ᒫᑕ ᕙᓛᕈᑎ
ᒫᑕ ᕙᓛᕈᑎ, ᐃᓄᔾᔪᐊᖅ ᓄᓇᕕᒻᒥ ᐃᓅᓂᑰᒐᓗᐊᖅ ᓄᑕᕋᐅᑎᓪᓗᒍ ᐃᓚᒌᑦ ᓄᑦᑎᖅᑕᐅᓂᑯᐃᑦ ᐊᐅᓱᐃᑦᑐᒧᑦ 1960-ᒥ ᒐᕙᒪᑐᖃᒃᑯᑦ ᓄᑦᑎᑎᕆᑎᓪᓗᒋᑦ ᑯᐸᐃᒥᐅᓂᒃ. ᐊᓂᒎᔾᔨᓂᑰᑦᓱᓂ ᐱᖓᓱᓂᒃ ᐃᓕᓐᓂᐊᕆᐊᖅᑎᑕᐅᒪᕕᓂᒃ, ᒫᑕ ᐊᑯᓂᐊᓗᒃ ᒪᒥᓴᕈᑎᖃᕆᐊᖃᑦᓯᒪᔪᖅ ᐃᓚᖏᓪᓗ ᓅᑕᐅᓚᐅᖅᓯᒪᓂᖓᑦ ᐱᔾᔪᑎᒋᓪᓗᒍ. ᑲᓇᑕᒥ ᑕᕐᕆᔭᓕᐅᖅᑎᓄᑦ ᑕᕐᕆᔭᓕᐊᖑᒍᑎᒋᓯᒪᔭᖓ ᑕᐃᒎᓯᓕᒃ ᐃᒫᒃ “ᒫᑕ ᐅᑭᐅᖅᑕᖅᑐᒥᐅᖅ” ᐃᑲᔪᖅᑎᒋᔭᐅᑦᓱᓂᓗ ᑕᕐᕆᔭᓕᐅᖅᑎᒧᑦ, ᐊᒥᓱᓂᒃ ᓄᓇᖃᖅᑳᖅᓯᒪᔪᓂᒃ ᐊᑦᑐᐃᓯᒪᔪᖅ ᑕᕐᕆᔭᓕᐊᕕᓂᖓ.
ᒫᑕ ᒐᕙᒪᑐᖃᒃᑯᓐᓂ ᐃᖅᑲᓇᐃᔭᖃᑦᑕᖅᓯᒪᒻᒥᔪᖅ ᐱᖅᑯᓯᓕᕆᔨᒃᑯᖏᓐᓂ, ᐊᖓᔪᖅᑳᖑᓯᒪᓪᓗᓂᓗ ᐃᓄᐃᑦ ᐊᕐᓇᐃᑦ ᑲᑐᔾᔨᖃᑎᒌᖏᓐᓂ ᐸᐅᖅᑑᑎᒃᑯᓐᓂ, ᑲᓇᑕᒥᓗ ᑭᒡᒐᑐᖅᑎᐅᓯᒪᑦᓱᓂ ᓯᓚᕐᔪᐊᒥ ᐃᓄᓕᒫᑦ ᐅᑭᐅᖅᑕᖅᑐᒥᐅᑦ ᑲᑎᒪᔨᕐᔪᐊᖏᓐᓂ, ᓱᓕᓗ ᐃᖅᑲᓇᐃᔭᖅᐸᑦᓱᓂ ᑐᖕᖓᓱᑎᑦᓯᔨᐅᑦᓱᓂ ᑐᓵᔨᐅᑦᓱᓂᓗ ᐅᒥᐊᕐᔪᐊᒃᑯᑦ ᑕᑯᓂᐊᖅᓯᒪᔪᓄᑦ ᐅᑭᐅᖅᑕᖅᑐᒥᒃ ᐊᐅᔭᐅᑎᓪᓗᒍ ᐊᐅᓚᑕᐅᑦᓱᑎᒃ ᑲᓇᑕᒥ ᑕᑯᑎᑦᓯᔨᓄᑦ. ᑭᓯᐊᓂᓕ ᒫᑕ ᑐᓵᔨᐅᓂᖅᓴᐅᕙᑦᑐᖅ. ᐊᒥᓱᓄᑦ ᑐᑦᓯᕌᖑᕙᑦᑐᖅ ᑐᑭᓕᐅᕆᖁᔨᔪᓄᑦ ᑐᓵᔨᖃᕈᒪᔪᓄᓪᓗ ᓄᓇᕐᔪᐊᑎᓐᓂ ᒐᕙᒪᑐᖃᒃᑯᓐᓄᑦ ᒐᕙᒪᒋᔭᓄᓪᓗ ᐊᕕᑦᑐᖅᓯᒪᔪᓂ ᓇᒥᑐᐃᓐᓇᕐᓗ ᓯᓚᕐᔪᐊᒥ. ᒫᓐᓇᖃᒻᒥᖅ ᐃᓄᑦᑎᑑᓕᖅᑎᕆᓂᑰᒻᒥᔪᖅ ᐅᓂᒃᑳᓕᐊᖑᓯᒪᔪᒥᒃ ᐃᓄᐊᖅᑕᐅᒪᔪᑦ ᐊᓯᐅᓯᒪᔪᓪᓗ ᐊᕐᓇᐃᑦ ᓄᓇᖃᖅᑳᖅᓯᒪᔪᑦ ᒥᑦᓵᓄᑦ, ᐃᔾᔪᔪᑲᓪᓚᐅᑦᓱᓂ ᓴᐱᕐᓇᑲᓴᑦᑐᖅ.
ᒫᑕ ᐃᓅᓂᕐᒥᒍᑦ ᓴᓇᐅᒐᓕᐅᓲᖑᒻᒥᒻᒪ ᓴᓇᔭᒥᓂᖏᑦ ᐊᒥᓱᓄᑦ ᐱᔭᐅᒍᒪᕙᑦᑐᑦ ᐊᓈᓇᒥᓂᒃ ᑕᑯᓐᓇᖅᓱᓂ ᐃᓕᓐᓂᑰᒐᒥ ᐃᓪᓗᕕᒐᕐᒦᑦᓱᑎᒃ ᑐᐱᕐᒦᑦᓱᑎᓪᓘᓐᓃᑦ, ᒫᓐᓇᓗ ᓴᓇᕙᓕᖅᑐᖅ ᓇᒻᒥᓂᖅ ᐃᓱᒪᒋᓯᒪᔭᒥᓂᒃ ᒥᖅᓱᒐᒐᓚᓐᓂᒃ, ᕿᓂᖅᐸᑦᓱᓂᒃ ᓴᓇᒐᑦᓴᓂᒃ ᐊᓯᓄᓪᓗ ᐃᓄᓐᓄᑦ ᓴᓇᐅᒐᓂᒃ ᓂᐅᕐᕈᑎᑦᓴᓂᒃ ᐊᒻᒪᓗ ᓴᓇᖃᑦᑕᕋᒪᑦᓱᓂ ᖁᕕᐊᒋᒐᒥᐅᒃ ᓱᓇᓕᐅᕐᓂᖅ. ᒫᑕ ᐃᓚᐅᓯᒪᒻᒥᔪᖅ “ᐅᑭᐅᖅᑕᖅᑐᒥᐅᑦ ᓂᕿᖏᑦ” ᐆᑦᑐᕋᑦᓴᐅᑎᐅᓂᖏᓐᓂ ᐊᕐᕌᒍᑕᒫᑦ ᓂᕆᕕᔾᔪᐊᖅᑎᑕᐅᑎᓪᓗᒋᑦ ᐃᓄᐃᑦ ᐱᖅᑯᓯᒃᑯᑦ ᖁᕕᐊᓱᑦᑎᑕᐅᑦᓱᑎᒃ ᐋᑐᕚᒥ, ᐊᒻᒪᓗ ᐊᐅᓚᑦᓯᓯᒪᑦᓱᓂ ᑕᑯᑦᓴᐅᑎᑦᓯᖃᑕᐅᖃᑦᑕᖅᓱᓂᓗ ᐃᓄᓐᓄᑦ ᐊᓐᓄᕌᓕᐊᒥᓂᕐᓂᒃ ᐊᕌᒍᓂ 20-ᓂ ᖄᖏᖅᑐᓂᔭ. ᒫᑕ ᐋᑐᕚᒥᐅᖑᓕᖅᑐᖅ 40-ᓂᒃ ᐅᑭᐅᓂᒃ, ᐅᐃᖃᖅᓱᓂ ᐊᓈᓇᐅᑦᓱᓂᓗ ᐊᓈᓇᑦᓯᐊᖑᓪᓗᓂ/ᐋᓇᒋᔭᐅᓪᓗᓂ ᐃᓄᓐᓄᑦ/ᐊᓪᓚᓄᑦ ᑯᕇᓄᑦ/ᖃᓪᓗᓈᖓᔪᓄᓪᓗ. ᐃᑦᓯᕙᐅᑕᕆᔭᐅᒍᓐᓃᕋᓗᐊᕋᒥ ᐃᓴᕈᒃᑯᓐᓂ, ᒫᑕ ᓱᓕ ᐃᑲᔪᖅᐸᑦᑐᖅ ᐊᒥᓱᑎᒍᑦ ᖃᐅᔨᒪᔭᒥᑎᒍᑦ ᐊᒥᓲᑦᓱᑎᒃ ᐃᓚᒋᔭᐅᕙᑦᑐᑦ ᓴᓇᐅᒐᓕᕆᔨᓄᑦ ᓯᓚᖅᔪᐊᒥ; ᓇᓪᓕᐊᒍᑐᐃᓐᓇᖅ ᑐᑯᑦᓴᐅᖏᑦᑐᒃᑯᑦ ᑕᑯᑦᓴᑯᓪᓗ, ᓄᓇᕐᔪᐊᑎᓐᓂ ᓯᓚᖅᔪᐊᒥᓗ ᐱᖅᑯᓯᓕᓐᓄᑦ ᐊᕐᓇᓄᑦ ᐊᖑᑎᓄᓪᓗ, ᖃᑦᓯᑐᐃᓐᓇᓂᓪᓗ ᐅᑭᐅᓕᓐᓄᑦ; ᐅᑭᐅᒐᓴᓂᓪᓗ ᐃᓚᒋᔭᐅᓯᒪᑦᓱᓂ ᒥᖅᓱᒐᓕᐅᖅᑎᓄᑦ; ᖃᐅᔨᒪᓂᖓᒍᑦ ᑐᑭᓯᓂᖓᒍᓪᓗ ᑲᒪᔨᐅᖃᑕᐅᓯᒪᔪᖅ ᐱᒋᐊᖅᑎᑦᓯᖃᑕᐅᑦᓱᓂ ᐃᓄᓐᓃᖕᖔᖓᔪᓂᒃ. ᒫᑕ ᓱᓕ ᐃᑲᔪᖃᑦᑕᐃᓇᖅᐳᖅ ᐃᓄᐃᑦ ᐊᕐᓇᐃᑦ ᐋᑐᕚᒥᐅᑦ ᐱᔾᔪᑎᒋᓪᓗᒋᑦ ᓂᓪᓕᐊᒍᑎᖃᖃᑦᑕᐃᓇᖅᓱᓂᓗ ᐊᓯᐅᔨᑦᑕᐃᓕᓂᕐᒥᒃ ᐃᓄᐃᑦ ᐅᖃᐅᓯᖓᓐᓂᒃ ᐅᖃᓕᒪᖃᑦᑕᓂᒃᑯ ᐃᓄᑦᑎᑐᑦ ᑭᒃᑯᓕᒫᓄᑦ.
ᐊᐃᒐ ᐊᑕᒍᑦᓯᐊᖅ
ᐊᐃᒐ ᐊᑕᒍᑦᓯᐊᖅ ᐃᓅᓕᓚᐅᕐᓂᑯ ᐃᑉᐱᐊᕐᔫᑉ ᓯᓚᑖᓂ, ᕿᑭᖅᑖᓘᑉ ᐱᖓᓐᓇᖓᓂ ᓄᓇᕗᒥ. ᐊᓈᓇᒥᓄᑦ ᒫᓐᓇ ᐅᑭᐅᖃᓕᖅᑐᒧᑦ 90 ᐅᖓᑖᓄᑦ ᒥᖅᓱᕆᐅᖅᑎᑕᐅᓯᒪᔪᖅ. ᐊᐃᒐᐅᑉ ᐅᐃᓂᓐᓂᑯ ᐃᓕᓐᓂᐊᕆᐊᖅᑎᑕᐅᒪᓂᑰᑦᓱᓂ ᐱᓂᕐᓗᑦᑕᐅᖃᑦᑕᖅᑐᒥᓂᕐᒥᒃ ᐊᒻᒪᓗ ᑕᐃᒪᐃᓐᓂᑯᖓᓄ ᕿᒫᑦᓱᓂ ᓄᑦᑎᕐᓂᑯ ᐋᑐᕚᒧᑦ ᕿᑐᕐᖓᒥᓂᒃ ᓇᑦᓴᖅᓱᓂ 1980−ᓃᑦᑎᓪᓗᒋᑦ ᓱᓕ ᐊᕐᕌᒍᐃᑦ. ᐊᑦᓱᕈᕐᓇᖅᑐᒃᑰᖅᓯᒪᑦᓱᓂ ᓄᓇᓕᑭᑦᑐᒥᐅᑕᐅᑦᓱᓂᓗ, ᐊᐃᒐ ᐊᑦᓱᕈᖅᓯᒪᕗᖅ ᒪᒥᓴᕐᓂᑰᖃᑎᖃᖅᓱᓂ ᐃᓚᒥᓂᒃ ᐊᒻᒪᓗ ᒫᓐᓇ ᐊᔪᕆᖅᑐᐃᔨᒋᔭᐅᓕᖅᑐᖅ ᐃᓄᓐᓄᑦ ᐋᑐᕚᒥ.
ᐊᐃᒐ ᐃᓐᓇᕐᓂᒃ ᐃᓕᓴᐃᔨᐅᑦᓱᓂ ᐃᑲᔪᖅᑎᐅᒻᒥᔪᖅ ᐅᐸᑦᑕᐅᒐᔪᑦᓱᓂ ᐃᓄᓐᓄᑦ ᐃᓚᒌᓄᑦ ᐋᑐᕚᒥ, ᓂᒡᒋᖅᐸᓯᐅᑉ ᐅᖓᑖᓂ, ᐊᒻᒪᓗ ᓄᓇᕗᒥ. ᐊᐃᒡᒐ ᐃᑲᔪᖅᐸᑦᑐᖅ ᐃᓄᓐᓂᒃ ᐊᕐᓇᓂᒃ ᑲᓲᑎᕙᑦᑐᓄᑦ ᐊᒻᒪᓗ ᐃᑲᔪᖅᑎᒋᔭᐅᕙᑦᓱᓂ ᑕᒪᐃᓐᓄᑦ ᐊᕐᓇᓄᑦ, ᐊᖑᑎᓄᑦ, ᓄᑕᖅᑲᓄᓪᓗ ᓇᐹᖅᑐᓕᒻᒨᕋᐃᒻᒪᑕ; ᐊᐃᒐ ᐅᐸᑦᑕᐅᖅᑳᕋᔪᑦᑐᖅ ᐃᓄᓐᓄᑦ ᐃᑲᔪᖅᑎᑦᓴᖅᓯᐅᖅᑐᓄᑦ.
ᐃᓕᖅᑯᓯᕐᒥᒍᑦ ᓂᕐᔪᑎᓄᑦ ᐊᒥᓂᒃ ᕿᓯᓂᓪᓗ ᑲᒪᖃᑦᑕᖅᓯᒪᑦᓱᓂ ᐊᒻᒪᓗ ᓂᕕᐊᖅᓯᐊᖑᑦᓱᓂ ᐊᓯᓄᑦ ᓅᖃᑕᐅᖃᑦᑕᖅᓯᒪᓂᑰᑦᓱᓂ, ᐊᐃᒐ ᓴᐃᓕᕙᑦᑐᖅ ᒥᖅᓱᖅᓱᓂ. ᒥᑭᔫᑎᓂᒃ ᓱᓇᖕᖑᐊᓂᒃ ᓴᓇᕙᑦᑐᖅ ᕿᓯᔭᓂᒃ, ᐊᑎᒋᓂᒃ, ᓂᕈᒥᐊᒐᓂᒃ, ᐊᒻᒪᓗ ᐊᓯᖏᓐᓂᒃ ᓱᓇᑐᐃᓐᓇᕐᓂᖅ ᐃᓕᖅᑯᓯᖅᓲᑎᓂᒃ. ᒫᓐᓇᒫᒃᑯᑦ ᑭᓯᐊᓂ ᐊᓐᓄᕌᑦᓴᓕᐅᖃᑦᑕᓯᓂᑯ. ᐊᐃᒐ ᐊᓈᓇᐅᑦᓱᓂ ᓂᖏᐅᕆᔭᐅᓕᖅᑐᖅ ᑕᐃᒪᖕᖔᑦ ᐃᓚᒌᑦ ᐋᑐᕚᒥᐅᖑᓯᓐᓂᕐᒪᑦ ᐊᕐᕌᒍᐃᑦ 30 ᐅᖓᑖᓄᑦ.
ᐊᐃᒐ ᖁᔭᒋᔭᐅᕗᖅ ᐃᓱᕈᒃᑯᓐᓂᒃ ᒥᖅᓱᕐᓇᖃᖅᑎᑦᓯᕙᑦᑐᓄᑦ ᐊᒥᓱᓄᑦ ᖃᐅᔨᒪᔭᐅᑦᓱᓂ ᐃᓕᓴᐃᓲᖑᒻᒪᑦ ᐊᒻᒪᓗ ᐃᑲᔪᖅᐸᑦᓱᓂ ᐊᖅᓱᕈᕐᓇᑐᒃᑰᖅᑐᓂᒃ; ᐊᓪᓚᕕᒻᒥᓗ ᐱᓕᕆᒍᓐᓇᑦᓯᐊᖅᓱᓂ; ᑲᑎᒪᔨᐅᓂᕐᒥᒍᑦ ᐃᑲᔪᑦᓯᐊᖅᐸᑦᓱᓂ; ᐃᓄᑦᑎᑐᑦ ᑎᑎᕋᕈᓐᓇᑦᓯᐊᖅᓱᓂ ᐅᖃᓕᒪᒍᓐᓇᑦᓯᐊᖅᓱᓂᓗ ᐊᒻᒪᓗ ᒥᖅᓱᖅᓯᑎᐅᑦᓴᓂ ᕿᓯᔭᓂᒃ, ᐊᑎᒋᓂᒃ, ᐊᓐᓄᕌᑦᓴᓂᓪᓗ ᓴᓇᒪᓂᖃᑦᓯᐊᖅᑐᓂᒃ.
ᓯᒨᓇ ᐊᕐᓇᑦᓯᐊᖅ
ᓯᒨᓇ ᐊᕐᓇᑦᓯᐊᖅ ᐃᓅᓕᕐᓂᑯ ᓄᓇᒥ ᐃᒡᓗᓕᐅᑉ ᖃᓂᒋᔭᖓᓂ ᓄᓇᕗᒥ. ᐋᑐᕚᒥᐅᖑᓯᒪᓕᖅᑐᖅ ᐅᑭᐅᑦ 20 ᐅᖓᑖᓄᑦ ᑭᓯᐊᓂ ᓱᓕ ᐊᕐᕕᑦᑕᑲᑕᖃᑦᑕᖅᑐᖅ ᓇᒧᑐᐃᓐᓇᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᓯᓚᖅᔪᐊᒥᓗ ᐃᖅᑲᓇᐃᔭᖅᓱᓂ. ᓯᒨᓇ ᓄᓇᖅᑲᑎᓄᑦ ᖃᐅᔨᒪᔨᒋᔭᐅᕙᑦᑐᖅ ᐱᓗᐊᖅᑐᒥ ᒪᑭᒪᐅᑎᑦᓴᓂᒃ ᐱᕈᖅᓴᐃᓂᕐᒧᑦ ᐃᓕᓐᓂᐊᑎᑦᓯᕙᑦᓱᓂᓗ ᐊᐅᓚᑦᔨᐅᓂᕐᒥᒃ ᓄᓇᓕᓐᓂ ᐅᑭᐅᖅᑕᖅᑐᒥ ᐊᒻᒪᓗ ᐋᑐᕚᒥ. ᓯᒨᓇ ᐃᓕᑕᕆᔭᐅᔾᔪᑎᒥᓂᒃ ᐱᓯᒪᔪᖅ ᐱᕈᖅᓴᐃᒍᓐᓇᓂᕐᒧᑦ ᑯᐊᐸᓂᒃ ᐱᔭᒥᓂᕐᒥᓂᒃ ᓴᐃᓐ ᕗᕌᓐᓯᔅ ᐃᒃᓴᐃᕕᐊ ᓯᓚᑦᑐᓴᕐᕕᔾᔪᐊᒥᒃ ᐊᒻᒪ ᓱᓕ ᐃᑲᔪᖅᓯᖃᑦᑕᖅᓱᓂ ᐃᓄᓐᓂᒃ ᐊᔪᐃᓐᓇᖅᑐᓂᒃ ᐱᖅᑯᓯᓕᕆᐅᑎᓂᓪᓗ ᐃᑲᔪᕐᓂᖃᑦᓯᐊᕈᓐᓇᖅᑐᓂᒃ ᒐᕙᒪᒋᔭᓄᑦ ᑕᒪᐃᓐᓄᑦ.
ᓯᒨᓇ ᐊᒥᓱᓂ ᑲᑎᒪᔨᐅᖃᑕᐅᖃᑦᑕᖅᓯᒪᔪᖅ ᖃᓄᖅᑑᖅᑎᐅᖃᑕᐅᑦᓱᓂ, ᐱᒋᐊᖅᑎᑦᓯᔨᐅᖃᑕᐅᑦᓱᓂᓗ, ᐊᒻᒪᓗ ᐃᑲᔪᖃᑕᐅᖃᑦᑕᖅᓱᓂ ᐃᓄᓕᕆᐅᑎᓂᒃ, ᐱᓗᐊᖅᑐᒥ ᐊᕐᓇᓂᒃ ᐃᓄᓐᓂ. ᓯᒨᓇ ᐃᖅᑲᓇᐃᔭᖃᑦᑕᖅᓯᒪᔪᖅ ᓄᓇᕗᒥ ᐳᓚᕋᑦᑐᓕᕆᔨᒃᑯᓐᓂ, ᓄᓇᕗᒥ ᓄᓇᓕᕆᔨᒃᑯᑦ ᐊᓪᓚᕝᕕᖓᓐᓂ, ᓄᓇᕗᒥ ᒐᕙᒪᒃᑯᑦ ᐅᖃᐅᓯᓕᕆᕕᖓᓐᓂ ᐱᖅᑯᓯᓕᕆᕕᖓᓐᓂᓗ, ᓄᓇᕗᑦ ᑐᖕᖓᕕᒃᑯᓐᓂ, ᐃᖃᓗᓐᓂ ᓄᓇᖅᑲᑎᒌᓄᑦ ᖃᓄᐃᖕᖏᔾᔪᑎᑦᓴᓕᕆᔨᓂ ᓱᕈᓯᓂᓪᓗ ᐱᓂᕐᓗᑦᑕᐅᑦᑕᐃᓕᑎᑦᓯᔨᓂ, ᑳᓪᑕᓐ ᓯᓚᑦᑐᓴᕐᕕᔾᔪᐊᒥ, ᓄᓇᕐᔪᐊᒥ ᑎᒍᔭᐅᒪᔪᓂᒃ ᐊᓂᓴᕋᐃᒍᒪᔪᓕᕆᔨᒃᑯᑦ ᑲᑎᒪᔨᖏᓐᓂ, ᐊᒻᒪᓗ ᑲᓇᑕᒥ ᐊᖓᔪᖅᑳᕐᔪᐊᑉ ᐊᓪᓚᕝᕕᖓᓂ. ᐱᔭᑦᓴᖃᐃᓐᓇᕋᓗᐊᖅᓱᓂ ᓯᒨᓇ ᐃᑉᐱᒍᓱᑦᓯᐊᐸᑦᑐᖅ ᐃᓚᒥᓂᒃ ᐊᓈᓇᐅᓂᕐᒥᒍᑦ ᐊᓈᓇᑦᓯᐊᖑᓂᕐᒥᒍᓪᓗ, ᐊᒻᒪᓗ ᒥᖅᓱᐸᑦᓱᓂᓗ ᓇᒻᒥᓂᖅ ᓴᓇᒪᐅᓯᓕᐅᖅᓱᓂ ᐊᒻᒪᓗ ᓱᓇᒐᓚᓐᓂᒃ ᒥᖅᓱᒐᓕᐅᖅᐸᑦᓱᓂ. ᐊᓈᓇᒥᓄᑦ ᐃᓚᖏᓐᓄᓪᓗ ᒥᖅᓱᕆᐅᖅᑎᑕᐅᒪᑦᓱᓂ, ᓯᒨᓇ ᓴᓇᐅᒐᒥᒍᑦ ᑕᑯᑦᓴᐅᑎᑦᓯᕙᑉᐳᖅ ᐃᓄᓐᓄᑦ ᐃᓱᒪᒋᔭᐅᕙᑦᑐᓂᒃ ᐅᑉᐱᕆᔭᐅᕙᑦᑐᓂᓪᓗ ᓯᓚᕐᔪᐊᑉ ᒥᑦᓴᓄᑦ ᐃᓕᖓᓂᖓᓂᓪᓗ ᓄᓇᒧᑦ ᓂᕐᔪᑎᓄᓪᓗ ᐃᓄᐃᑦ ᓄᓇᖓᓐᓂ.
ᓯᒨᓇ ᐃᑲᔪᖅᓯᒪᔪᖅ ᐃᓴᕈᒃᑯᓐᓂ ᐱᓕᕆᖃᑦᑕᖅᓯᒪᓂᕐᒥᒍᑦ ᐱᒋᐊᖅᑎᑦᓯᖃᑕᐅᖃᑦᑕᓂᕐᒥᒍᑦ ᑲᑎᒪᔨᐅᖃᑕᐅᖃᑦᑕᓂᕐᒥᒍᓪᓗ ᓴᖅᑭᐸᓪᓕᐊᔪᓄᑦ ᑲᑐᔾᔨᖃᑎᒌᓄᑦ, ᐃᓄᑦᑎᑐᑦ, ᕿᒥᕐᕈᓇᑦᑎᐅᖃᑦᑕᖅᓯᒪᑦᓱᓂ ᐱᓕᕆᐊᑦᓴᐅᑎᑕᐅᕙᑦᑐᓂᒃ ᓱᓇᓂᒃ ᐱᑕᖃᕆᐊᖃᕐᒪᖔᑕ ᓈᒻᒪᑦᓯᐊᕋᓗᐊᕐᒪᖔᑕᓗ ᖃᐅᔨᓴᖅᓱᒋᑦ, ᑮᓇᐅᔭᓕᕆᐅᑎᓂᒃ ᖃᐅᔨᒪᑦᓯᐊᖅᓱᓂ, ᐊᒻᒪᓗ ᖃᐅᔨᒪᑦᓱᓂ ᐃᓄᓐᓄᑦ ᒥᖅᓱᒐᓂᒃ ᓂᐅᕐᕈᑎᑦᓴᓕᐅᕆᑎᓂᒃ. ᐃᑲᔪᕈᒪᓂᕐᒥᒍᑦ ᐃᓄᓐᓂᒃ ᐋᑐᕚᒥᐅᓂᒃ ᐃᓚᐅᒍᒪᓯᒪᔪᖅ ᐃᓴᕈᐃᑦ ᐃᓄᐃᑦ ᐊᕐᓇᐃᑦ ᒥᖅᓱᕐᕕᑦᑕ ᐱᕙᓪᓕᐊᓂᖓ ᑲᔪᓯᑦᓯᐊᖁᑦᓱᓂᐅᒃ.
ᐃᓕᓴᐱ ᕘᒥᖕᕼᐊᒻ
ᐃᓕᓴᐱ ᕘᒥᖕᕼᐊᒻ ᐃᓃᓕᖅᓯᒪᔪᖅ ᐸᓐᓂᖅᑑᑉ ᖃᓂᒋᔭᖓᓂ, ᕿᑭᖅᑖᓗᒻᒥ, 1940-ᖑᑎᓪᓗᒍ. 1950-ᒥ ᐊᓈᓇᒌᒃ ᓄᑲᓛᖓᓗ ᐳᕙᓪᓗᑐᒃᑯᕕᒻᒨᖅᓯᒪᔪᑦ ᑯᐸᐃᒃ ᓯᑎᒥ ᖃᐅᔨᔭᐅᒐᒥᒃ ᐳᕙᓪᓗᓇᖅᑐᖃᕆᐊᖏᑦ. ᐊᓈᓇᖓ ᐃᓅᒍᓐᓃᓚᐅᖅᑐᒥᓂᒃ ᐅᑭᐅᓂᒃ ᒪᕐᕈᓐᓂᒃ ᐋᓐᓂᐊᕕᒻᒦᓕᖅᓱᓂ ᐊᒻᒪᓗ ᐊᓈᓇᐃᕈᒻᒪᑦ ᐃᓕᓴᐱ ᐃᖃᓗᓐᓄᑦ ᐊᐅᓪᓚᖅᑎᑕᐅᓚᐅᖅᑐᕕᓂᖅ ᐃᓚᖏᓐᓅᖅᑕᐅᑦᓱᓂ ᑖᕙᓂ. ᐊᓈᓇᐃᕈᓐᓂᑰᓂᑯᖓᓄᑦ 11-ᓂᒃ ᐅᑭᐅᖃᓕᖅᓱᓂ, ᐃᓕᓴᐱ ᐃᓕᓐᓂᐊᕕᒻᒥ ᐃᓕᓐᓂᐊᖅᓯᒪᖕᖏᓐᓇᒥ ᒥᖅᓱᕆᐅᖅᓴᐸᓪᓕᐊᓯᓂᑯ ᐊᓯᓂᒃ ᐊᕐᓇᓂᒃ ᓄᓇᖅᑲᑎᒥᓂᒃ ᑕᑯᓐᓇᖃᑦᑕᖅᓱᓂ ᐊᒻᒪᓗ ᓇᒻᒥᓂᖅ ᐱᔭᕆᐅᖅᓴᐸᑦᓱᓂ. ᐃᓕᓴᐱ ᒥᖅᓱᖅᑎᐅᓂᕐᒥᒍᑦ ᓇᒧᑐᐃᓐᓈᖃᑦᑕᖅᓯᒪᔪᖅ ᐃᓅᓯᕐᒥᓂ.
20-ᓂᒃ ᐅᑭᐅᖃᓕᖅᓱᓂ, ᐃᓕᓴᐱ ᐊᐅᓪᓚᑲᓐᓂᕆᐊᖃᖅᑐᕕᓂᖅ ᐳᕙᓪᓗᑐᒃᑯᕕᒻᒧᑦ ᕼᐋᒥᐅᓪᑕᓐ, ᐋᓐᑖᕆᐅᒥ. ᖃᐅᔨᔭᐅᒻᒪᑦ ᒥᖅᓱᑦᓯᐊᓲᖑᓂᖓ ᑎᓕᔭᐅᓚᐅᖅᑐᕕᓂᖅ ᐅᓯᖕᖓᓯᓂᒃ ᖃᓕᐹᑦᓴᓂᓪᓗ ᓴᓐᓇᖁᔭᐅᑦᓱᓂ ᐱᑦᓴᕆᔭᐅᓂᐊᖅᑐᓂᒃ ᐳᕙᓪᓗᑐᒃᑯᕕᒻᒥ ᐅᓂᓯᒪᔪᓄᑦ. 1960-ᓂ, ᐃᓕᓴᐱ ᓇᒻᒥᓂᖅ ᒪᒥᓴᕈᒪᓯᓂᑰᑦᓱᓂ ᐋᓐᓂᕈᑎᒋᓯᒪᔭᒥᓂᒃ ᐃᑲᔪᖅᑕᐅᑎᓯᑦᓱᓂᓗ ᐊᐃᕆᒋᓯᒪᔭᒥᓂᒃ ᐱᖃᑦᑕᕈᒪᐃᕋᒥ ᒪᒥᓴᕐᕕᒻᒥ ᓂᐊᖁᖕᖒᒥ ᒪᑭᑉᐸᓪᓕᐊᓯᒪᔪᖅ ᒥᖅᓱᖃᑦᑕᓂᒃᑯ. ᑕᐃᑦᓱᒪᓂ ᐊᑎᒋᓕᐅᖃᑦᑕᓯᑦᓱᓂ ᓴᓇᖃᑦᑕᓯᓂᑯ ᐊᓐᓄᕌᓂᒃ ᐃᓗᖅᑯᓯᖅᓲᑎᓂᒃ ᑮᓇᐅᔭᓕᐅᕈᑎᒋᑦᓱᒋᑦ.
ᐊᑦᓱᕈᕐᓇᕕᔾᔪᐊᖅᑐᒃᑰᖅᓯᒪᑦᓱᓂ ᐃᓕᓴᐱ ᐃᓄᑑᔾᔨᑦᓱᓂ ᕿᑐᕐᖓᒥᓂᒃ ᐱᕈᐃᓂᑰᑦᓱᓂ ᐊᐃᓂᓯᓂᑯ ᐹᐱ ᕘᒥᖕᕼᐊᒻᒥᒃ ᐊᒻᒪᓗ ᐅᐃᒋᓕᖅᓱᓂᐅᒃ ᓄᑦᑎᓚᐅᕐᓂᑯ ᑕᓐᕕᐅᓪ, ᐋᓐᑖᕆᐅᒧᑦ ᑖᕙᓂᓗ ᐊᕐᕌᒍᓕᒫᒥᒃ ᐃᖅᑲᓇᐃᔭᕐᓂᑰᑦᓱᓂ ᑲᒥᓂᒃ ᐃᑎᒐᐅᔭᓂᓪᓗ ᓴᓇᕕᒻᒥ. ᑭᖑᓂᐊᒍᑦ ᒥᖅᓱᖅᑎᐅᖃᑕᐅᑲᐃᓐᓇᓚᐅᖅᓱᓂ ᐃᖃᓗᓐᓂ ᐊᒥᓱᓄ ᐊᕐᓇᐅᖃᑎᖏᓐᓄᑦ ᐃᑦᓯᕐᕕᓕᐅᖅᑎᑕᓄᑦ ᐅᓇᑕᖅᑎᓄᑦ, ᐃᓕᓴᐱ ᓄᑦᑎᖅᑕᐅᓂᑰᒻᒥᔪᖅ ᐋᔅᒍᑦ, ᐋᓐᑖᕆᐅᒧᑦ ᓴᓇᕕᖁᑎᓕᒻᒧᑦ ᑖᕙᓂ, ᑕᐃᑲᓂᓗ ᐃᓕᓴᐱ ᐊᕐᓇᐅᖃᑎᖏᓪᓗ ᒥᖅᓱᖅᑎᑕᐅᓕᖅᓱᑎᒃ ᖃᕐᓕᑲᓪᓚᓂᒃ ᐃᕕᐊᖏᖅᓯᐅᑎᓂᓪᓗ. ᑕᐃᓐᓇ ᐃᖅᑲᓇᐃᔭᕐᕕᖓ ᑲᔪᓯᑦᓯᐊᕈᓐᓂᕐᒪᑦ, ᐃᓕᓴᐱ ᓄᑦᑎᕐᓂᑯ ᐋᑐᕚᒧᑦ ᑕᐃᒪᖕᖓᓂᓪᓗ ᒥᖅᓱᖃᑦᑕᖅᓱᓂ ᓱᓇᑐᐃᓐᓇᕐᓂᒃ ᓴᓇᑦᓱᓂ ᐊᖏᕐᕋᒥᓂ.
ᐃᓕᓴᐱ ᑕᖁᓱᐃᑦᑐᖅᑎᑐᑦ ᐱᓕᕆᖃᑦᑕᖅᑐᖅ ᐃᑲᕈᒃᑯᓐᓂ ᔭᓐᓄᐊᕈ 2020-ᒥᓂᑦ ᐃᓚᐅᖃᑦᑕᖅᓱᓂᓗ ᐃᓕᓐᓂᐊᖅᑐᖃᓕᕋᐃᒻᒪᑦ ᐃᓕᓴᐃᔨᐅᖃᑕᐅᑦᓱᓂ, ᐃᓐᓇᕆᔭᐃᑦ ᑲᑎᒪᑎᑕᐅᑎᓪᓗᒋᑦ ᓇᔫᑎᕙᑦᓱᓂ ᐊᒻᒪᓗ ᐃᓴᕈᒃᑯᓐᓄᑦ ᐊᐅᓚᑕᓄᑦ ᐃᓚᒋᔭᐅᕙᑦᓱᓂ. ᓄᕙᕐᔪᐊᕐᓇᖃᓗᐊᖅᑎᓪᓗᒍ ᖁᕕᐊᓱᒍᑕᐅᓯᒪᔪᖅ 80-ᓂᒃ ᐅᑭᐅᑖᖅᑎᓪᓗᒍ, ᓱᕐᕋᓯᒪᓇᓂᓗ ᐃᓄᖅᑭᑦᑑᓂᖓ ᖁᓱᖓᐃᑦᑑᓂᖓᓗ ᒥᖅᓱᖃᑦᑕᕐᓂᖓᓗ ᓄᖅᑲᐅᒥᓯᒪᒐᓂ. ᐃᓚᐅᖃᑦᑕᖅᓯᒪᔪᓕᒫᑦ ᐃᓴᕈᐃᑦ ᐃᓄᐃᑦ ᓴᓇᐅᒐᓕᐅᖅᑎᓄᑦ ᖁᕕᐊᒋᔭᖃᖅᓱᑎᒃ ᖁᔭᓕᕙᑦᑐᑦ ᐃᓕᓴᐱᒥᒃ ᐃᓕᓴᐃᔨᖃᕆᐊᖅ ᒥᖅᓱᖅᓯᑎᐅᓂᖓᓄᑦ ᐃᓄᑦᓯᐊᖑᓂᖓᓄᓪᓗ ᐅᓂᒃᑳᖃᑦᑕᕐᓂᖓᓄᓪᓗ ᐊᒻᒪᓗ ᑲᑦᓱᖓᐃᑦᓱᓂ ᑲᔪᓰᓐᓇᑐᐃᓐᓇᕐᒪᑦ ᐃᓅᓯᕐᒥᓂ.
ᓲᓯ ᑭᑦᓚ
ᓲᓯ ᐱᕈᖅᓴᓂᑯ ᑲᖏᖅᓱᐊᓗᔾᔪᐊᖅ, ᓄᓇᕕᒻᒥ. ᓯᓚᒻᒥ ᐱᖕᖑᐊᕆᐊᑦᓴᖅ ᖃᕕᐊᒋᔭᖃᖅᓱᓂ ᓇᒧᑐᐃᓐᓈᖃᑦᑕᖅᓯᒪᔪᖅ ᓄᓇᒥ ᓱᓇᖃᕐᒪᖔᖅ ᖃᐅᔨᒐᓱᐊᖅᓱᓂ. ᐊᓈᓇᑦᓯᐊᖓᓄᑦ ᐊᑖᑕᑦᓯᐊᖓᓄᓪᓗ ᐃᓕᑎᑕᐅᓯᒪᔪᖅ ᓇᒻᒥᓂᖅ ᐊᓐᓄᕌᓕᐅᕐᓂᕐᒥᒃ. ᒪᒃᑯᑦᓱᓂ ᓱᓕ ᑲᑎᑎᑕᐅᓂᑯ ᒫᓐᕗᕆᑦ ᑭᑦᓚᒧᑦ, ᖁᓛᒍᓕᒻᒥᒃ ᐊᖁᑎᐅᑎᓪᓗᒍ, ᐊᒻᒪᓗ 1970-ᖏᓐᓂ ᐊᕐᕌᒍᐃᑦ ᓅᑦᓂᑰᑦᓱᑎᒃ ᐅᐃᒌᒃ ᐊᖏᕐᕋᖃᓕᖅᓱᑎᒃ ᐃᒻᒧᑦᓯᐅᒐᖁᑎᖃᖅᓱᑎᒃ ᐊᒻᒪᓗ ᓇᒻᒥᓂᖅ ᐱᕈᖅᓰᕙᑦᓱᑎᒃ ᓂᕿᑦᓴᓂᒃ.
ᓇᐹᖅᑐᓕᒻᒥᐅᑕᐅᑦᓱᓂ ᐱᕈᖅᓯᐊᒥᓂᒃ ᑲᒪᕙᑦᓱᓂ ᐊᒻᒪᓗ ᐃᓄᓕᕆᔨᒃᑯᑎᒍᑦ ᐊᓈᓇᖕᖑᐊᖑᓪᓗᓂ ᑎᒍᐊᖑᑲᐃᓐᓇᖅᑎᑕᓄᑦ ᑲᒪᔨᐅᕙᑦᓱᓂᓗ ᐋᓐᓂᐊᕕᓕᐊᖅᓯᒪᔪᓂᒃ ᒪᓐᑐᕇᐊᓪᒥ, ᓲᓯ ᐊᓐᓄᕌᓕᐅᖃᑦᑕᖅᓯᒪᔪᖅ ᒪᕐᕈᒃ ᐸᓂᖏᑕ ᐱᑦᓴᖏᓐᓂᒃ ᐊᓯᖏᑕᓗ ᐱᑦᓴᖏᓐᓂᒃ ᓴᓇᒪᓂᖃᖅᓱᑎᒃ ᐃᓕᖅᑯᓯᖅᑎᑐᑦ.
ᓲᓯ ᒫᓐᓇ ᓱᓕ ᒥᖅᓱᕆᐅᖅᓴᑎᑦᓗᓯᕙᑦᑐᖅ ᐃᓴᕈᒃᑯᓐᓂ. ᐃᓅᓂᕐᒥᒍᑦ ᐱᖅᑯᓯᕐᒥᓂᒃ ᐆᒪᑎᑦᓯᔪᖅ ᒥᖅᓱᖃᑦᑕᓂᒃᑯᑦ, ᓄᕕᖅᓴᖃᑦᑕᓂᒃᑯᓪᓗ, ᐊᒪᓗ ᓂᑦᓯᑦᑕᖃᑦᑕᓂᒃᑯᑦ. ᓲᓯᒃᑯᒃ ᐅᐃᒌᒃ ᒫᓐᓇ ᑭᒻᕕᐅᓪᒥ ᐊᖏᕐᕋᓖᒃ.
ᒥᐊᓕ ᐊᓚᐃᖕᖓ
ᐃᖃᓗᒻᒥᐅᑦᓴᔭᐅᑦᓱᓂᒃ ᒥᐊᓕ ᐊᓚᐃᖕᖓ ᕗᕋᐃᓴ ᐱᕈᐃᔭᐅᓯᒪᔪᖅ ᐊᓈᓇᖓᓄᑦ ᐊᑖᑕᖓᓄᓪᓗ ᓴᐃᒨᓂ ᐊᓚᐃᖕᖓᒧᑦ, ᓄᓇᒧᑦ ᓅᓯᒪᖃᑦᑕᖅᓱᑎᒃ, ᐊᒻᒪᓗ ᐊᖓᔪᖅᑳᒥᑎᑐᑦ ᐃᑲᔪᖃᑦᑕᖅᓯᒪᑦᓱᓂ ᓄᓇᖅᑲᑎᒥᓂᒃ.
ᐃᖅᑲᓇᐃᔭᖃᑦᑕᖅᓯᒪᔪᖅ ᐃᓄᓕᕆᔨᐅᑦᓱᓂ, ᐃᓐᓇᕐᓄᑦ ᐃᓕᓴᐃᔨᐅᑦᓱᓂ, ᐃᓅᓯᓕᕆᔨᐅᑦᓱᓂ, ᖃᐅᔨᒪᔨᒋᔭᐅᑦᓱᓂ ᐊᓄᓪᓚᑦᓰᕕᓂ, ᐊᒻᒪᓗ ᐊᓂᓴᕋᐃᒍᒪᔪᓕᕆᔨᒃᑯᑦ ᑲᑎᒪᔨᕐᔪᐊᖏᓐᓄᑦ ᑲᒪᔨᐅᖃᑕᐅᑦᓱᓂ. ᒥᐊᓕ ᐆᒻᒪᖅᓴᐃᓯᒪᒻᒪ ᐃᓄᓐᓂᒃ ᖃᐅᔨᒪᑎᑦᓯᔨᐅᑦᓱᓂ ᓇᑭᖕᖔᖓᒻᒪᖔᑕ ᓇᕐᕈᒋᓇᒋᑦ ᖃᓄᐃᓯᒪᑦᑕᕋᓗᐊᖅᐸᑕ ᑭᒃᑯᑐᐃᓐᓇᕐᓄᑦ ᖃᐅᔨᒪᔭᐅᑦᓱᓂ ᓇᓪᓕᒋᔭᖅ ᐅᐱᒋᔭᐅᑦᓱᓂᓗ.
ᐅᐃᒌᒃ ᐋᑐᕚᒥᐅᖑᓕᖅᑑᒃ ᐅᑭᐅᓂᒃ 20-ᓂᒃ. ᒥᐊᓕ ᐱᖅᑯᓯᖅᓲᑎᓂᒃ ᖃᐅᔨᒪᔨᒋᔭᐅᓯᒪᔪᖅ ᐃᓴᕈᐃᑦ ᑲᑎᒪᔨᖏᓐᓄ ᐱᓕᕆᐊᑦᓴᓂᒃ ᐸᕐᓇᐃᖃᑕᐅᑦᓱᓂ.
