ᐅᒃᑐᐱᕆ, 2022,ᒥ, ᐃᓴᕈᐃᑦ ᑲᑎᒪᑎᑦᓯᓚᐅᕐᓯᒪᒻᒪᑕ ᓯᕗᓪᓕᕐᐹᑦᓯᐊᒥ ᐃᓄᐃᑦ ᓴᓇᖑᐊᕐᑎᓂᒃ ᐋᑐᕗᐊᑉ ᑎᑎᕋᐅᔭᕐᓯᒪᔪᓂᒃ ᑕᑯᔭᒐᖃᕐᕕᐊᒥ, ᑲᑎᒪᓂᖓᓗ ᑲᔪᓯᑎᑕᐅᓪᓗᓂ ᐃᓄᓐᓄᑦ ᓴᓇᓐᖑᐊᕐᑎᓄᑦ. ᑲᑎᒪᒋᐊᓚᐅᕐᓯᒪᔪᑦ ᓯᑎᐱᕆ 30,ᒥ, ᑲᓇᑕᒥ ᓴᐃᒻᒪᖃᑎᒌᑉᐸᓪᓕᐊᓂᕐᒧᑦ ᐅᓪᓗᖓᓂ, ᒪᑐᐃᕐᓯᓂᖃᓱᑎᓪᓗ ᐃᓴᕈᒃᑯᑦ ᓴᓇᕕᖓᓂᒃ ᐊᒻᒻᒪ ᒥᕐᓱᕐᕕᖓᓂᒃ ᐃᓕᓐᓂᐊᕐᕕᐊᓗᕕᓂᐅᑉ ᐃᓕᓴᕐᕕᖓᓂ (ᕇᑐᒥ ᓄᓇᖅᑲᑎᒌᓄᑦ ᑲᑎᖃᑦᑕᕕᒻᒥ), 815 ᓴᐃᓐ ᓚᕌᓐ ᐳᓚᕚᒥ, ᐋᑐᕗᐊ, ᐋᓐᑎᐊᕆᐅᒥ. ᒪᑐᐃᕈᓯᓚᐅᕐᑐᒍᑦ ‘ᐃᓄᑦᑎᒍᑦ’ ᑲᔪᓯᑎᑕᐅᑎᓪᓗᒋᑦ ᐃᓄᓐᓄᑦ ᓴᓇᖑᐊᕐᑎᓄᑦ ᐊᖅᑯᑎᖃᓂᒃᑯᑦ ᐃᓱᒪᒋᔪᓐᓇᐃᖃᑎᒋᕙᓪᓕᐊᓂᕐᒥᒃ ᑕᒪᕐᒥᒃ ᐃᓄᐃᑦ ᓴᓇᖑᐊᕐᑏᑦ ᐃᓚᐅᓕᖁᓪᓗᒋᑦ. ᑲᑎᒪᓂᖅ ᐅᓪᓗᓂ ᐱᖓᓱᓂ ᑲᔪᓯᓂᖃᕐᑎᓪᓗᒍ, ᐃᓄᐃᑦ ᓴᓇᖑᐊᕐᑎᑦ ᐅᑭᐅᕐᑕᕐᑐᒥ ᓇᓂᑐᐃᓐᓇᒥᐅᑕᐃᑦ ᐅᖃᐅᓯᖃᖃᑦᑕᓚᐅᕐᑐᑦ ᐊᔾᔨᒌᖏᑦᑐᓂᒃ ᐊᒻᒪ ᐅᖃᐅᓯᖃᕐᓱᑎᒃ ᐃᓱᒪᒋᔭᒥᓂᒃ ᑕᑯᓂᖓᑦᓴᐃᓐᓇᖅ ᐊᒻᒪ ᐃᓱᒫᓗᒍᑕᐅᔪᓂᒃ, ᐅᖃᐅᓯᖃᕐᓱᑎᓪᓗ ᐃᑲᔪᕐᑕᐅᔾᔪᑎᒃᓴᓂᒃ ᐊᒻᒪ ᐅᓂᒃᑳᓂᒃ. ᑲᑎᒪᓂᒃᑯᑦ, ᓇᓗᓇᕈᓐᓇᐃᓚᐅᕐᑐᖅ ᓴᓇᖑᐊᕐᑏᑦ ᐅᖃᓕᒫᒐᒃᓴᖃᕆᐊᓖᑦ ᒪᓕᑦᑕᒃᓴᒥᓂᒃ ᐊᑑᑎᖃᕋᔭᕐᒪᑕ ᐃᑲᔪᕈᑕᐅᒋᐊᖅ ᐃᓄᓐᓄᑦ ᓴᓇᖑᐊᕐᑎᓄᑦ ᐃᓄᐃᑦ ᓄᓇᖓᓂ ᐊᒻᒪ ‘ᖃᓪᓗᓈᑦ ᓇᖓᓂᑦᑐᓄᑦ’, ᐅᑦᑑᑎᒋᓗᒍ ᐋᑐᕗᐊᒥ ᐊᑐᕐᑕᐅᔪᓐᓇᕐᑐᑦ, ᐱᓱᖃᑎᒌᓐᓂᒃᑯᑦ ᐊᒻᒪ ᐃᑲᔪᖃᑎᒌᓐᓂᒃᑯᑦ, ᐊᒻᒪ ᐱᓕᕆᐅᑎᒃᓴᓂᒃ ᕿᓂᕐᓂᒃᑯᑦ ᐃᑲᔪᕈᑕᐅᒐᔭᕐᓗᑎᒃ ᑕᒪᐃᓐᓄᑦ ᓴᓇᖑᐊᕐᑎᓄᑦ.
ᖁᔭᓕᕙᕗᑦ ᓄᓇᖃᖅᑳᕐᓯᒪᔪᑦ ᐅᖃᐅᓯᓕᕆᓂᐊᒍᑦ ᒐᕙᒪᑐᖃᐃᑦ ᑲᓇᑕᒥ ᑐᓂᓯᓚᐅᕐᒪᑕ ᑲᓇᑕᒥ ᐱᖅᑯᓯᑐᖃᓕᕆᔨᖏᑦ, ᑕᐃᒪᐃᒻᒪᓪᓗ ᐃᓴᕈᒃᑯᑦ ᓯᕗᓪᓕᕐᐹᒥ ᑎᑎᕋᕈᓐᓇᕐᓯᓚᐅᕐᐳᑦ ᓇᐃᓪᓕᒋᐊᕐᓯᒪᔪᓂᒃ ᑐᓴᕐᑎᑦᓯᒍᑎᓂᒃ ᐃᓴᕈᒃᑯᑦ ᑲᑎᒪᕐᔪᐊᕐᓂᕆᓚᐅᕐᑕᖓᑕ (2022),ᒥ ᒥᒃᓵᓄᑦ, ᐊᒻᒪ ᓴᖅᑭᑕᐅᓪᓗᓂ, ᐊᑐᐃᓐᓇᕈᑎᑕᐅᓪᓗᓂ ᖃᕆᑕᐅᔭᒃᑯᑦ ᐊᒻᒪ ᑎᑎᕋᕐᓯᒪᔪᑦ. ᑐᓪᓕᐊᓂ ᐃᓴᕈᒃᑯᑦ ᑲᑎᑎᑦᓯᓂᖃᓚᐅᕐᑐᑦ ᐅᓄᖏᑦᑑᒐᓗᐊᓂᒃ ᐅᖃᓕᒪᔨᓂᒃ ᑲᑎᒪᑎᓪᓗᒋᑦ ᑎᑎᕋᕋᔭᕐᑐᓂᒃ ᐊᔾᔨᒌᖏᑦᑐᓂᒃ ᐱᔾᔪᑎᓕᓐᓂᒃ ᐃᓄᐃᑦ ᓴᓇᖑᐊᕐᑎᖏᓐᓄᑦ ᐊᒻᒪ ᓇᓗᓇᐃᔭᐃᓪᓗᑎᒃ ᐃᓱᒪᒋᔭᒥᓂᒃ ᐃᑲᔪᕈᑕᐅᒐᔭᕐᑐᒋᓪᓗᒋᑦ ᐃᓄᓐᓄᓄᑦ ᓴᓇᖑᐊᕐᑎᓄᑦ ᑲᔪᓯᒃᑲᓐᓂᕆᐊᖅ. ᑖᒃᑯᐊ ᑕᒪᕐᒥᒃ ᓴᖅᑭᑕᐅᓕᕐᑐᑦ, ᓯᕗᓪᓕᕐᐹᑦ ᑎᑎᕋᕐᓯᒪᔪᑦ ᐅᖃᐅᓯᖃᕐᓯᒪᔪᖅ ᓂᕆᐅᒋᔭᑦᑎᓐᓂᒃ ᐊᕐᕌᒍᑕᒫᑦ ᓴᖅᑭᑕᐅᖃᑦᑕᖁᓪᓗᒋᑦ ᐊᒻᒪ ᐊᑐᐃᓐᓇᕈᓗᒋᑦ ᑎᑎᕋᕐᓯᒪᑎᓪᓗᒋᑦ ᖃᕆᑕᐅᔭᒃᑯᓪᓗ ᐊᑐᕋᒃᓴᐅᓗᑎᒃ ᑕᒪᐃᓐᓄᑦ ᐃᓄᓐᓄᑦ ᓴᓇᖑᐊᕐᑎᓄᑦ ᐊᔾᔨᒌᖏᑦᑐᓂᒃ, ᓇᓂᑐᐃᓐᓇᖅ ᓄᓇᖃᕋᓗᐊᕈᑎᒃ.
ᐃᓴᕆᐃᒃᑯᑦ ᐃᓕᑕᕐᓯᒍᒪᓗᐊᕐᑐᑦ ᐃᓴᕈᒃᑯᓐᓂ ᐃᓄᓐᓂᒃ ᓴᓇᖑᐊᕐᑎᓂᒃ ᐱᓇᓱᐊᕐᑐᒻᒪᕆᐅᓚᐅᕐᒪᑕ ᑕᒪᓐᓇ ᑲᔪᓯᖁᓪᓗᒍ ᐊᒻᒪ ᑎᑎᕋᓚᐅᕐᑐᑦ ᐊᑐᐊᒐᒃᓴᓂᒃ: ᕈᐱᓐ ᖁᒪᖔᐱᒃ, ᐊᐃᔭ ᖁᒪᖔᐱᒃ, ᑎᕇᓯ ᑐᖏᓕᒃ, ᐊᒻᒪ ᔮᓐ ᕼᐃᐅᔅᑕᓐ ᐃᓚᐅᓚᐅᕐᑐᑦ. ᖁᔭᓕᒻᒥᔭᕗᑦ ᔮᓐ ᐋᓪᐳᕐᑦ ᐊᒻᒪ ᐱᓕᕆᖃᑎᒋᔭᖏᑦ ᖃᕆᑕᐅᔭᒃᑯᑦ ᓴᖅᑭᔮᖅᑐᑦᓴᓂᒃ ᓴᓇᔨᓄᑦ, ᐸᕐᓇᓇᐃᕐᓯᓯᒪᓚᐅᕐᒪᑕ ᖃᕆᑕᐅᔭᒃᑯᕆᐊᓕᓐᓂᒃ, ᐅᕘᓇ www.isaruit.ca.
ᓂᕆᐅᓐᓂᖃᕐᐳᒍᑦ ᑖᒃᑯᐊ ᐅᖃᓕᒫᒐᒃᓴᐃᑦ ᐅᖃᓕᒫᕈᒥᓇᖁᓪᓗᒋᑦ, ᑐᑭᓯᒋᐊᕐᕕᒃᓴᑦᓯᐊᕙᐅᓗᑎᒃ ᐊᒻᒪ ᐃᑲᔪᕈᑕᐅᔪᓐᓇᕐᓗᑎᒃ. ᐃᓱᒪᕐᓱᕐᐳᓯ ᑎᑎᕋᕆᐊᖅ ᐅᖃᐅᓯᕆᔪᒪᔭᑦᓯᓐᓂᒃ ᐊᒻᒪ ᑐᓂᓗᒋᑦ ᐊᖅᑭᒃᓱᕐᑕᐅᖃᓯᐅᑎᔪᒃᓴᐅᑎᓪᓗᒋᑦ “ᐃᓴᕈᐃᑦ ᐃᓄᐃᑦ ᓴᓇᖑᐊᕐᑏᑦ ᐊᑐᐊᒐᖓ” ᐅᕘᓇ isaruit.inuit@gmail.com. ᓂᕆᐅᑉᐳᒍᑦ ᐃᓕᑦᓯᓐᓄᑦ ᑐᓴᕐᑎᑕᐅᒋᐊᖅ!
ᓇᑖᓴ ᓚᑐᕆᓪ,
ᑲᑎᒪᑎᑦᓯᔨᖓ ᑲᑎᒪᔨᖏᑕ ᐃᓴᕈᐃᑦ ᐃᓄᐃᑦ ᓴᓇᖑᐊᕐᑎᖏᑦ: ᐱᔪᓐᓇᕐᓂᕗᑦ
