ᐃᖅᑲᐅᒪᑦᓯᐊᖅᐸᕗᑦ ᒪᓚᑲᐃ ᑭᒍᑦᑕᖅ ᐱᒋᐊᖅᑎᑦᓯᖃᑕᐅᓚᐅᖅᓯᒪᒻᒪᑦ ᐃᓴᕈᐃᑦ ᐃᓄᐃᑦ ᐊᕐᓇᐃᑦ ᒥᖅᓱᖅᑎᓂᒃ.
ᒪᓚᑲᐃ ᐃᓴᕈᓕᑦᑎᑐᑦ ᐱᐅᓯᖃᕆᐊᖏᑦ ᐃᓄᐃᑦ ᐅᖃᐅᓯᖃᕐᒪᑦ “ᐃᓴᕈᐃᑦ” ᐊᑎᖅᑖᕆᓚᐅᖅᓯᒪᔭᕗᑦ ᑲᑐᔾᔨᖃᑎᒌᖑᑦᓱᑕ ᔪᓚᐃᖑᑎᓪᓗᒍ 2018-ᒥ ᑲᑎᒪᔨᑖᕋᓱᐊᖅᓱᑕᑦ ᑮᓇᐅᔭᓕᐅᕋᓱᐊᖕᖏᑦᑐᓂᒃ ᐃᓕᑕᕆᔭᐅᓗᑕ ᑲᓇᑕᒥ ᒐᕙᒪᒃᑯᓐᓄᑦ. ᑕᐃᑦᓱᒪᓂ ᓯᑕᒪᐅᓚᐅᖅᓯᒪᔪᒍᑦ (4) ᐊᓈᓇᑦᓯᐊᕆᔭᐅᑦᓱᑕ/ᐋᓇᒋᔭᐅᑦᓱᖓ ᐃᓅᖃᑎᑦᑎᓐᓄᑦ ᐋᑐᕚᒥ ᐅᑯᐊᖑᑦᓱᑕ – ᐊᐃᒐ ᐊᑕᒍᑦᓯᐊᖅ, ᒫᑕ ᕙᓛᕈᑎ, ᒪᓚᑲᐃ ᑭᒍᑦᑕᖅ, ᐊᒻᒪᓗ ᐱᕗᓕ ᐃᓪᓚᐅᖅ. ᒪᓚᑲᐃ ᐅᖃᓚᐅᖅᓯᒪᔪᖅ ᐃᒫᒃ “ᐃᓅᓪᓗᑕ ᐋᑐᕚᒥ ᐃᓴᖅᑯᐊᖅᓯᒪᔪᖅᑎᑐᑦ ᐱᐅᓯᖃᕋᑦᑕ ᐃᓴᕈᖅᑖᕆᐊᖃᖅᑐᒍᑦ – ᐃᓴᕈᐃᑦ…”.
ᒫᑕ ᕙᓛᕈᑎ ᐃᑦᓯᕙᐅᑕᕆᓚᐅᖅᓯᒪᒐᑦᑎᒍᑦ ᓯᕗᓪᓕᖅᐹᒥ ᑲᑎᒪᑦᓱᑕ ᐊᑎᑦᓴᑦᓯᐊᖑᓂᕋᐃᓚᐅᖅᓯᒪᔪᖅ ᐅᕙᒍᓪᓗ ᐃᓘᓐᓇᑕ ᐱᐅᒋᓚᐅᖅᓯᒪᒐᑦᑎᒍ ᐊᑎᖅᑖᕆᓚᐅᖅᓯᒪᔭᕗᑦ “ᐃᓴᕈᐃᑦ”. ᖁᔭᓐᓇᒦᒃ, ᒪᓚᑲᐃ! ᐃᖅᑲᐅᒪᔭᐅᓂᐊᖅᐳᑎᑦ.
