔭᖅᑐᑦ ᐲᑦ ᐱᓕᕆᕕᖓᓐᓂ ᐋᖅᑭᒋᐊᕆᓯᒪᔪᑦ ᑕᐅᑦᑐᖓᓂᒃ ᒪᕇ ᓖ ᖃᕆᑕᐅᔭᒧᑦ ᑎᑎᖅᑐᒐᕐᓂᑯᖓᓂᒃ ᐊᒻᒪᓗ ᐊᒥᐊᑦᓴᖓᓂᒃ ᓂᕈᐊᕐᓂᑰᑦᓱᑎᑦ ᓴᓇᒪᑦᓯᐊᕐᓂᖓ ᑕᑯᑦᓴᐅᓕᖅᑎᑦᓱᒍ. ᐅᔾᔨᕆᒍᒃ ᐊᓪᓕᖅᐸᐅᑦᓱᓂ ᒥᑭᓂᖅᓴᖅ ᑲᔪᖅ ᐃᓴᕈᖕᖑᐊᖅ ᓇᓗᓇᐃᒃᑯᑕᕆᔭᐅᑎᑕᐅᒻᒪᑦ ᐃᓐᓇᕆᔭᓄᑦ ᖃᐅᔨᒪᔨᒋᔭᐅᒻᒪᑕ ᐃᓄᓐᓄᑦ ᓴᓇᐅᒐᓕᐅᖅᑎᓄᑦ. ᐊᐅᐸᖅᑐᖅ ᐃᓴᕈᖕᖑᐊᖅ ᓇᓗᓇᐃᖅᓯᒍᑕᐅᒻᒥᔪᖅ ᐊᖑᑏᑦ ᓴᓇᐅᒐᓕᐅᖅᑏᑦ ᐃᑲᔪᖅᓯᓂᖏᓐᓂᒃ ᐊᕐᓇᓂᒃ ᐃᓄᓐᓂᒃ ᒥᖅᓱᒐᓕᐅᖅᐸᑦᑐᓂᒃ, ᕿᕐᓇᖓᓂᖅᓴᖅ ᐊᐅᐸᖅᑐᖅ ᐊᕐᓇᓂᒃ ᓴᓇᐅᒐᓕᐅᖅᑎᓂᒃ ᓇᓗᓇᐃᖅᓯᒍᑕᐅᑎᓪᓗᒍ; ᐊᒻᒪᓗ ᐊᖏᓂᖅᐹᒃ ᐃᓴᕈᖕᖑᐊᒃ ᑐᕌᖓᑎᑕᐅᑦᓱᑎᒃ ᓄᑕᖅᑲᓄᑦ ᒪᒃᑯᑦᑐᓄᓪᓗ ᐃᓱᒪᒋᑦᓱᒍ ᐱᔪᓐᓇᖅᓯᕙᓪᓕᐊᓂᑦᓴᖏᑦ ᓲᕐᓗ ᑎᒻᒥᐊᑎᑐᑦ ᑎᒻᒥᒋᐅᖅᐸᓪᓕᐊᔪᑐᑦ ᐃᑲᔪᖅᑕᐅᓗᑎᒃ ᐃᓐᓇᕐᓄᑦ.
